2017-08-20 07:43:19 clouds 27o High | Kigali Rwanda

Dukurikire:
 
 

Mukangamije , umukecuru ukina Basketball arakangurira abagore gukunda Siporo

Yanditswe na IMVAHO NSHYA

Kuya 2017-08-07 11:44:53

 
Share on:
 
Yasuwe:1195
 
Yavuzweho:200
 
10
 
10

Mukangamije Triphine w’imyaka 61, utuye mu kagari ka Bwiza, umurenge wa Nyamirama, Akarere ka Kayonza, arakangurira abagore n’urubyiruko gukunda no kwitabira siporo kuko uwakoze siporo adashobora gusaza imburagihe.

Mu kiganiro n’Imvaho Nshya, uyu mubyeyi ukina umukino wa Basketball, yavuze ko siporo ari umuti ikaba n’urukingo rw’indwara nyinshi, kuko hari indwara yakize kuva yitabiriye gukora siporo.

Yagize ati “ Ndi umukecuru ukina, maze hafi umwaka nkina umukino wa Basketball, ariko indwara nari mfite zarakize, nababaraga imitsi cyane yaranyishe, ariko aho ntangiriye gukina numva nkomeye meze neza, iyo nasibye gukina birambangamira.”

JPEG - 81 kb
Mukangamije ntaterwa ipfunwe no gukina Basketball

“Ubu natangiye no gushishikariza abandi kwitabira siporo, natangiye gukina nta bakuze barimo ariko narabakuruye baraza, babonye nabo babishobora, abo maze kuzana dukinana ni benshi kandi bagenda bampa ubuhamya bw’uko bakize; bamwe bari barwaye imigongo, abandi barwaye imitsi. Abakiri bato na bo ngenda mbashishikariza gukina.”

Avuga ko azi no kugorora umubiri agakora siporo n’abato bamwe badashobora.

Mukangamije asobanura bamaze gukora amakipe abiri y’abagore bakina, agereranyije bageze nko mu ijana. Umukino wabo ugenda
utera imbere kuko bigeze gukina n’abandi bo mu wundi murenge barabatsinda batahana igikombe.

Mukangamije avuga ko mu ikipe arimo ari we mukuru urimo, akaba yarabereye icyitegererezo abandi bagore bakuze
kuko bamubonye akina bumva na bo bagize ishyaka ryo gukina.

Uretse kuba akina Basketball azi no koga cyane kuko byo yabitangiye akiri muto, gusa nta marushanwa yigeze ajyamo.

Ibyo koga yaje kubihagarika kubera abiburiye umwanya, ariko atangiye kurwara imitsi, yahise yumva ko ari ya siporo yabyirutse akora yabuze, ni ko kongera kuyibyutsa.

Ygarutse kuri i bamwe mu bagore batinya kujya mu kibuga kubera kugira isoni, bumva ko batabona n’imyenda bakina bambaye, abakangurira kureka iyo myumvire kuko hari imyenda bashobora kwambara igatuma bumva badafite ipfunwe kandi ntibabangamire bakina.

Avuga ko iyo ari mu kibuga yambara ipantaro yoroheje ikweduka (colant)
akarenzaho umupira n’igitenge ariko akagikenyera ari kigufi kugira ngo kitamutega.

Ati “ imyenda bari bampaye yo gukinana natinye kuyambara kuko ndi umukecuru, ariko nashatse uburyo bwo kwambara butantera ipfunwe.

Ishyirahamwe ry’Umupira wa Basketball mu Rwanda “FERWABA” n’umuryango w’Abanyamerika utegamiye kuri Leta “Shooting Touch”, nibo bateguye igikorwa cyo gushishikariza no kwigisha abagore gukunda no gukina umukino w’intoki wa Basketball.

TUMUKUNDE GEORGINE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE