2017-08-22 09:34:31 clouds 27o High | Kigali Rwanda

Dukurikire:
 
 

Rayon Sports irakina na Gicumbi FC, umukino uyiganisha ku gikombe

Yanditswe na IMVAHO NSHYA

Kuya 2017-05-02 07:56:30

 
Share on:
 
Yasuwe:131
 
Yavuzweho:200
 
10
 
10

Uyu munsi: Gicumbi FC-Rayon Sports
(Nyamirambo-15h30)

Ikipe ya Rayon Sports iyoboye urutonde rwa shampiyona irakina na Gicumbi FC, umukino uvuze byinshi kuko ari umwe mu mikino 3 iyi kipe ishobora gutsinda igahita itwara igikombe shampiyona itari yagera ku musozo.

Umukino w’umunsi wa 23 wagombaga kuba tariki 16 Mata 2017 urasubikwa kuko Rayon Sports yari ikiri mu mikino ya Afurika muri Nigeria gukina umukino ubanza na Rivers United.

Ubusanzwe Gicumbi FC ni yo yagombaga kwakira uyu mukino ukabera i Gicumbi gusa ariko ubuyobozi bwa Gicumbi FC busaba ko wabera i Kigali.

JPEG - 253.2 kb
Tidiane Kone (iburyo) niwe wahesheje Rayon Sports amanota atatu ku munsi wa 25 wa shampiyona (Ngabo R)

Uyu mukino urabera kuri Sitade ya Kigali i Nyamirambo ariko Gicumbi FC akaba ari yo iri bwakire uyu mukino. Ikipe ya Gicumbi FC irimo kurwana no kuva mu myanya ya nyuma aho ishobora gusubira mu cyiciro cya kabiri mu gihe ikipe ya Rayon Sports yo yifuza amanota 3 ngo ikomeze iyobore urutonde ndetse inongere amahirwe yo kwegukana igikombe shampiyona itarasozwa.

Mu mukino w’umunsi wa 25, Rayon Sports yatsinze Musanze FC igitego 1-0 cya Tidiane Kone. Ubu iyi kipe ifite amanota 58 naho ikipe iyikurikiye, APR FC, ifite amanota 51.

Bisaba ikipe ya Rayon Sports gutsinda imikino 3 gusa harimo n’uw’uyu munsi ubundi igahita itwara igikombe kuko yagira amanota 67 mu gihe APR FC yaramuka itsinze imikino 5 isigaranye yagira amanota 66.

Rayon Sports niramuka itsinze Gicumbi FC, izakurikizaho kwakira Kirehe FC ndetse na Mukura bagifitanye umukino w’ikirarane n’ubwo hataramenyekana igihe uzakinirwa cyangwa Pepiniere FC bazakina umukino w’umunsi 27.

Mu mukino wa shampiyona uheruka, Gicumbi FC yatsinze Amagaju FC igitego 1-0 naho Rayon Sports itsinda Musanze FC gitego 1-0. Mu mukino wa shampiyona ubanza, Rayon Sports yatsinze Gicumbi FC ibitego 5-2.

Rayon Sports yagaruye Masudi Djuma wari warahanwe gusa iraba idafite rutahizamu Moussa Camara watorotse akajya mu igeragezwa i Dubai.

Imikino y’umunsi wa 25 yabaye

Mu mpera z’icyumweru gishize hakinwe imikino y’umunsi wa 25, aho AS Kigali yatsinze Pepiniere ibitego 2-1, Espoir FC ikanganya na Etincelles FC 0-0, Mukura itsinda Bugesera FC ibitego 2-1, Marines FC itsinda Kirehe FC ibitego 2-1 naho Police FC inganya na APR FC igitego 1-1.

Kugeza ubu, Rayon Sports irayoboye n’amanota 58 n’imikino ibiri y’ibirarane, ikurikiwe na APR FC n’amanota 51, ku mwanya wa 3 hari Police FC ifite amanota 48 naho ku mwanya wa nyuma hari Pepiniere FC n’amanota 12.

Usengimana Danny ni we ukomeje kuyobora abamaze gutsinda ibitego byinshi (16).

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE