2017-12-10 12:22:00 clouds 27o High | Kigali Rwanda

Dukurikire:
 
 

Nshimiyimana arateganya kongera guhuza abahoze bakinira Amavubi

Yanditswe na IMVAHO NSHYA

Kuya 2017-08-03 10:12:26

 
Share on:
 
Yasuwe:104
 
Yavuzweho:200
 
10
 
10

Nshimiyimana Canisius wahoze ari myugariro w’ikipe y’igihugu Amavubi yagiye mu gikombe cy’Afurika “CAN 2004” arateganya kongera guhuza abo bahoze bakinana.

Ibi azabikora mu kumurika igitabo cye yise ’’Inkuru yanjye: Kuva ku kibuga cya Nyabidihi (mu cyaro cy’icyarwa i Butare) ukagera kuri Rades Stadium (muri Tuniziya)”

Ni igitabo kigizwe n’impapuro 122 kivuga ku ntangiriro y’umupira we mu buryo bugoye, amafaranga yahembwaga, ibihe byiza yagiriye muri Mukura, kujyana n’Amavubi muri CAN 2004, urugendo rwo gusezera umupira, kwinjira mu butoza n’ibindi byinshi.

JPEG - 374.6 kb
Nshimiyimana Canisius ugiye gusohora igitabo kivuga ku mateka ye mu mupira w’amaguru

Aganira n’Imvaho Nshya avuye mu kigo cy’igihugu cy’iterambere (RDB) kwandikisha iki gitabo, Nshimiyimana yemeje ko yavuganye na bamwe mu bo babanye mu Mavubi abasaba kuzamufasha kumurika igitabo cye binyuze mu mukino wa gicuti wazabahuza na Mukura kuri Sitade Huye.

Yagize ati “Ni igitekerezo nagejeje kuri ba Karekezi, Katauti, Ramazhan (ubu bari mu Rwanda batoza Rayon Sports) barabyishimira cyane. Nabwiye ba Mulisa, ba Muvunyi Fils bose numva barabyakiriye.”

“Njye ubundi nifuza ko twakina na Mukura nk’ikipe yangize uwo nabaye we, uwo mukino ukaba nyuma ya 15 Kanama 2017 kuko aribwo Mukura izatangira imyitozo ariko nkanabikora nshaka kwereka no gukundisha ab’iwacu iki gitabo’’.

Nshimiyimana yavuze ariko ko iki gitabo cye kigiye gutangira kujya ku isoko kuva kuri uyu wa Gatanu, tariki 04 Kanama 2017 n’ubwo kizamurikwa ku mugararo muri uwo mukino.

Ati “Ni ukuri nabishobojwe n’Imana, ni igitekerezo nagize nshaka kwereka abana b’ubu uko twari tubayeho, nanashakaga kandi kutibagiza abantu bamwe mu bantu b’ingenzi umupira w’u Rwanda wagize. Kuba rero mbishoboye ndabishimira Imana’’.

Nshimiyimana yatangiye gukina muri 1996 aza guhagarika mu 2009 nyuma y’imyaka 13 muri Mukura.

Agiye guhuza aba bahoze bakinira Amavubi mu gihe baherukaga guhura tariki 30 Kamena 2016 mu mukino wa gicuti wabahuje n’abakanyujijeho muri Uganda birangira u Rwanda rutsinze ibitego 5-3.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE