2017-08-22 09:34:31 clouds 27o High | Kigali Rwanda

Dukurikire:
 
 

Rayon Sports irakina na Mukura umukino ushobora kuyihesha igikombe

Yanditswe na IMVAHO NSHYA

Kuya 2017-05-17 06:09:02

 
Share on:
 
Yasuwe:345
 
Yavuzweho:200
 
10
 
10

Ikipe ya Rayon Sports irakira Mukura mu mukino w’ikirarane ushobora guhesha iyi kipe igikombe cya shampiyona 2016-2017 uyu munsi tariki 17 Gicurasi 2017.

Ni umukino w’umunsi wa 24 wagombaga gukinwa tariki 23 Mata 2017 urasubikwa kuko ikipe ya Rayon Sports yari mu mikino ya Afurika y’amakipe yitwaye neza iwayo.

Ku ruhande rwa Rayon Sports batangaza ko biteguye uyu mukino kuko ufite byinshi uvuze. Niwutsinda irahita yegukana igikombe cya shampiyona 2016-2017.

Ubu Rayon Sports ifite amanota 64 ikaba ikurikiwe na APR FC ifite amanota 54. Ibi bivuze ko nibona amanota atatu ihita igira 67, APR FC itsinze imikino 4 isigaye yagira amanota 66 n’ubwo Rayon Sports yatsindwa iyo mikino isigaye nta cyo byahindura ku rutonde.

Rayon Sports na Mukura zisanzwe zihangana

JPEG - 448.2 kb
Abakinnyi ba Rayon Sports bashimira abafana bavuga ko ari bo bakesha kwitwara neza

Hari impamvu nyinshi zishobora gutuma uyu mukino uza kuba ukomeye. Umutoza wa Mukura, Ivan Minnaert bwa mbere aza mu Rwanda yatoje ikipe ya Rayon Sports nyuma y’igihe gito ayivamo ajya muri Kenya asimburwa na Masudi wari umwungirije nyuma agaruka ashaka kuyisubiramo biranga ajya muri Mukura.

Umutoza Masudi wahesheje iyi kipe igikombe cy’Amahoro umwaka ushize wa 2016 arifuza kwereka umutoza Ivan ko ashoboye.

Uretse abatoza baza kuba bahanganye, aya makipe akunze guhangana kuko yose akomoka mu ntara y’Amajyepfo. Iri hangana kandi riraza mu bakinnyi gusa ku ruhande rwa Rayon Sports ifite abakinnyi benshi bashya bakiri bato barifuza gutwara igikombe cya shampiyona.

Umutoza wungirije wa Rayon Sports, Nshimiyimana Maurice yatangaje ko uyu mukino bawuhaye agaciro kuko ari wo uza kubaha ibyo bavunikiye uyu mwaka wose. Gusa umutoza wa Mukura, Ivan Minnaert ntabwo yishimiye uburyo uyu mukino washyizwe uyu munsi kuko atifuzaga ko Rayon Sports yamutsinda ngo imutwarireho igikombe.

Kuva 2013 ntabwo Mukura iratsinda Rayon Sports

Imyaka igiye kuba 4, Mukura itabasha gukura amanota 3 kuri Rayon Sports, mu mikino 7 aya makipe amaze gukina, Rayon Sports yatsinze imikino 4 indi 3 aya makipe aranganya. Umukino uheruka wa shampiyona wabereye i Huye, izi kipe zanganyije igitego 1-1.

Muri uyu mwaka w’imikino Rayon Sports yarigaragaje aho mu mikino 25 ya shampiyona yatsinze 20, inganya 4 itsindwa umukino umwe. Yinjije ibitego 55 yinjizwa 14 naho Mukura mu mikino 25 yatsinze 8, inganya 8 itsindwa 9, yinjije ibitego 23 yinjizwa 30 bivuze ko ifite umwenda w’ibitego 7.

Mu ikipe ya Rayon Sports uretse Irambona Eric, Mutsinzi Ange na Sibomana Abouba bafite imvune, abandi bakinnyi barimo Yves Rwigema, Rwatubyaye Abdoul, Nahimana Shassiri bari bafite imvune bashobora kugaragara ndetse na Moussa Camara wari wahawe ibihano.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE