2017-09-23 09:22:12 clouds 27o High | Kigali Rwanda

Dukurikire:
 
 

Kung Fu Rwanda: Komite nshya igiye gutangiza uyu mukino mu mashuri

Yanditswe na IMVAHO NSHYA

Kuya 2017-07-02 10:07:52

 
Share on:
 
Yasuwe:176
 
Yavuzweho:200
 
10
 
10

Kuva taliki 07 Gicurasi 2017, ishyirahamwe ry’umukino wa Kung Fu Wushu mu Rwanda “RKWF” rifite komite nyobozi nshya iyobowe na Uwiragiye Marc wungirijwe na Makuza Richard. Nsanzimana Claude yatorewe kuba umunyabanga mukuru naho Dushimimana Pauline aba umubitsi.

Uretse komite nyobozi hanatowe Komite ngenzuzi , Komite nkemurampaka, ubuyobozi bwa tekinike ndetse n’ubuyobozi bw’abasifuzi . Imvaho Nshya yagiranye ikiganiro cyihariye na Perezida wa Kung Fu mu Rwanda, Uwiragiye Marc agira byinshi atangaza ku migabo n’imigambi bafite nka komite nshya mu rwego rwo guteza imbere uyu mukino.

Gutunganya imiyoborere

Uwiragiye yatangaje ko bagiye guhera aho abandi bari bagejeje kugira bateze imbere umukino uko bashoboye mu mbaraga bafite. Gusa avuga ko bagomba gutunganya ibijyanye n’imiyoborere.

Ati “Muri make icyo tugomba gutunganya ni imiyoborere kuko byagiye bigaragara nk’inzego zimwe zitariho. Iz’ibanze zagiyeho, hagomba kujyaho na komite tekinike kuko niho tuzashingira twubaka umuryango wa Kung Fu”.

Kungu Fu igiye kwigishwa mu mashuri

JPEG - 177.1 kb
Uwiragiye Marc, Perezida w’ishyirahamwe ry’umukino wa Kung Fu Wushu mu Rwanda wemeza ko bagiye gutangira kwigisha uyu mukino mu mashuri (Foto Bugingo F)

Uwiragiye avuga ko mu rwego rwo kuzamura uyu mukino bagomba guhera mu bana.

Ati “Turimo kuganira n’amashri kugira ngo utangire wigishwe bihereye mu bana bato. Ni ubwa mbere bigiye kuba ariko turizera ko ubwo umwaka w’amashuri 2018 uzaba utangiye tuzaba dufite amashuri muri buri ntara yigisha uyu mukino”.

Ku bijyanye n’ubushobozi, Uwiragiye yatangaje ko icya mbere ari ibitekerezo, noneho bakareba uburyo bya bitekerezo byajya mu bikorwa.

Ati “Aha bisaba ubushake, dufite abalimu babikora badahembwa bizasaba ko bitanga gusa tuzaganira n’abatekunga badufashe mu ntangiriro kugira ngo turebe icyakorwa ariko mu byukuri umugambi ni uwo kandi tugomba gukora uko dushoboye kugira ngo unoge kandi ushyirwe mu bikorwa . Dutekereza ko Minisiteri y’Umuco na Siporo izadutera inkunga kuko biri mu nshingano zayo n’ubwo tubibaharira natwe tugomba kwishakamo ubushobozi kuko dukina umukino tuwukunze tugomba no kuwufasha”.

N’ubwo bifuza gutangiza umukino wa Kung Fu mu mashuri, benshi mu babyeyi ntabwo bishimira ko abana babo bakina uyu mukino ufatwa nko kurwana.

Uwiragiye Marc yatangaje ko bagomba gukangurira ababyeyi no kubereka uko umukino uteye.

Ati “Hari ababyumva bakumva ko ari ukurwana, ariko uwuzi, uwukina aho atandukanira n’abandi ni ukugira ikinyabupfura n’ubwitonzi. Ni ukuba wakwirwanaho igihe bibaye ngombwa ikakubaka mu buzima busanzwe. Ukina Kung Fu nyawe ntacika intege aba umunyamurava bituma ashobora gukora agatera imbere kuko aba afite n’ubuzina bwiza kuko Kung Fu ni ubuzima”.

Hari gahunda yo kohereza abazajya kwiga uyu mukino mu Bushinwa

Nk’uko bisanzwe bizwi, umukino wa Kung Fu wakomotse mu Bushinwa. Uwiragiye ashimangira ko u Bushinwa bafite ubushake bwo kubafasha biciye mu kigo cyabo “Confucius”.

Ati “Twagize amahirwe Ambasaderi w’u Bushinwa mu Rwanda yaratwakiriye tuganira ku iterambere ry’uyu mukino. Bemeye binyujijwe muri Confucius ko hari abana b’Abanyarwanda basoje amashuri yisumbuye bakina Kung Fu bazatangira kwiga ururimi rw’igishinwa igihe cyo gutanga za buruse bo bazashobore gutanga ibisabwa”.

Uwiragiye yakomeje agira ati “Dufite icyizere cy’uko bizemerwa bakabona buruse zo kwiga nta kintu birihira, itike izabajyana n’ibindi ni u Bushinwa buzabitanga niba ari uwiga ikoranabuhanga azaryiga aniga Kung Fu nagaruka azaba afite ubushobozi mu kazi gasanzwe ndetse no muri kung Fu azafashe abayikina”.

Amakipe n’ubuke bw’amarushanwa
Uwiragiye yatangaje ko ubu mu Rwanda hari amakipe 19 azwi kandi akora neza.

Ati “Turashaka ko kuri ayo 19 haziyongeraho bya bigo by’amashuri dushaka kwifashisha mu kumenyekanisha no gutoza abana gukina kung Fu, ko iyo watangiye ukiri muto nibwo ugaragaza impano”.

Avuga ku bijyanye n’ubuke bw’amarushwa, Perezida w’ishyirahamwe ry’umukino wa Kungu Fu Wushu mu Rwanda, Uwiragiye Marc yemeje ko ari ikibazo kuko bisaba ubushobozi batari bagira.

Aha yatanze urugero rw’irushanwa ry’imikino y’Afurika izabera muri Benin kuva tariki 19 kugeza 24 Nyakanga 2017 aho bifuza kujyana amakipe abiri agizwe n’abakinnyi 8, 4 mu kwiyereka “Taulu” no kurwana “Sanda” ariko ko basanze byatwara hafi miliyoni 40 z’amafaranga y’u Rwanda.

Ati “Bisaba ubushobozi twe uyu munsi tudafite ari nayo mpampavu tubasaba inkuga ngo twitabire kuko bizadufasha kumenya urwego turiho. Niba turi ku rwego rwiza tuzane imidali kandi nizera ko bizadufasha gutera imbere tukava ku rwego rw’Afurika tukajya ku rwego rw’isi”.

Yakomeje agira ati “Ntiwamenya aho uhagaze utigeze wipima, turasaba Minisiteri y’umuco na Siporo kudufasha tukagenda tukamenya aho duhagaze natwe tujye mu mikino isohoka tugaragaze impano n’ubushobozi dufite”.

Avuga ko basabye inkunga MINISPOC bagitegereje igisubizo. Ati “Ntabwo baradusubiza gusa muri iyi minsi turizera ko bazatubwira.Ubu ikipe irimo gukora imyitozo ariko kuva taliki 3 kugeza 15 Nyakanga 2017 nibwo tuzakora imyitozo nyayo. Ubu dukorera Kimisagara”.

Uwiragiye avuga ko MINISPOC nitagira icyo ibafasha nta kindi bakora kuko nta bushobozi bafite kandi nta bandi baterankunga bahari.

Incamake ku buzima bwa Uwiragiye Marc

Perezida mushya w’ishyirahamwe ry’umukino wa Kung Fu Wushu , Uwiragiye Marc yavutse taliki 14 Mutarama 1972, avukira ahitwa Ngeruka mu Karere ka Bugesera. Arubatse afite umugore n’abana 6 harimo 4 be n’abandi 2 arera. Yatangiye gukina uyu mukino wa Kung Fu mu 1987.

Mu 1990 ni bwo hatangijwe ikipe ya mbere itangijwe n’uwitwa Rutayisire Jean Marie Vianney muri St Famille gusa ntabwo yayikinnyemo . Nyuma ya Jenoside yakorewe Abatutsi muri Mata 1994 abari barokotse bongeye kubyutsa ikipe.

Mu 1997,Uwiragiye yatangiye gutoza uyu mukino anakina. Kuri ubu afite impamyabushobozi yo gutoza ku rwego rw’isi yakuye mu Bushinwa aho mu Rwanda ubu hari abatoza 4 gusa bazifite.

Uwiragiye ni Injeniyeri “Engineer” mu bijyanye n’ikoranabuhanga mu itumanaho ubu akaba afite sosiyete “UMARCOTEC Ltd” ikora ibijyanye n’ikoranabuhanga.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE