2017-06-28 15:02:12 clouds 27o High | Kigali Rwanda

Dukurikire:
 
 

Muhadjiri yiteguye gusubira muri AS Kigali

Yanditswe na IMVAHO NSHYA

Kuya 2017-06-13 06:15:48

 
Share on:
 
Yasuwe:343
 
Yavuzweho:200
 
10
 
10

Hakizimana Muhadjiri aremeza ko igihe cyose yasabwa gusubira mu ikipe ya AS Kigali azabyakirana umutima mwiza. Uyu musore yari yaguzwe na AS Kigali mu mpera ya shampiyona ya 2015-2016 ariko ahita atizwa muri APR FC mu gihe cy’umwaka umwe.

Akigera muri APR FC yarigaragaje atorwa nk’umukinnyi w’irushanwa ryo kwitegura shampiyona ryari ryateguwe na AS Kigali. Iki kiba ikimenyetso cyo kwerekana ko yashoboraga kongera kugira ibihe byiza nk’uko byari byagenze mu mwaka wabanje aho yatsindiye Mukura VS ibitego 16 anaza mu batsinze ibitego byinshi muri shampiyona ya 2015-2016.

Hakizimana yatangiye agerageza kwitanga, taliki 11 Mutarama 2017 agira imvune amara amezi atatu, yongera kugaruka mu kibuga muri Mata 2017 ubu akaba afite ibitego bitanu arushwa bibiri na Issa Bigirimana, rutahizamu rukumbi APR FC igenderaho.

JPEG - 292.1 kb
Hakizimana Muhadjiri witeguye gusubira muri AS Kigali nyuma y’umwaka umwe yari amaze muri APR FC

Nyuma y’umwaka umwe, ubuyobozi wa AS Kigali binyuze kuri Nshimiye Joseph, umunyamabanga wayo bwemeza ko bagomba gusubirana umukinnyi wabo.

Uyu mwaka ntiwamugendekeye neza

Mu kiganiro n’Imvaho Nshya imusanze, Hakizimana yavuze ko atahiriwe n’umwaka amaze muri APR FC.

Ati “Ntabwo navuga ngo uyu mwaka wabaye mwiza kuko ibitego byabuze gusa nagize imvune kandi urabizi iyo ukize mvune biba bisaba gukora cyane kuko uba warasubiye hasi. Naragarutse nkora ibishoboka’’.

Abajijwe ku hazaza he, yavuze ko azakora icyo abayobozi be bazamubwira, gusa aca amarenga ko yiteguye gusubira muri AS Kigali.

Ati “Njye sinakubwira ngo ndifuza kuzakina aha, njye mba ndi mu kazi nibaza ko uko bizagenda kose nzakora akazi kanjye bisanzwe kuko ikipe zose ziba ari ikipe kuko hose ushobora kuhagirira amahirwe kandi urabizi ntabwo uba uteganya kuguma hano mu Rwanda. APR FC ni ikipe nziza kuruta AS Kigali ariko na AS Kigali simbi kuko hari abakinnyi benshi igenda izamura.Uko bizagenda kose njye nzabyakira’’.

Biravugwa ko uyu musore azahitamo kwisubirira muri AS Kigali aho kuguma muri APR FC, ikipe afata nk’iy’igitutu.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE