2017-08-23 07:41:18 clouds 27o High | Kigali Rwanda

Dukurikire:
 
 

Menya byinshi kuri Ngarambe, kapiteni w’ikipe y’igihugu ya Karate

Yanditswe na IMVAHO NSHYA

Kuya 2017-05-15 08:11:55

 
Share on:
 
Yasuwe:550
 
Yavuzweho:200
 
10
 
10

Ngarambe Vanily ni umwe bakinnyi b’ikipe y’igihugu ya Karate akaba ari na kapiteni. Yanditse amateka yo gukubita umunya Armenia amanota ane ku busa mu gikombe cy’Isi, undi aza kumwigaranzura aranamutsinda, bitewe no kwishimira intsinzi hakiri kare.

Ngarambe yabaye uwa gatatu muri shampiyona y’Afurika yerekana ko u Rwanda rushobora kuba urwa mbere muri Afurika habayeho kwitegura bikwiye. Mu kiganiro kirambuye yagiranye n’Imvaho Nshya yatangaje byinshi ku buzima bwe n’icyerekezo afite muri Karate anagaragaza imbogamizi abakina uyu mukino bahura nazo.

Ngarambe ni muntu ki?

JPEG - 204.1 kb
Ngaramba yemeza ko u Rwanda rushyize ingufu muri Karate rwaba urwa mbere muri Afurika

Yabonye izuba taliki 05 Nyakanga 1993 i Goma aho ababyeyi be bari barahungiye. Ni umwana wa kabiri mu muryango w’abana batatu (abahungu babiri n’umukobwa wapfuye) ba Ngarambe Laurent na Nyarwaya Louise nabo bakaba barapfuye.

Yize amashuri abanza kuri ’’Le Pigeonier’’ mu Mujyi wa Butare, yiga amashuri yisumbuye mu Iseminari nto, PSVF-Karubanda i Butare kuva mu 2006 kugeza mu 2012. Akirangiza yabonye buruse ya Siporo yo kwiga iby’ubucungamari muri Kampala International University amarayo umwaka aza kugaruka mu Rwanda kwiga kuri Buruse ya Leta mu cyahoze ari KIST mu bumenyi bw’amazi ’’Water and Environment Engineering”.

Yinjiye muri Karate ashaka kujya akubita abana bamwiyenzagaho

Mu buhamya bwe Ngarambe agaragaza ko yatangiye kujya muri Karate mu 2003, abikundishijwe n’abandi bana bamubonagamo impano na Papa we wakinnye uyu mukino.

Ngarambe avuga ko yabaye umukinnyi uhoraho amaze kugera mu iseminari yo ku Karubanda ahari ikipe ikomeye irimo umukinnyi ufite umukandara w’umukara, ibitari bikunze kubaho mu mashuri yisumbuye.

Ati ’’Haba mu mashuri abanza n’ayisumbuye nize ndi umwana muto kandi abana bato bakunda kubasagarira. Njye naravuze nti reka nige ikintu kizajya gituma nirwanaho. Binakubitiraho ko no mu mashuri abanza njye na mukuru wanjye twagiraga amahane, iyo hagiraga udukoraho twakoraga ibara,ariko njye nkisunga mukuru wanjye kuko iyo wancaga urwaho ntari na mukuru wanjye warankubitaga bya bindi byiza. Ariko ibyo nibwiraga siko byagenze kuko sinongeye kurwana kubera ikinyabupfura batwigisha muri Karate’’.

Mu mwaka wa mbere, yahawe umukandara wa Orange asimbuka uw’umuhondo kuko yari umuhanga mu myiyerekano (Kata) kuko yari akiri muto kandi agaragaza imbaraga kuruta bagenzi be ariko agitinya kurwana. Uyu musore kuri ubu ufite ’’Dani’’ ebyiri, yabonye umukandara w’umukara mu 2011.

Ibihe bitaziganirana kuri we

Mu mpera za 2011, Ngarambe yahamagawe mu ikipe y’igihugu y’ingimbi yiteguraga kujya mu gikombe cy’isi cy’abatarengeje imyaka 21 cyabereye muri Malysia ariko ntiyabona uruhushya rwo mu iseminari kuko ibizamini bisoza umwaka byari bigiye gutangira.

Mu 2012 yabaye uwa mbere mu mikino ihuza amashuri yose yo mu gihugu, bimuhesha amahirwe yo guhamagarwa mu ikipe y’igihugu nkuru yazanye umwanya wa gatatu mu mikino y’akarere ka gatanu yabereye i Burundi.

Mu 2013, yitabiriye igikombe cy’Afurika cy’ingimbi muri Tunizia yegukana umwanya wa gatatu abona itike yo kujya mu gikombe cy’isi muri Espagne yishyuriwe buri kimwe n’ishyirahamwe ry’uyu mukino ku isi.

Ngarambe yagize ati ’’Byari bigoye gukina n’umwana wahereye ku myaka 12 weho mugahura waratangiye ufite imyaka 19. Nkanjye umukino wa mbere nahuye n’umuyapani ariko yarankubise ndumirwa, naravuze nti Karate ndayiretse”.

Nyuma yo gukubitirwa ku busa, Ngarambe yaraje ashyira imbaraga ze muri Karate, gusa bimugiraho ingaruka zo gusibira mu mwaka wa mbere wa Kaminuza. Izi mbaraga ariko zatanze umusaruro kuko mu 2014 yabonye umwanya wa kane muri shampiyona y’Afurika mu bakinnyi bakuru muri Senegal, aba umukinnyi w’umwaka wa gatanu muri Afurika mu mwaka wose.

Nyuma yo kwitwara neza muri Senegal, Ngarambe yabonye itike yo kujya mu gikombe cy’isi mu Budage mu bakuru atombora umunya Armenia yashoboraga gutsinda iyo hatazamo kwirara.

Yagize ati “Njye namubanje amanota ane nyuma antsinda atandatu, gusa habayeho kwishimira intsinzi umukino utararangira kuko n’umutoza byaramurenze arambwira ngo ni ibitangaza kubona umunyarwanda akora inota mu gikombe cy’isi kuko abandi kuva 2002 bajyagayo bagataha gutyo gusa. Njye narababaye abandi nkabona barishimye bakamwbira ngo ibyo wakoze birahagije nkumva birandakaje”.

Nyuma yo kuva mu gikombe cy’isi, Ngarambe yagiriwe inama yo kugabanya Karate kuko yashoboraga kumubuza amasomo.

Mu 2015, Ngarambe yitabiriye imikino rusange y’Afurika “All African Games 2015” muri Congo Brazaville ariko ho ntiyitwara neza. Mu 2016, Ngarambe yagiye mu gikombe cy’isi muri Autriche ahura n’umunya Iran wanaje gutwara umwanya wa gatatu, nawe waje kumutsinda amurusha.

Uyu musore uvuga yitonze, yerekana ko ’’Mbere batsindwaga kubera ko hari tekinike z’umukino bari batazi ariko ubu bijyanye n’iterambere ry’ikoranabuhanga, ubumenyi babunganya n’ibyo bihugu bikomeye bagatandukanira mu mitegurire ibaho mbere yo kwitabira amarushanwa. Aho bo bakina Karate nk’umwuga naho abanyarwanda bagakina babonye umwanya nyuma y’akazi cyangwa se amasomo’’.

Mu gushimangira ko imyiteguro yatuma u Rwanda rugera kure, Ngarambe ahishura ko ajya gukubita umunya Armenia mu gikombe cy’isi cyo mu Budage yabikesheje imyitozo y’ukwezi bakoreshejwe n’umunyamisiri wari uwa mbere muri Afurika wabakoresheje imyitozo y’amasaha atandatu ku munsi barwana hagati yabo, utsindwa agahabwa igihano cya ’’Pompage’’ 50, rimwe Ngarambe avuga ko yigeze kuruka kubera imyitozo yari ikomeye.

Kutagira shampiyona, amikoro make bituma Karate idatera imbere

Uyu musore agaragaza ko u Rwanda rushobora kuba urwa mbere muri Afurika muri Karate gusa ibi bikaba bitashoboka kuri ubu ku mpamvu zirimo amikoro make, Politike ihamye yo kuzamura impano no kutagira shampiyona y’igihugu.

Ngarambe asobanura ko umukinnyi wa Karate abona amafaranga gusa iyo ahawe agahimbazamusyi ko gusohokera igihugu. Akanagaragaza ko nta rushanwa rishobora kurenza ibihumbi 50. Akomeza avuga ko kugira ngo ubone ifaranga urikuye muri Karate bigusaba gushaka abana utoza mu mpera z’icyumweru cyangwa mu kiruhuko. Ibi bikaba ari yo mpamvu abantu barangije amashuri bahita bajya gushakira ahandi imibereho.

Ngarambe anagaruka kuri politike n’imikorere y’ishyirahamwe ry’umukino wa Karate mu Rwanda ryibanda ku bana b’i Kigali cyane cyane kuri Stade Amahoro nyamara hari impano ziri mu bice byinshi by’igihugu nk’i Rusizi, Rubavu n’ahandi zititabwaho.

Icya nyuma muri bike avugaho ni ikibazo cy’uko nta shampiyona ya Karate ibaho aribyo bituma amakipe yitwa ko ari ho agenda asenyuka buhoro buhoro ndetse n’abakinnyi bakabura aho bahanganira.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE