2017-06-24 12:54:56 clouds 27o High | Kigali Rwanda

Dukurikire:
 
 

Rayon Sports yitwaga ikipe y’Abatutsi - Murenzi

Yanditswe na IMVAHO NSHYA

Kuya 2017-04-12 07:44:07

 
Share on:
 
Yasuwe:1910
 
Yavuzweho:200
 
10
 
10

Murenzi Cassim, umwe mu bahoze bakinira Rayon Sports mbere ya Jenoside akanakomeza kuyikurikiranira hafi aravuga ko ibikorwa by’ivanguramoko byageze mu mupira w’amaguru bikibasira bikomeye Abatutsi mbere ya Jenoside yo muri Mata 1994.

Murenzi, umubyeyi wa Murenzi Abdallah wabaye Perezida wa Rayon Sports atanga urugero ku byabayeho ubwo Col Serubuga wayobora ikipe yari iya gisirikare “Panthere” yaje gutegeka abakinnyi ba Rayon Sports kuvamo bakajya gusunika imodoka y’abakinnyi ba Panthere yari yaheze mu byondo hirya gato yo ku giti cy’inyoni, kuko ngo bari Abatutsi b’i Nyanza.

Uyu mubyeyi wavukiye i Nyanza yatanze ubuhamya burebure, ku byo azi kuri Rayon Sports mbere gato no mu gihe cya Jenoside.

JPEG - 159 kb
Ikipe ya Rayon Sports mu myaka ya 1990

Imvaho Nshya (IN): Tuguhaye ikaze

Murenzi: Murakoze

IN: Watangira utubwira ubuzima bwawe nk’umukinnyi?

Murenzi: Nahereye mu ikipe y’ikigo cy’amashuri abanza cy’abagatolika (i Nyanza), mu 1969 njya mu ikipe ya kabiri ya Rayon Sports, ntangira gukina mu ikipe ya mbere mu 1971. Rayon Sports nayikiniye kugeza mu 1987 ndabihagarika kuko nabonaga nsa n’ukuzeho.

Muri Rayon Sports twayikiniraga nta mushahara, wenda icyo bagukoreraga ni ukugusabira akazi cyangwa bakakwigisha imodoka. Wava ku kazi ukajya mu myitozo.

IN: Nyuma yo guhagarika wahise ujya he?

Murenzi: Nyuma naje gutoza ikipe ya Flash yari muri Perefegitura ya Gitarama, kugeza mbere gato ya Jenoside nari nsigaye nkora i Burundi.

IN: Rayon Sports yari ihagaze gute mbere ya Jenoside?

Murenzi: Mbere ya Jenoside yari ikipe ikomeye kuko yari imaze gutsinda Al Hilar muri 1/4 cy’imikino y’Afurika.

IN: Mbere gato ya Jenoside, muri Rayon Sports abakinnyi bari babanye gute?

Murenzi: Mbere ya Jenoside muri Rayon Sports nta bintu by’amoko byari birimo, nta kureba ngo uyu kanaka ni umututsi cyangwa uyu ni umuhutu. Abantu bose barabanaga kuko n’abatuyoboraga bari abantu bo mu bwoko bw’Abatutsi ariko abantu bose babibonamo.

Mu 1990, 1992, 1993 abanyamahanga bakinaga ari benshi; ari batanu kuri batandatu. Harimo abantu baturutse i Burundi n’abanyeshuri bari bararangije.

Mbere ya Jenoside bari baradutoje kubana, gukundana; gusangira ku buryo nta muntu washoboraga kuba ari wenyine. Twari twarabitojwe n’umuperezida witwa Mutarambirwa Seleverian, yasanga umuntu ari wenyine akadutonganya, akatwumvisha ko nta kintu twakora tudakundanye.

IN: Mu gihe Jenoside yatutumbaga, hari ibimenyetso byagaragazaga ko hari abakinnyi bo mu bwoko bw’Abatutsi bari kuzicwa?

Murenzi: Icyo gihe hari ibintu byo guhangana kw’Abanyenyanza n’abasirikare.

Ndibuka twigeze kujya gukina i Kigali, mu igikombe cyitwaga icya Pentekositi, ubwo Panthere Noir yari yakiniye i Butare natwe twakiniye i Kigali duhurira hafi ya Nyabarongo ahantu umuhanda wari warapfuye, hahitamo imodoka imwe.

Umuntu witwa Col Serubuga ava mu modoka arabaza ati kuki iriya modoka idatanga inzira? baramubwira bati ni abakinnyi ba Rayon Sports, aravuga ati ntibishoboka, ni ba batutsi b’i Nyanza, nimubabwire baze babanze badusunike.

Twari twatsinzwe bo batsinze turamubwira tuti twe se tubasunika kubera iki?

Ibintu by’amacakubiri byatangiye kera. Mu makipe iyo utabaga muri Eclair ntuve muri Panthere, byabaga ari icyaha nyine. Bakubwira ngo uvuye i Nyanza kandi ni ho ubwami bwabaga. Ngo ni ba bantu bo kwa Rudahigwa. Kuva na mbere abantu bari bararenganye.

Gusa nka Rayon Sports icyajyaga kidufasha ho gato ni uko twigeze kuyoborwa n’umuntu witwaga Murego wari waraturutse mu Majyaruguru muri za Ruhengeri.

IN: Bivuze ko Rayon Sports yatotejwe muri icyo gihe n’abari abayobozi ba Leta yariho?

Murenzi: Abantu ntibumvaga ko abantu bo mu Majyaruguru ari kimwe no mu Majyepfo.

Hariho ibibazo mu mupira. Kujya kwandikisha cyangwa kuzana umukinnyi byabaga ikibazo. Ukazana umukinnyi wamugeza hano bakamutwara, njye ndibuka twigeze kuzana umukinnyi w’umuhanga witwaga Hussein, baza bamusanga mu myitozo baramutwara, bamushyira muri gereza. Ntacyo wavuga.

Mbere yuko Jenoside iba abantu batotezaga abandi. Mu bakinnyi twakinanaga harimo ababuze akazi, bakabambuye.

Mu 1988, Panthere ntiyari igikomeye, byari byimutse byagiye muri Mukungwa, yayoborwaga na Protais Zigiranyirazo (Musaza w’umugore wa Habyarimana), akora icyo ashaka, atwara abakinnyi ashaka. Natwe ariko twari ikipe ikomeye, itajya inyuma y’imyanya ine.

IN: Mbere y’uko Jenoside iba, abayobozi bari babanye gute n’abakinnyi?

Murenzi: Rayon Sports yayoborwaga n’abantu b’abacuruzi, kumenya icyo batekereza byari bigoye. Ariko mu ikipe muri rusange wabonaga nta kibazo kirimo.

IN: Mwari mu Burundi, ariko amakuru ya Rayon Sports mwayakurikiraniraga hafi. Ni ryari abakinnyi ba Rayon Sports bari mu bwoko bw’Abatutsi batangiye kwicwa?

Murenzi: Hari abari bagikina n’abari barahagaritse. Navuga ko ari mu kwezi kwa Gatanu 1994 no mu mpera z’ukwa Kane ni bwo numvaga ngo hapfuye kanaka na kanaka.

IN: Ni bande mwakinanye cyangwa bari abayobozi ba Rayon Sports wibuka bazize Jenoside

Murenzi: Hari uwahoze ari perezida wacu wa hariya ku Mayaga witwaga Ramutsa Marcel, hari uwitwaga Gatera Kalep yari visi perezida, hari uwitwa Nteziryayo Benoit, yari umunyamabanga. Uwitwa Semuhungu Ignace yigeze kuba umubitsi. Hatangimana Apa yari mukuru wanjye, nawe yakinye muri Rayon Sports. Hari Kamali François wigeze kuba kapiteni, yaguye i Shagasha aho yari umugoronome bamwicanye n’umugore n’abana.

Hari n’abapfuye bahunga barimo Munyurangabo Longin wakomokaga mu Ruhango, Muzehe Fatikaramu yabanje kuba umukinnyi nyuma aba umutoza nawe bamwiciye i Nyanza, umusaza witwaga Mutarambirwa wigeze kuba perezida yazize Jenoside, yewe ni benshi.

IN: Ese mwe ni gute mwabashije kurokoka?

Murenzi: Nagize amahirwe. Ubundi mvuye muri Flash i Gitarama, naje guhabwa akazi na Marume wabaga i Burundi njyayo kuhakorera.

Jenoside itangira nari naraye mvuye mu Rwanda, ndabyibuka mfite muramu wanjye witwa Rutagambwa Martin (Visi perezida wa Rayon Sports w’ubu), ni we twavanye hano ku itariki ya gatanu Mata, ku itariki ya 7 mu gitondo yakomanze iwanjye arambaza ati uzi ibyabaye? nti oya. Ati Habyarimana yapfuye, ndamubwira nti ibi bintu ntibiba amahoro. Nakijijwe no kuba nari naraye nsubiye i Burundi. Ariko umugore n’abana bari mu Rwanda. Mu matariki ya nyuma y’ukwa Gatanu ni bwo abantu bari bahunze bambwiye ngo iwanyu i Kavumu, barahasenye na nyogosenge, murumuna wawe na mukuru wawe barabishe.

IN: Mugire ubutumwa mugenera imiryango y’ababuze ababo bari abakinnyi ba Rayon Sports cyangwa bari bafite ahandi bahurira na yo.

Murenzi: Ubutumwa ni ukubafata mu mugongo, abantu bakibuka bakaniyubaka. Baze twubake Rayon Sports kuko ari ikipe ikundwa n’abantu benshi. Ikindi Rayon Sports bayitaga ikipe y’Abatutsi, ubwo rero umuntu wese wayikundaga bamubaraga nk’umututsi.

IN: Reka tukwifurize gukomera tunagushimire ku kiganiro tugiranye

Murenzi: Murakoze na mwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE