2017-06-28 15:02:12 clouds 27o High | Kigali Rwanda

Dukurikire:
 
 

Nyuma y’imyaka ibiri Rayon Sports yongeye gutsinda APR FC

Yanditswe na IMVAHO NSHYA

Kuya 2016-05-04 03:12:00

 
Share on:
 
Yasuwe:1
 
Yavuzweho:200
 
10
 
10

Ikipe ya Rayon Sports nyuma y’imyaka isaga ibiri itabasha gutsinda APR FC yabigezeho iyitsinda ibitego 4-0 mu mukino w’umunsi wa 21 wa shampiyona.

Muri uwo mukino wabereye kuri Sitade Amahoro i Remera, ikipe ya Rayon Sports ni yo yatangiye neza ibona igitego ku munota wa 9 gitsinzwe na Davis Kasirye .

Rayon Sports bigaragara ko yari yaje yiteguye yakomeje kotsa igitutu ikipe ya APR FC ku munota wa 33, Davis Kasirye yongera gutsinda igitego 2 ari nako igice cya mbere cyarangiye.

JPEG - 319.5 kb
Abakinnyi ba Rayon Sports mu byishimo nyuma yo gutsinda APR FC baherukaga gutsinda muri 2014 (Foto Gentil).

Mu gice cya kabiri, APR FC yaje ishaka kwishyura aho yakoze impinduka ishyiramo Ntamuhanga Tumaine asimbuye Sibomana Patric Papy. Gusa ntibyabahiriye kuko ku munota wa 46, Ismaila Diarra yatsinze igitego cya 3 cya Rayon Sports.

Ibi ntibyaciye intege abakinnyi ba APR FC kuko bakomeje gusatira bashaka uko bakwishyura ariko umukino ujya kurangira ku munota wa 88, Davis Kasirye atsinda igitego cya 4 cyabaye icya 3 yatsinze muri uyu mukino.

Nyuma yo gutakaza umukino wabaye n’amateka kuri aya makipe yombi kuko ni inshuro ya gatatu atsindanye ibitego 4-0, umutoza wa APR FC Nizar Khanfir yatangaje ko Rayon Sports yamurushije ikamutsinda.

Avuga ko bakoze amakosa bituma batsindwa ariko ko bagiye kugira ibyo bakosora kuko hakiri imikino ya shampiyona. Gusa yagaye ba rutahizamu be batabashije kubyaza umusaruro bumwe mu buryo babonye bwari kuvamo ibitego.

Ikipe ya Rayon Sports nyuma yo gutsinda APR FC yakomeje kuba ku mwanya wa kabiri n’amanota 45 inyuma APR FC ifite amanota 46, gusa Rayon Sports iracyafite umukino w’ikirarane. Umutoza wa Rayon Sports wanakiniye aya makipe yombi yagize ati “Ndishimye cyane ku buryo numva nta bintu byinshi byo kuvuga”.

Rayon Sports yaherukaga gutsinda APR FC muri Werurwe 2014, imyaka ikaba yarishize ari ibiri batabasha gutsinda APR FC. Muri 2013 Rayon Sports yatsinze APR FC ibitego 4-0 naho umwaka ushize wa 2015, APR FC nayo itsinda Rayon Sports ibitego 4-0.

Indi mikino yabaye

Indi mikino y’umunsi wa 21 yabaye, Bugesera yatsinze Rwamagana City FC igitego 1, Amagaju atsinda Musanze FC igitego 1-0, Espoir FC itsinda Marines FC igitego 1-0, Kiyovu yari imaze iminsi yitwara neza itsindwa na AS Kigali igitego 1-0, Mukura itsindwa Gicumbi FC ibitego 3-0 naho AS Muhanga itsinda Etincelles FC ibitego 3-1.

Uyu munsi haraba umukino umwe

Umukino usoza umunsi wa 21 w’imikino urahuza ikipe ya Police FC imaze iminsi ititwara neza na Sunrise FC. Uyu mukino urabera kuri Sitade ya Kigali i Nyamirambo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE