Advertisement
 
 
 
 
 
 
 
 

Siporo | Siporo Mu Rwanda

Intica ntikize abasifuzi bahabwa ishobora kuba intandaro ya ruswa   

  Yanditswe na MURENGERANTWARI Dominique
 27 March

 
 

Imisifurire ifite uruhare rukomeye mu migendekere myiza cyangwa mibi y’umupira w’amaguru. Gusifura ni umwuga udasaba gusa ubumenyi, ahubwo bisaba ubunyangamugayo n’ubushishozi. Kuryoshya cyangwa kubishya umukino biturutse ku musifuzi biroroshya cyane kuko niwe mucamanaza mukuru ku byemezo bifatwa mu mukino uri kuba.

Hashize igihe kinini imisifurire yo mu Rwanda, by’umwihariko muri shampiyona y’icyiciro cya mbere, ijambo “ubunyangamugayo” ryarayoyotse risimburwa no “kubogama”. Bigeze aho bivugwa n’abakunzi b’imikino ko ikipe yateguye neza umukino ari iyaganiriye neza n’abasifuzi aho kuba imyitozo ikwiye.

Kuba abasifuzi bo mu Rwanda bahabwa agahimbazamusyi k’intica ntikize ntibivuze ko bagomba gutatira umwuga wabo. Muri rusange abasifuzi bo mu makipe atarabigize umwuga “amateurs” bahabwa amapawundi ari hagati ya 20; ibihumbi 22 mu mafaranga y’u Rwanda na 30; ibihumbi asaga ibihumbi 32 y’amafaranga y’u Rwanda . Mu marushanwa y’imberabyombi (Semi-professionals) bashobora kwinjiza amapawundi 80 ; ibihumbi 82 y’amanyarwada ku mukino.

Ibihugu bifite shampiyona zikomeye nka Espagne, Ubwongereza, Ubufaransa, Ubudage n’Ubutaliyani usanga umusifuzi ashobora kwinjiza amapawundi ari hagati y’ibihumbi 70 asaga miliyoni 74 z’amafaranga y’u Rwanda na 85 asaga miliyoni 91 ku mwaka.

Ntabwo shampiyona nk’iy’u Rwanda yakwigereranya n’ababigize umwuga cyangwa abafite ubushobozi, ahubwo niharanire kugera ku rwego abandi bagezeho binyuze mu nzira zikwiye.

JPEG - 424 kb
Abasifuzi bo mu Rwanda bahabwa amafaranga make ashobora gutuma baka ruswa kuko nayo batayahabwa ku gihe

Mu mpera z’umwaka wa 2015, hagaragaye umubare w’agahimbazamushyi fatizo abasifuzi bo mu Rwanda bahabwa kuri buri mukino, n’ubwo katabonekera igihe. Kuba ari make ntibivuze ko bagomba kwihemba binyuze iy’ubusamo.

Agahimbazamusyi kangana n’ibihumbi 15 kagenerwa abasifura bo ku rwego mpuzamahanga bemewe na FIFA na CAF bakimenyera itike ndetse n’ifunguro mu gihe utararagera ku rwego mpuzamahanga ahabwa ibihumbi 10 . Ku mwaka ni hagati y’ibihumbi 300 na 450 mu mikino 30.

Ugereranyije n’ibindi bihugu by’ibituranyi cyangwa ku mugabane w’i Burayi aho umupira w’amaguru ubatunze nk’umwuga, abasifuzi bo mu Rwanda bahabwa intica ntikize. Uretse indangagaciro y’ubunyangamugayo yabarengera naho ubundi kugwa mu mutego wo kubogamira uruhande rumwe birashoboka ariko sicyo kiboneye.

Mu gihugu cya Uganda umusifuzi wo mu gihugu ahabwa nibura amashiringi ibihumbi 150 ku mukino. Ni ukuvuga hafi ibihumbi 40 by’amafaranga y’u Rwanda. Naho abasifuzi mpuzamahanga bagenerwa hagati y’amadolari 500 asaga ibihumbi 370 na 700 asaga ibihumbi 530 bitewe n’umukino.

Muri Tanzania abasifuzi mpuzamahanga bahabwa amadolari 200 asaga ibihumbi 150 y’u Rwanda ku mukino mu gihe utari mpuzamahanga ahabwa amadolari 100 agana n’ibihumbi 75 y’u Rwanda. Muri Kenya umusifuzi mpuzamahanga ahabwa amadolari 100 (ibihumbi 75 by’amafaranga y’u Rwanda) naho utari mpuzamahanga agahabwa amadolari 50 agera ku bihumbi 37 y’amafaranga y’u Rwanda.

Muri RDC agahimbazamusyi k’umusifuzi kagenwa bitewe n’uburemere bw’umukino n’aho uri bubere. Amake umusifuzi wo mu gihugu ashobora guhabwa ni amadorali 50 (ibihumbi 37 y’u Rwanda), naho abo ku rwego mpuzamahanga bashobora no guhabwa amadorali 1000 asaga ibihumbi 750 y’amafaranga y’u Rwanda.

Undi mwihariko wo muri ibi bihugu, ni uko abasifuzi bajya ku murimo wabo wo gusifura babanje guhabwa amafaranga. Bitandukanye n’abo mu Rwanda bakoresha ayabo bakazasubizwa nyuma. Mu Gushyingo 2015, ibirarane by’abasifuzi bo mu Rwanda byabarirwaga muri miliyoni 46 z’amafaranga y’u Rwanda.

Ibinyamakuru nka “Footballreferee” na “totalsportek” bivuga ko muri shampiyona zikomeye z’ababigize umwuga, umusifuzi ashobora kwinjiza ibihumbi 100 ku mwaka by’amapawundi (107 075 847 frws). Ni ukuvuga amapawundi 380 ku mukino nibura (406 888 frws).

Abasifuzi bo mu Bwongereza nibo bonyine basinya amasezerano na FA mu gihe ahandi hose bakora nk’abanyabiraka. Umusifuzi wo mu Bwongereza ufite amasezerano yinjiza nibura ibihumbi 65 by’amapawundi ku mwaka (69 599 301 frws).

Uko abasifuzi bo muri shampiyona zikomeye babona agahimbazamusyi
Mu Bwongereza umusifuzi wo hagati ahabwa amapawundi 1,170 (1 252 787 frws) ku mukino naho uwo ku ruhande agahabwa amapawundi 475 (508 610 frws) iyo ari umunyabiraka. Muri Espagne umusifuzi wo hagati ahabwa amapawundi 4,700 (5 032 564 frws) naho uwo ku ruhande agahabwa 1550 (1 659 675 frws).

Mu Budage uwo hagati ahabwa ibihumbi 2,800 by’amapawundi (2 998 123 frws) mu gihe uwo ku ruhande ahabwa 1400 (1 499 061 frws). Mu Butaliyani ni 2,819 (3 018 468 frws) na 1300 (1 391 986 frws) ahabwa uwo ku ruhande. Mu Bufaransa uwo hagati ahabwa 2,650 mu gihe muri Portugal ahabwa amapawundi 925 ku mukino.

Mu irushanwa ry’amakipe yabaye ayambere iwayo ku mugabane w’u Burayi “Champions League”, umusifuzi wo hagati wo mu cyiciro cya “Elite” ahabwa amapawundi 4,800 (5 139 640 frws) ku mukino, mu gihe uri ku cyiciro cya nyuma ahabwa amapawundi 1,100 (1 177 834 frws) hatabariwemo ayo baba bifashishije mu ngendo, icumbi, ibyangombwa n’ifunguro.

Niba umupira w’amaguru wo mu Rwanda utaragera ku rwego rwo kwitwa ababigize umwuga, ntabwo abasifuzi bacu bakwiye kwigereranya n’ababigezeho biyushye akuya. Kubigeraho ni inzira ndende ivunanye aho gutesha agaciro umwuga nibaharanire kugera ku rwego nk’urwo ababarusha bagezeho bimika ubunyangamugayo mu mwuga wabo.

 

Comments

Who are you?
Your post
  • To create paragraphs, just leave blank lines.

 
 
Jimmy Mulisa yizeye gufasha abakinnyi ba APR FC kujya hanze
Jimmy Mulisa yizeye gufasha abakinnyi ba APR FC kujya hanze

Umutoza mushya w’ikipe ya APR FC wanabaye umukinnyi w’ikirangirire w’iyi kipe, Jimmy Mulisa aratangaza ko yiteguye guha ubumenyi akanavugana n’abantu baziranye mu rwego rwo gufasha abakinnyi ba APR (...)

Usengimana Danny yagaragaje aho agifite intege nke nubwo yitwara neza
Usengimana Danny yagaragaje aho agifite intege nke nubwo yitwara neza

Mu buzima busanzwe, buri wese agira icyo ashobora kuruta ibindi ndetse akanagira n’ikintu aba afitemo intege nke. Kwimenya bigufasha mu gufata ingamba zizagenga ubuzima bwawe. Ni nako bimeze kuri (...)

Tour du Rwanda 2016 yadusigiye amasomo menshi – Meya Harelimana
Tour du Rwanda 2016 yadusigiye amasomo menshi – Meya Harelimana

Nyuma y’isiganwa ry’amagare “Tour du Rwanda 2016’’ ryageze mu karere ka Rusizi ku nshuro ya mbere, abayobozi batandukanye muri aka karere bakomeje kuvuga ko ryabasigiye amasomo menshi ku byerekeranye (...)

APR FC iragaruka mu Rwanda uyu munsi
APR FC iragaruka mu Rwanda uyu munsi

Ikipe ya APR FC nyuma yo kutitwara neza igasezererwa mu irushanwa yari yatumiwemo muri Congo Brazzaville, uyu munsi taliki 27 Ugushyingo 2016 iragaruka mu Rwanda. Iyi kipe yerekeje muri Congo (...)

FIFA: U Rwanda rwazamutseho imyanya  6 ku rutonde
FIFA: U Rwanda rwazamutseho imyanya 6 ku rutonde

Ikipe y’u Rwanda iheruka gukina umukino taliki 03 Nzeri 2016 aho yanganyaga na Ghana igitego 1-1, ikomeje kuzamuka ku rutonde ngarukakwezi rukorwa n’ishyirahamwe ry’umupira w’amaguru ku isi “FIFA”. (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.