Advertisement
 
 
 
 
 
 
 
 

Siporo | Siporo Mu Rwanda

Imishinga itanu y’ingenzi ishishikaje ubuyobozi bwa Rayon Sports   

  Yanditswe na BIZIMANA Eric
 6 June

 
 

Hashize amezi abiri hashyizweho ubuyobozi bushya bw’umuryango wa Rayon Sports buyobowe na Kimenyi Vedaste bwasimburaga ubwa Ngarambe Charles.

Ngarambe wari umaze imyaka ibiri ayobora uyu muryango , ntiyabashije gucyemura ikibazo cy’ingutu cyo gushaka amikoro yo gufasha amakipe ya Rayon Sports, gusa icyo azahora yibukirwa ni ugufaha uyu muryango kubona ubuzima gatozi.

Nyuma y’amezi abiri batowe, Imvaho Nshya yifuje kumenya icyo ubu buyobozi bwa Kimenyi buhugiyeho maze yegera Kimenyi Vedaste, Perezida w’umuryango , nawe wadusabye kuvugana na Musabende Ange Claudine, umunyamabanga w’umuryango wa Rayon Sports ku mpamvu z’akazi kenshi yari afite.

Musabende Ange Claudine yagaragaje imishinga itanu bashyizemo imbaraga nyuma yo guhabwa inshingano zo kuyobora uyu muryango.

Umushinga wa gukata amafaranga abakunzi ba Rayon Sports wabaye uhagaze

JPEG - 196.6 kb
Musabende Ange Claudine, umunyamabanga w’umuryango wa Rayon Sports

Musabende avuga ko bagihabwa izi nshingano basanze hari umushinga wari ukinonosorwa na Tuyisenge Olivier wari ugamije kubarura abakunzi ba Rayon Sports bo mu gihugu bari kuzajya bakatwa amafaranga buri kwezi uko baguze amafaranga yo guhamagara kuri telefoni zabo bwite, nyuma ariko uza guhararara ku mpungengenge za Sosiyete y’itumanaho MTN bari gukorana.
Yagize ati "Njye navuganye na MTN, mvugana na Olivier (nyir’umushinga).MTN yarabyanze imubwira ko hari ukundi yabikora. Batubwiye ko buriya buryo hari kuzamo icyo nakwita, bakaba bashyiramo umuntu atari ku bushake bwe. Ntabwo twari twakabibwiye abantu bose ariko ukuri ni uko".

Tuyisengeye wari watangiye umushinga yari yabwiye Imvaho Nshya muri Mata 2016 ko washoboraga kubyara miliyoni 250 z’amafaranga mu mwaka umwe mu gihe abantu ibihumbi 25 bari bamaze kwiyandikisha bari kugatwa amafaranga 100 byibuze.

Nyuma y’uko uyu mushinga uhagaze, ikipe ya Rayon Sports yiyemeje gushyiraho uburyo bwo gutera inkunga iyi kipe binyuze mu buryo bwa Mobile Money ku mirongo yose y’itumanaho; ubu bukaba bwaratanze umusaruro n’ubwo nta mafaranga yavuyemo yatangarijwe Imvaho Nshya.

Shampiyona itaha izatangira buri mukunzi wa Rayon Sports ari muri "Systeme"

Nyuma y’uko umushinga wo kubarura abantu bakajya biyemeza amafaranga bazakatwa uhagaze; ubuyobozi bwa Rayon Sports buri gukorana na sosiyete izabasha kwegeranya amakuru n’imyirondoro by’abanyamuryango bayo, kimwe n’inkunga biteguye gutanga.

Musabende avuga ko muri uyu mushinga, umunyamuryango azajya akoresha telefoni ye mu kwemeza ko ari umunyamuryango; akaba yanihitiramo inkunga azajya agenera iyi kipe.

Ati "Umuntu azajya yiyandikisha muri iyi systeme, ibyo bizadufasha kumenya amakuru y’abafana, tuzamenya ngo ni bangahe? tumenye uturere n’imirenge barimo. Ibyo kandi bizadufasha ku baterankunga, kuko tuzajya tubereka ngo dufite abantu bangahe, mwavugana nabo gutya".

Yakomeje avuga uko bizakorwa, ati "Ntibazajya kubarura abantu ngo babwire umuntu bati zana indangamuntu yawe tukwandike bo bazakora aka "Option", ujye muri telefoni yawe ukande imibare runaka wiyandikishe nk’uko abantu babikora bagiye kohereza amafaranga". Musabende yemeza ko shampiyona itaha izatangira iyi systeme iri gukora neza.

Umuryango watangiye gukora urubuga rwa interineti

Umushinga wa gatatu w’umuryango wa Rayon Sports ni wo kubaka izina Rayon Sports , rigakomera mu bijyanye n’ibikorwa biryamamaza.

Zimwe mu ngamba zafashwe ni ugushyiraho urubuga rwa interineti rw’iyi kipe rwubakitse kandi ruriho buri cyose cyakenerwa nk’uko bivugwa n’umunyamabanga w’umuryango wa Rayon Sports.

Ati “Turashaka kubaka izina Rayon Sports, ifite ibirango bizwi .Turifuza ko imyirondo y’abakinnyi bacu izajya iba izwi, washaka amavidewo y’abakinnyi bacu ukayabona, washaka kumenya amateka ya cyera ukayabona. Nibavuga Xavio, umurebe atera amanota, ubone amacenga ye, umubone mu kibuga".

Musabende avuga ko uyu mushinga uzajya ufasha mu kumenyekanisha Rayon Sports cyane mu baterankunga.

Ubuyobozi bwa Rayon Sports bukanavuga ko ari imwe mu nzira zo guca akajagari muri Rayon Sports kakunze kugaragaragara mu minsi yashize, aho bamwe bakoreshaga izina rya Rayon Sports uko bishakiye.
Kuvugurura amasezerano n’akarere ka Nyanza

Igikorwa cya kane umuryango wa Rayon Sports ushyizemo imbaraga ni ukuvugurura amasezerano n’akarere ka Nyanza, yarangiye muri Nyakanga 2015.

Uruhande rw’umuryango wa Rayon Sports ruvuga ko ibiganiro n’akarere bigeze kure gusa rukanavuga ko rutazongera guha akarere ububasha bwo kubacungira ikipe.

Musabende yagize ati "Turi kureba niba bishobotse amasezerano yacu n’akarere ka Nyanza yakongererwa. Ku ruhande rwacu turashaka ko bitaba kwa kundi bafata ikipe ahubwo twe twifuza ko baba nk’abandi baterankunga".

Ku mpamvu zo kwaka inshingano akarere ka Nyanza, Musabende azisobanura muri aya magambo "Hari igihe wumvikana n’ikigo runaka nyuma kubera impamvu runaka ugahitamo kubyikurikiranira, bitari uko ubanenze. Niba uri umuryango biba bisaba ko buri kibazo kivutse ugira uruhare mu kugicyemura.

Biragorana iyo ufashe ibintu byose ukabyegeka ku mushoramari, ashobora kubikora neza ariko se mu gihe bibaye ngombwa ko arekura ikipe, cyangwa se akagenda ibibazo bisigaye ugomba kubyirengera".

Umunyamabanga w’umuryango wa Rayon Sports avuga ko isaha n’isaha iyi kipe ishobora no gusubira i Nyanza mu gihe byagaragara ko kuhaba nta kibazo byayigiraho.

Rayon Sports ntizemera amasezerano mashya na Skol ya miliyoni 40
Undi mushinga uri mu yo umuryango wa Rayon Sports uri kwitaho n’uwo kuvugurura amasezerano n’uruganda rwa Skol, mu gihe asanzwe yari kuzarangirana n’umwaka utaha.

Musabende, umunyamabanga wawo, ahamya ko nta masezerano mashya, bakorana na Skol, mu gihe itemeye kuzamura amafaranga ibagenera.

Ati"Dutangira ni bo ba mbere twari tubonye, amafaranga baduhaye yaradufashije ariko ukurikije ibikorwa tubakorera; ibyo bungukamo ni byo twakabaye tubonamo natwe.Si ibanga ntabwo twakongera gukora amasezerano ya miliyoni 40. Sinza kukubwira ngo n’aya dushaka, ikindi baracyafite umwaka”.

Yungamo ati "Bikomeje kuba izo miliyoni 40, twe twagabanya ibikorwa twabakoreraga, ntitubakorere ku rwego twabikoragaho. Ubwo twakumvikana ibijyanye na miliyoni 40".

Umuryango utekereza iki kuri "Rayon Sports Investment Group?"

Umunyamabanga w’umuryango wa Rayon Sports yasubije ko biteguye gukorana na sosiyete ishobora gushingwa ya bamwe mu bashoramari bakunda Rayon Sports.

Musabende yavuze ko atari umushinga w’umuryango wa Rayon Sports ahubwo ari uw’abantu bamwe bakunda Rayon Sports bashatse kwishyira hamwe bagakora igikorwa kinjiza amafaranga bifashishije izina rya Rayon Sports.

Ati “Nabo ubwo bazaba bameze nk’izi za Skol, kabone n’ubwo bazajya bavuga ngo tugiye gukora umugati witwa Rayon Sports ni urugero. Kuva bazajya bacuruza bitwaje izina rya ryacu tugomba kugira icyo tubungukaho".
Rayon Sports VC yo izabaho ite?

Musabende abisubiza muri aya magambo, “Uko dukomeza gushakisha uburyo burambye ni ko icyo tubonye kizajya kigabanywa amakipe yacu yaba iy’umupira w’amaguru n’iya Volleyball".

Musabende yanahishuye ko bashaka kubaka Rayon Sports izajya ikurura abashoramari kuruta uko bajya kubinginga. Ubu bikaba bivugwa ko bafite abaterankunga batatu batangiye kuganira gusa batifuza gutangaza.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Jimmy Mulisa yizeye gufasha abakinnyi ba APR FC kujya hanze
Jimmy Mulisa yizeye gufasha abakinnyi ba APR FC kujya hanze

Umutoza mushya w’ikipe ya APR FC wanabaye umukinnyi w’ikirangirire w’iyi kipe, Jimmy Mulisa aratangaza ko yiteguye guha ubumenyi akanavugana n’abantu baziranye mu rwego rwo gufasha abakinnyi ba APR (...)

Usengimana Danny yagaragaje aho agifite intege nke nubwo yitwara neza
Usengimana Danny yagaragaje aho agifite intege nke nubwo yitwara neza

Mu buzima busanzwe, buri wese agira icyo ashobora kuruta ibindi ndetse akanagira n’ikintu aba afitemo intege nke. Kwimenya bigufasha mu gufata ingamba zizagenga ubuzima bwawe. Ni nako bimeze kuri (...)

Tour du Rwanda 2016 yadusigiye amasomo menshi – Meya Harelimana
Tour du Rwanda 2016 yadusigiye amasomo menshi – Meya Harelimana

Nyuma y’isiganwa ry’amagare “Tour du Rwanda 2016’’ ryageze mu karere ka Rusizi ku nshuro ya mbere, abayobozi batandukanye muri aka karere bakomeje kuvuga ko ryabasigiye amasomo menshi ku byerekeranye (...)

APR FC iragaruka mu Rwanda uyu munsi
APR FC iragaruka mu Rwanda uyu munsi

Ikipe ya APR FC nyuma yo kutitwara neza igasezererwa mu irushanwa yari yatumiwemo muri Congo Brazzaville, uyu munsi taliki 27 Ugushyingo 2016 iragaruka mu Rwanda. Iyi kipe yerekeje muri Congo (...)

FIFA: U Rwanda rwazamutseho imyanya  6 ku rutonde
FIFA: U Rwanda rwazamutseho imyanya 6 ku rutonde

Ikipe y’u Rwanda iheruka gukina umukino taliki 03 Nzeri 2016 aho yanganyaga na Ghana igitego 1-1, ikomeje kuzamuka ku rutonde ngarukakwezi rukorwa n’ishyirahamwe ry’umupira w’amaguru ku isi “FIFA”. (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.