2017-07-28 06:05:39 clouds 27o High | Kigali Rwanda

Dukurikire:
 
 

Rayon Sports yegukanye igikombe cy’Amahoro nyuma y’imyaka 11

Yanditswe na IMVAHO NSHYA

Kuya 2016-07-05 04:51:18

 
Share on:
 
Yasuwe:47
 
Yavuzweho:200
 
10
 
10

Rayon Sports 1-0 APR FC
AS Kigali 1-0 Espoir FC

Ikipe ya Rayon Sports yegukanye igikombe cy’Amahoro itsinze APR FC ku mukino wa nyuma igitego 1-0 cyatsinzwe na Ismaila Diarra mu minota ya nyuma y’umukino.

Iyi kipe yari yakinnye umukino wa nyuma umwaka ushize wa 2015 ikabura igikombe itsinzwe na Police FC igitego 1-0 yahabwaga amahirwe yo gutsinda APR FC ariko mu kibuga biza guhinduka kuko byategereje umunota wa 90 kugira ngo Ismaila Diarra atsinde igitego ku mupira wari utewe na Kwizera Pierrot, umunyezamu Kwizera akawugarura nyuma Diarra agahita atsinda igitego.

JPEG - 386.6 kb
Abakinnyi ba Rayon Sports ishimira igikombe cy’Amahoro iyi kipe yaherukaga muri 2005 (Foto James R)

Iyi yari inshuro ya 3 (2002, 2010 na 2016) aya makipe ahurira ku gikombe cy’Amahoro akaba ari ubwa mbere Rayon Sports itsinze APR FC.

Rayon Sports yegukanye igikombe cy’Amahoro nyuma y’imyaka 11 dore ko yaherukaga kugitwara muri 2005 itsinda Mukura ibitego 3-0.

Nyuma yo kwegukana iki gikombe, umutoza wa Rayon Sports Masudi Juma wanakiniye iyi kipe yatangaje ko afite ibyishimo kuba abashije guhesha ikipe ya Rayon Sports igikombe.

Kuba uyu mutoza yari yabanje hanze rutahizamu Davis Kasirye watsinze APR FC ibitego 3 muri 4 bayitsinze mu mukino uheruka, Masudi yavuze ko ari uburyo bw’imikinire. Ati “Wabonye ko APR FC yari yakinishije abakinnyi benshi hagati byasabaga ko natwe tuzana abakinnyi benshi hagati ni yo mamvu napanze, Kwizera, Sefu na Mugheni Fabrice”.

Umutoza wa APR FC, Nizar Khanfir yatangaje ko ashimira ikipe ya Rayon Sports kuko yakinnye neza. Avuga ko batangiye bazibira iyi kipe ndetse mu gice cya kabiri bakagerageza gusatira ariko ku gakosa gato batsindwa igitego mu minota ya nyuma.

Ati “Ni uku mu mupira w’amaguru bigenda ku gikombe haboneka utsinda cyangwa utsindwa”.

Ikipe ya Rayon Sports yahawe igikombe na miliyoni 8 z’amafaranga y’u Rwanda, APR FC ihabwa miliyoni 4 naho AS Kigali yegukanye umwanya wa 3 itsinze Espoir FC igitego 1-0 ihabwa miliyoni 1,5. Ismaila Diarra akaba yahawe ibihumbi 500 nk’uwatsinze ibitego byinshi (7).

Ni igikombe cya 10 Rayon Sports yegukanye (1976, 1979, 1980, 1982, 1989, 1993, 1998, 2003, 2005 na 2016). Iyi kipe izahagararira u Rwanda mu mikino y’Afurika y’amakipe yitwaye neza iwayo “CAF Confederation Cup”.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE