2017-10-16 07:05:01 clouds 27o High | Kigali Rwanda

Dukurikire:
 
 

Mu Rwanda hari abana bafite impano ariko ntibategurwa neza-Rubona

Yanditswe na Amani

Kuya 2017-04-26 09:13:13

 
Share on:
 
Yasuwe:151
 
Yavuzweho:200
 
10
 
10

Umutoza w’ishyuri ry’umupira w’amaguru ry’ikipe ya APR FC, Rubona Emmanuel atangaza ko mu Rwanda hari abana bafite impano mu mupira w’amaguru ariko bakaba badategurwa neza.

JPEG - 370.3 kb
Umutoza Rubona Emmanuel wemeza ko mu myaka iri imbere ishuri rya APR FC rizaba ritanga abakinnyi bakomeye mu ikipe ya APR FC nkuru ndetse no mu yandi makipe (Foto Bugingo F)

Uyu mutoza ibi yabitangarije Imvaho Nshya ku wa Mbere tariki 24 Mata 2017 ubwo yasuraga imyitozo y’abana bari muri Academy ya APR FC. Nyuma y’imyitozo, umutoza w’aba bana, Rubona Emmanuel yatangaje ko ubu bafite abana 36 baba hamwe, biga hamwe ndetse bakanakorera imyitozo hamwe.

Rubona akaba yaratangaje ko intego y’iri shuri ari ukuzamura urwego rw’aba bana bakabafasha kugira ngo mpano zabo bazikoreshe neza. Ati “Abana bafite impano ariko ntibategurwa neza. Gutegurwa neza ni ukumenya umwana yariye ate? yaryamye ate?, ese ariga cyangwa se ntiyiga, ibyo byose ni ibintu uba ugomba kumenya igihe utegura umwana”.

Yakomeje agira ati “Intego yacu rero ni ugufasha aba bana kugira ngo ejo n’ejobundi bazabe bakinira APR FC ndetse n’andi makipe yabyifuza kuko bose ntitwabagumana nyuma bakaba bagera no mu ikipe y’igihugu ndetse no hanze y’u Rwanda”.
Mu 2014 ni bwo aba bana batangiye muri iri shuri nyuma y’uko batoranyijwe bavuye mu ntara zose. Kugeza ubu umusaruro w’iri shuri ukaba waratangiye kugaragara aho abakinnyi 2, Nshuti Innocent na Tuyishime Eric ubu bazamuwe mu ikipe nkuru ya APR FC.

Mu Rwanda ubu bafasha gahunda yo kuzamura imikino biheye mu bakiri bato, umutoza Rubona avuga ko abanyarwanda bakunda imikino gusa ikibura ari ubushobozi nk’ibibuga, ibikoresho bigezweho n’ibindi. Ati “Minisiteri zibishinzwe na FERWAFA bakwiye kugira icyo bakora naho ubundi abana bafite impano bo barahari”.

Rubona wanaciye mu ikipe ya APR FC nkuru aho yatwaranye nayo igikombe cya shampiyona 2015-2016 atangaza ko aba bana yatangiye abigisha uburyo bwo kotsa igitutu ikipe bahanganye, ubu akaba arimo kubigisha uko bagumana umupira bagasatira bose hamwe bakanazibira bari kumwe.

N’ubwo aba bana bagaragaza ko hari icyo bamaze kwiyungura, Rubona atangaza ko bataragera ku rwego yifuza. Ati “Urebye bari ku rwego rwiza ariko ntibaragera ku rwo nifuza”.

Ishuri ry’umupira w’amaguru rya APR FC ririmo abana 36 bari mu byiciro 3 by’imyaka, abari mu kigero cy’imyaka 17-18, abari mu myaka 16 ndetse n’abafite hagati y’imyaka 13-15. Aba bana bose bakaba biga muri APE Rugunga.
Kuko aba bana bose ari abanyeshuri bakora imyitozo mu kibuga kuva ku wa Mbere kugeza ku wa Kane nyuma ku wa Gatanu no ku wa Gatandatu bagakora imyitozo yo kongera ingufu biruka mu misozi, ubundi ku Cyumweru bakaruhuka, bagasubira no mu masomo.

Kugeza ubu mu Rwanda nta shampiyona z’abana zihari, Rubona avuga ko rimwe na rimwe bakina imikino ya gicuti cyangwa se ikipe nkuru yaba yakinnye bakabona ikipe, bakina mbere yayo.

JPEG - 290 kb
Imyitozo bakora harimo ko kwiruka
JPEG - 223.6 kb
Aba bana bagaragaza ko bishimye
JPEG - 309.5 kb
Bakora n’imyitozo yo kugorora ingingo

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE