2017-06-24 12:54:56 clouds 27o High | Kigali Rwanda

Dukurikire:
 
 

Rayon Sports yatsinze Bugesera FC ikomeza kuyobora shampiyona

Yanditswe na IMVAHO NSHYA

Kuya 2017-03-23 07:21:58

 
Share on:
 
Yasuwe:331
 
Yavuzweho:200
 
10
 
10

Bugesera FC 0-1 Rayon Sports

Ikipe ya Rayon Sports nyuma yo gutsinda Bugesera FC igitego 1-0 mu mukino w’umunsi wa 21 ikomeje kuyobora urutonde rwa shampiyona bikomeza no kuyiha amahirwe yo kwegukana igikombe.

Uyu mukino wabereye i Nyamata ejo hashize taliki 22 Werurwe 2017, ikipe ya Bugesera FC ku kibuga cyayo yakinnye umukino mwiza neza ndetse inarusha Rayon Sports yari yahisemo kubanza mu kibuga ba myugariro 6.

Umunyezamu wa Rayon Sports, Ndayishimiye Eric Bakame yakoze akazi gakomeye akuramo imipira yari yabazwemo ibitego. Igice cya mbere cyarangiye amakipe aganya 0-0.

JPEG - 179.5 kb
Rutahizamu Tidiane Kone wahesheje Rayon Sports amanota 3 nyuma yo gutsinda igitego ikipe ya Bugesera FC (Foto Bugingo F.)

Mu gice cya kabiri, Rayon Sports yinjije mu kibuga Nshuti Xavio asangamo rutahizamu Kone wari wasimbuye Rwatubyaye wari wagize ikibazo cy’imvune mu gice cya mbere. Mu ninota 15 y’igice cya kabiri Rayon Sports yasatiriye Bugesera FC maze ku munota wa 63 ku mupira mwiza wari uhinduwe na Moussa Camara usanga Tidiane Kone ahagaze neza ahita atera mu izamu ryari ririnzwe na Kwizera Janvier.

Bugesera ntabwo yacitse intenge yakomeje kotsa igitutu Rayon Sports ariko ba myugariro bayobowe na Munezero, Manzi na Mugabo ndetse n’umunyezamu Bakame babyitwaramo neza umukino urangira Rayon Sports ibonye amanota 3.

Nyuma y’umukino, umutoza wa Bugesera FC, Mashami Vincent yatangaje ko bari bakinnye neza ariko ba myugariro bagakora agakosa ko guhagarara nabi, Rayon Sports ikababonamo igitego. Yakomeje avuga ko mu mupira bibaho cyane.

Nshimiyimana Maurice usanzwe ari umutoza wungirije akaba ari we watoje nyuma y’aho umutoza Masudi Djuma yahagaritswe ubwo Rayon Sports yakinaga na Marines FC, yavuze ko bishimiye amanota 3 babonye kuko bari bayakeneye ngo bagume ku mwanya wa mbere.

Yavuze ko umukino utari woroshye ariko abakinnyi be bagerageje kubyitwaramo neza.

Nyuma yo kubona amanota 3, Rayon Sports yakomeje kuyobora urutonde rwa shampiyona n’amanota 45 ikaba isigaranye imikino 2 y’ibirarane. Ikurikiwe na APR FC n’amanota 41 naho Police FC na AS Kigali zigakurikiraho n’amanota 40.

Ikipe ya Rayon Sports igomba gukina na AS Kigali umukino w’umunsi wa 18 utarakiniwe igihe. Uyu mukino uzaba ku Cyumweru taliki 26 Werurwe 2017 kuri Sitade ya Kigali i Nyamirambo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE