2017-10-18 18:43:44 clouds 27o High | Kigali Rwanda

Dukurikire:
 
 

Katauti ntazarenza imyaka itatu akiri umutoza wungirije

Yanditswe na IMVAHO NSHYA

Kuya 2017-07-28 06:42:40

 
Share on:
 
Yasuwe:550
 
Yavuzweho:200
 
10
 
10

Umutoza mushya wungirije wa Rayon Sports, Ndikumana Hamad Katauti aremeza ko atazarenza imyaka itatu ataraba umutoza mukuru.

Nyuma yo kuba umwe muri ba myugariro bakomeye babayeho mu Rwanda, yinjiye mu butoza mu mwaka w’imikino ushize yungirije Habimana Sosthene muri Musanze FC , kuri ubu agiye gufatanya na Karekezi Olivier na Nkunzingoma Ramazhan banakinanye mu ikipe y’igihugu “Amavubi” yari mu gikombe cy’Afurika “CAN 2004” muri Tunizia.

Nyuma yo gusinya imyaka ibiri muri Rayon Sports, Katauti yavuze ko agiye kwigaragaza muri iyi kipe, ubundi akajya aho yabasha kuba umutoza mukuru.

Ati ’’Ndifuza gukora byinshi ku rugendo rw’ubutoza. Mbaye umutoza naravuze nti bya bindi nashakaga biraje noneho ngomba kugerageza nkabigeraho . Byaranshimishije kuko nta muntu bidashimisha iyo abonye amahirwe yo gutoza Rayon Sports’’.

JPEG - 149.6 kb
Ndikumana Hamad Katauti uvuga ko mu myaka 3 agomba kuba atakiri umutoza wugirije (Foto Ngabo R)

Katauti avuga ko yihaye intego yo kutarenza imyaka 3 akiri umutoza wungirije.

Ati “Biduhiriye iyi ibiri twayirangiza neza nk’uko tubyifuza kuri njye nzahita mpagarika njye gushaka ikipe nabera umutoza mukuru. Niba ari ntoya ni byo bizaba ari byiza nk’izo za Gicumbi FC na za Pepiniere FC n’izindi’’.

Barotaga gutoza Amavubi

Katauti yaboneyeho gusobanura ko we na Karekezi barotaga kujya gutoza Amavubi buri wese agakomeza uruhande yahoze akinaho.

Ati “Mbere yo kuza muri Rayon Sports twaraganiraga, umwe (Karekezi, wahoze ari rutahizamu w’Amavubi) akavuga ati ubusatirizi bwanjye buzajya butsinda ibitego byinshi, nanjye (wahoze ari myugariro w’Amavubi) nkavuga nti ubwugarizi bwanjye buzajya butsindwa bike naho undi (Ramazhan wabaye umunyezamu w’Amavubi) ati umuzamu wanjye azaba ari umunyezamu udatsindwa byinshi. Ni ibintu twatekerezaga igihe kirekire ariko tukabitekereza ku ikipe y’igihugu’’.

Ibibazo byo muri Rayon barabizi

Katauti yanavuze ko adatewe ubwoba no kuba aje muri Rayon Sports ikunze kugira ibibazo by’amikoro n’iby’ubuyobozi kuko na we yabibayemo akiri umukinnyi wayo.

Ati “Ntabwo byambereye ikibazo kuko Rayon Sports ari ikipe nabayemo igihe kirekire, ibibazo biri muri Rayon Sports uyu munsi ntabwo bimeze nk’ibyari bihari mu gihe cyacu aho byari birenze kuko twakinaga tukamara amezi atatu nta mushahara, tukajya gukina turi abakinnyi 12 tugatsinda umukino. Ntabwo twebwe iby’ibibazo biduhangayikishije, gusa nizere ko bitazagaruka’’.

Ashaka gutera ikirenge mu cya se

Ndikumana yavutse tariki 05 Ukwakira 1978 i Kigali akinira Rayon Sports muri shampiyona ya 1998/1999, yerekeza ku mugabane w’u Burayi kuva mu 2000 kugeza muri 2011 mu makipe ya RSC Anderlecht, KAA Gent, KV Turnhout zo mu Bubiligi na POP Kinyras Peyias FC, Nea Salamina, Anorthosis Famagusta FC, AEL Limassol muri Cypres.

Se wa Ndikumana Hamad Katauti aba mu Burundi aho atoza amakipe y’abana ndetse ni we wazamuye abakinnyi nka Nahayo Valery wahoze ari kapiteni w’ikipe y’igihugu y’u Burundi.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE