2017-09-23 09:22:12 clouds 27o High | Kigali Rwanda

Dukurikire:
 
 

Murenzi Abdallah yiseguye ku bashakaga ko yiyamariza kuyobora FERWAFA

Yanditswe na IMVAHO NSHYA

Kuya 2017-07-11 07:29:41

 
Share on:
 
Yasuwe:578
 
Yavuzweho:200
 
10
 
10

Murenzi Abdallah washakaga gutangwa n’itsinda ry’abifuza impiduka mu mupira w’amaguru nk’umukandida wo kwiyamamariza kuyobora ishyirahamwe ry’umupira w’amaguru mu Rwanda “FERWAFA” yavuze ko atakiyamamaje kuri uyu mwanya.

Ni nyuma yo kubisabwa n’abo muri iri tsinda na we abaha icyumweru kimwe cyo kubyigaho kugira ngo ategure neza imigabo n’imigambi yari kuranga manda ye mu gutanga umusanzu wo kubaka umupira w’amaguru w’u Rwanda.

Ejo hashize ku wa Mbere tariki 10 Nyakanga 2017, Murenzi wahoze ayobora Akarere ka Nyanza yabwiye Imvaho Nshya ko atakiyamamaje ku mpamvu z’imirimo myinshi irimo afite ijyanye n’ubucuruzi bwe bugiye kurenga imbibi z’u Rwanda atiteguye kureka.

Yagize ati “Nasanze ntiteguye ndabizi bizaca intege benshi ariko bagomba kunyumva. Mfite akazi kenshi, ubu nabonye abantu b’abafatanyabikorwa tuzajya dukorana bo hanze, bashatse kunyongerera imbaraga tugakorana kuko bashaka gushora imari mu Rwanda. Nta bwo byankundira kuko ntiteguye kugurana aya mahirwe kandi murabizi ko kuba muri federasiyo ugomba kuba uhari buri gihe kubera ibibazo bihora mu mupira’’.

JPEG - 79 kb
Murenzi Abdallah

Murenzi yasoje asaba abari bamugiriye iki cyizere ko yiteguye gutanga umusanzu we w’ibitekerezo n’undi yasabwa ariko bakamwemerera akabasha gukora ibi bikorwa birimo kwaguka.

Ibi abivuze mu gihe mu byumweru bibiri bishize yari yabwiye Imvaho Nshya ko yumva mu Rwanda hakwiye impinduka mu buyobozi bwa FERWAFA kuko umupira ari rwo rwego rudatera imbere ugereranyije n’izindi nzego. Icyo gihe yacaga amarenga y’uko yiteguye guhangana na Nzamwita Vincent De Gaulle, umuyobozi wa FERWAFA witeguye kwiyamamariza manda ya kabiri.

Kuri ubu uruhande rw’abifuza impinduka rutabashije kuvugana n’Imvaho Nshya rukaba rugomba gushaka umukandida uzasimbura Murenzi mu gihe komisiyo itegura amatora ya FERWAFA igaragaza ko kuva tariki 10 Nyakanga 2017 kugeza ku ya 15 Nyakanga 2017 hazatangira kwakirwa kandidature z’abiyamamaza, abazaba bemerewe batangazwe tariki 05 Kanama 2017 maze kwiyamamaza bitangire kuva tariki 14 Kanama 2017 kugeza ku ya 09 Nzeli buri bucye haba amatora.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE