2017-08-18 14:28:59 clouds 27o High | Kigali Rwanda

Dukurikire:
 
 

Nakoze ikosa ryo kuba uwa mbere wijeje Abanyarwanda kujya muri CAN - McKinstry

Yanditswe na IMVAHO NSHYA

Kuya 2016-06-06 06:17:40

 
Share on:
 
Yasuwe:4
 
Yavuzweho:200
 
10
 
10

Umutoza w’Amavubi Jonathan Mckinstry asanga yarakoze ikosa ryo kuba umutoza wa mbere wijeje Abanyarwanda kuzabajyana mu mikino nyuma y’imyaka 12.

Ibi uyu mutoza yabitangaje nyuma y’uko Amavubi atsinzwe na Mozambique ibitego 3-2 i Kigali, bigahagarika indoto zo kwerekeza muri CAN 2017 izabera muri Gabon, bikanavugwa ko Mckinstry ashobora gusezererwa.

Abajijwe ku cyo avuga ku kuba ashobora gutakaza akazi ke, Mckinstry yavuze ko bidashoboka, anaboneraho kubwira abanyarwanda ko yakabije ubwo yabaga umutoza wa mbere wiyemeje kujyana Amavubi muri CAN.

JPEG - 260.8 kb
Jonathan McKinstry yishinja ikosa ryo kwizeza Abanyarwanda mbere ko Amavubi azajya muri CAN 2017

Mckinstry yagize ati "Kwirukanwa ntibishoboka. Mwibuke nkigera mu Rwanda ni njye muntu wavugaga ko tuzajya muri CAN, abantu bose bavuga ko u Rwanda rutajya rujya muri CAN, bambwira ko nihaye intego zirenze, birashoboka ko nakabije nanjye koko!. Gusa sinemera intego zidafatitse, mba ndota kugera kure.

Twagiye muri CHAN 2016 tuvuga ko tuzarenga itsinda, twarabikoze tugera muri ¼, mvuga ko dushobora kubona itike ya CAN, abantu ngo ntibishoboka. Bimwe twabigezeho ibindi byaranze, birashoboka ko ari ikosa ryanjye wihaye intego zisumbuyeho cyane".

Mckinstry yanavuze ko muri uru rugendo rwo gushaka itike ya CAN 2017, Amavubi yazize kutabyaza umusaruro uburyo bwinshi yakunze kubona imbere y’izamu, yaba mu mukino batsinzwe na Mauritius igitego 1-0 muri Werurwe 2016 n’uwa Mozambique wabaye ku wa Gatandatu taliki 04 Kamena 2016.

Yagize ati "Ikipe ni nziza gusa iracyabura kuba ikipe y’ubukombe. Twagiye muri Mauritius dutakaza uburyo bwinshi bw’imbere y’izamu, tuza hano kuri Mozambique bigenda uko. Ikindi iyi kipe iracyari nto, abantu benshi baracyafite imyaka itanu cyangwa se itandatu mu Mavubi, nibinyura mu bunararibonye bazabona nzi ko bazakomeza gukura".

Umutoza w’Amavubi yavuze ko nyuma yo kutajya muri CAN 2017, agiye kwicarana na Minisiteri y’Umuco na Siporo muri iki cyumweru, bakareba niba agiye gutegura ikipe izahatanira itike ya CHAN 2018 cyangwa na CAN 2019 ku buryo ari ho yakwibanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE