2017-08-19 07:41:08 clouds 27o High | Kigali Rwanda

Dukurikire:
 
 

Mico yahakanye ibyo kwerekeza muri APR FC

Yanditswe na IMVAHO NSHYA

Kuya 2017-06-14 11:38:55

 
Share on:
 
Yasuwe:309
 
Yavuzweho:200
 
10
 
10

Rutahizamu w’ikipe ya Police FC, Mico Justin aravuga ko igenda rya mugenzi we Usengimana Danny ritazigera riteza icyuho mu ikipe yabo anaboneraho guhakana amakuru yavugaga ko ari mu biganiro na APR FC.

Mu cyumweru gishize byavugwaga ko habayeho ibiganiro byahuje ubuyobozi bwa APR FC n’uyu musore, birangira byemejwe ko Mico agomba kuzakinira APR FC mu mwaka utaha atanzweho miliyoni 13 harimo eshatu zizahabwa Police FC afitiye amasezerano y’umwaka umwe.

Kwerekeza muri APR FC kwa Mico biri mu nzira zo kongera imbaraga mu busatirizi bagura rutahizamu ugezweho w’umunyarwanda uzanasimbura Hakizimana Muhadjiri, APR FC yari yatijwe na AS Kigali ariko ugomba gusubira mu ikipe ye nyuma yo kudatanga umusaruro yari ategerejweho.

JPEG - 245 kb
Mico Justin utangaza ko yiteguye gufatanya na bagenzi be kuziba icyuho cya Usengimana Danny

Impande zombi zihakana aya makuru y’ibi biganiro. Umuvugizi wa APR FC Kazungu Claver aganira n’Imvaho Nshya yagize ati ’’Usibye na Mico, abantu bavuga ko dushaka na Nshuti Xavio na Manzi Thierry ba Rayon Sports Ibyo si byo. Nta mukinnyi APR FC iri kuvugana na we. Ikindi Mico we aracyafite umwaka muri Police FC, rero iby’ibyo biganiro njye simbizi’’.

Mico Justin aganira n’Imvaho Nshya kuri iyi ngingo na we yagize ati ’’Kugeza ubu nta kintu mbiziho. Njye ndacyari umukinnyi wa Police FC, ibindi mbyumva gutyo. Naho njye nta muntu turavugana’’.

Nta cyuho Usegimana azasiga

Muri iki kiganiro, Mico yakomeje avuga ko yishimiye ko mugenzi we Usengimana Danny yabonye ikipe ikomeye ya Singida yo muri Tanzania aho bizatuma azamura urwego rwe.

Ati ’’Umutoza Seninga Innocent, njye na Usengimana Danny yaduhaye icyizere atubwira ko tugomba kubona ibitego, binadufasha njye na we kumvikana ku buryo twari tuziranye cyane. Usengimana Danny yari umukinnyi mwiza uzi gutsinda, kujya ku ikipe yisumbuyeho ni ibintu twese byadushimishije’’.

Mico agaragaza ko n’ubwo yari umukinnyi mwiza bitazabuza ko baziba icyuho cye.

Ati ’’Nta kibazo gihari kuko hari n’abandi bahari. Ndumva bitazatugora, icya mbere ni ugukora imyitozo. Tuzashaka abandi kandi na byo bizakunda’’.

Uguhuza no kumenyerana kwa Usengimana Danny na Mico Justin bigaragazwa n’uko bombi batsinze 67% by’ibitego bya Police muri shampiyona y’uyu mwaka w’imikino 2016-2017.

Ni ukuvuga 18 kuri Usengimana Danny na 13 kuri Mico Justin bikaba ibitego 31 muri 46 byose Police FC imaze kwinjiza.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE