Advertisement
 
 
 
 
 
 
 
 

Siporo | Siporo Mu Rwanda

Ibintu 10 bikwiye gukorwa mu kuzamura umupira w’amaguru w’u Rwanda   

  Yanditswe na BIZIMANA Eric
 March 2016

 
 

Uko imyaka ishira ni ko u Rwanda rutera imbere mu nzego zitandukanye yaba mu bikorwaremezo, mu buvuzi, mu buhinzi, mu bucuruzi n’ibindi.

Ibi bituruka ku kugira umurongo uhamye nk’uwafashwe n’inama y’igihugu y’umushyikirano yabaye mu 2015, yashyizeho icyerekezo 2050 kigaragaza imirongo mikuru y’icyerekezo cy’u Rwanda kugeza mu mwaka wa 2050. Iki cyerekezo cyashyizweho mu gisimbuye icyerekezo 2020.

Mu mupira w’amaguru, biragoye kumenya icyerekezo bawufitiye cyokora itegeko rishya rya siporo ni ryo rivuga ko siporo igiye kuba ubucuruzi, ikanibanda ku bakiri bato. Umuntu yakwibaza bizaba ryari? mu wuhe mwaka? Bizakorwa bite?.

JPEG - 336.1 kb
Umupira w’abana ni kimwe mu byafasha iterambere ry’umupira w’u Rwanda

Imvaho Nshya yaganiriye n’abantu barimo abanyamakuru, abatoza, abakinnyi n’abakunzi b’umupira w’amagur; maze ishyirahamwe ibintu 10 bishobora kuzamura umupira w’amaguru w’u Rwanda.

1.Gusubizaho amakipe y’abana (Junior) mu makipe

Gusubizaho imikino y’amakipe mato (Junior ) nk’uko byigeze kubaho muri shampiyona ya 2010-2011 ni kimwe mu byazamura bigaragara umupira w’u Rwanda.

Kayiranga Jean Baptitse, umutoza w’ikipe y’igihugu y’abatarengeje imyaka 20 umaze kuba inararibonye mu gutoza harimo n’abakiri bato ndetse akaba yaranabaye umukinnyi w’ikipe ya Rayon Sports, asanga iki ari igisubizo mu kuzamura abana mu gihe gushyiraho amashuri y’umupira (Academy) bisa n’ibidashobotse.

Ati "Umupira w’amaguru ugomba kugira aho wubakiye (fondation). Ibi birareba kuzamura abakinnyi n’abatoza muri za centres de formation. Wenda tureke ibyo by’amashuri yigisha umupira ariko dushyire imbaraga mu gukinisha ikipe z’abana."

2. Kongera imbaraga mu marushanwa ya U-15 na U-17

Ikindi cya korwa ni ukongera imbaraga mu irushanwa ry’abatarengeje imyaka 15 na 17. Ni gahunda yatangijwe na FERWAFA na MINISPOC muri Mutarama 2015, itangirizwa mu turere twose tw’igihugu.

Kuri uyu munsi bisa nkaho aya marushanwa yamaze gucika intege nyuma y’uko habuze amafaranga yo gufasha aya marushanwa mu kubona iby’ibanze nk’amazi n’ibindi.

Ku wa Gatatu taliki 16 Werurwe 2016 ni bwo Nzamwita Vincent De Gaule, umuyobozi wa FERWAFA yagiye gukomanga kwa Gianni Infantino, Perezida wa FIFA kugira ngo ashyigikire uyu mushinga. Imvaho Nshya yemeza ko abatangije uyu mushinga bakwiye gusuzuma aho ugeze, bakanareba icyawuzanzamura mu gihe watangaga icyizere ku hazaza h’umupira w’u Rwanda.

3. Hakwiye kujyaho umuntu ushinzwe imishinga muri buri kipe

Mu bindi bituma umupira w’amaguru udatera imbere harimo n’amikoro. Ikibazo cy’amikoro kimaze iminsi kivugwa mu makipe yo mu Rwanda. Imwe mu miti ikwiye gufatirwa iki kibazo ni uko buri kipe y’icyiciro cya mbere yashyiraho umukozi ushinzwe iby’amasoko no kwiga imishinga «Project and Marketing Manager ».

Uyu yaba afite inshingano zo gushaka abaterankunga no gutegura imishinga yabyarira inyungu amakipe. Uyu niwe wakabaye yarasuzumye imishinga nk’iyo kubarura abakunzi ba Rayon Sports cyangwa se uwo kugura imodoka itwara abagenzi waheze mu mpapuro mu Magaju FC.

4. Ubuyobozi bukundisha abantu umupira

Ku mwanya wa kane haraza gushyiraho abayobozi biyumvamo kandi bakundisha abandi umupira. Birasaba ko mu buyobozi bwa FERWAFA n’ubwa amakipe hagaragaramo abayobozi basobanukiwe iby’umupira barimo abigeze kuwukina, bitari bya bindi umuntu ashyiraho uwo yiboneye. Ibi butuma bakora ibintu bazi neza kandi bakunze.

5.Gufasha abakinnyi kujya gukina nk’ababigize umwuga

Ntabwo iterambere ryashoboka igihugu kidafite ababigize umwuga benshi, bitari ibyadutse by’uko umukinnyi ukomeye w’umunyarwanda ajya muri Kenya cyangwa Tanzania. Nabyo sibibi ari ko dukwiye kurenga ibi bihugu.

Abanyarwanda bafite impano zibemerera kujya i Burayi, kuko n’iyo Afurika y’i Burengerazuba irimo ibihugu nka Mali, Cote d’Ivoire, Senegal ntacyo baturusha.

Aganira n’Imvaho Nshya muri Mutarama 2016 ubwo yari mu mikino ya CHAN 2016, igihangange Roger Milan, umunya Cameroun wubatse amateka ku mugabane w’Afurika yavuze ko ubuyobozi bw’amashyirahamwe y’umupira w’amaguru muri Afurika bukwiye kongera imibanire n’amakipe yo ku mugabane w’u Burayi kugira ngo ahashinge amashuri y’umupira w’amaguru, aya avamo abana bajya muri aya makipe.

Yagize ati « Ntekereza ko ikibazo ari akavuyo kaba mu mashyirahamwe yo muri ibihugu, ntihabeho uburyo bwo gufasha aba bakinnyi kujya hanze nyamara mu bindi bihugu ho usanga bafitanye umubano n’amakipe y’i Burayi ».

6. Kongera ibibuga kugeza ku rwego rw’umudugudu

Ku mwanya wa gatandatu w’ibyateza imbere umupira w’u Rwanda haraza kongera ibibuga kugeza ku rwego rw’umudugudu. Ni igitekerezo cya Gasingwa Michel, wahoze ari umunyamabanga wa FERWAFA wemeje ko kugira ikibuga kugeza ku mudugudu byatuma siporo igera kuri buri wese.

7.Kongera imikoranire y’itangazamakuru n’abayobozi b’umupira w’amaguru

Iterambere rizashoboka mu gihe itangazamakuru rigizemo uruhare runini. Nta gushidikanya ko umupira w’u Bwongereza uzamuwe n’abanyamakuru. Birakwiye ko itangazamakuru ritekerezwaho nk’urufunguzo mu iterambere ry’umupira w’u Rwanda. Ibi birasaba ko abanyamakuru bahabwa amahugurwa mu kuba abanyamwuga, ndetse bakoroherezwa mu kugera ku makuru n’amakipe akumva ko bakwiye gukorana bya hafi nk’ikiraro gihuza abafana n’amakipe.

8. Leta ikwiye gukora ubukangurambaga

Imikino ya CHAN 2016 yatweretse ko ubushake n’umwera uvuye i bukuru ushobora gukangura abantu mu kwiyumvamo umupira nk’uko bivugwa na Nshimiyimana Eric wahoze akinira ikipe y’igihugu "Amavubi" ubu akaba atoza ikipe ya AS Kigali.
Birakwiye ko Guverinoma muri za gahunda ishyiramo no gukangurira abantu siporo by’umwihariko umupira w’amaguru. Abayobozi bakuru bagatanga urugero bitabira imwe mu mikino ya shampiyona nk’uko byari bimeze muri CHAN 2016.

By’umwihariko abayobozi b’uturere dufite amakipe bakagira uruhare mu gukangurira abaturage babo kuza kureba aho amafaranga yabo ajya. Aha ntituzongere kubona nk’ibyabaga mu mwaka ushize nta muyobozi wo mu karekre ka Muhanga witabira imikino AS Muhanga nyamara aka karere gatanga miliyoni 60 zivuye mu misoro y’abaturage.

9. Kujyana abakinnyi mu ngando gutozwa uburere mboneragihugu

Abakinnyi bakwiye kujyanwa mu itorero bagatozwa uburere mboneragihugu no gukunda igihugu . Iki gitekerezo cyatanzwe n’umwe mu batoza b’icyiciro cya mbere wahisemo kudatangaza amazina, abikuye ku kuba ijambo "Abana b’Abanyarwanda", rimaze kwangiza byinshi mu mitwe y’abakinnyi mu Rwanda.

Uyu mutoza avuga ko abakinnyi bitwaza ko ari abanyarwanda bumvishe ko kugabanya umubare w’abanyamahanga babanza mu kibuga byatumye bazamura amatwara, bavuga ngo "byanze bikunze tugomba gukina". Uyu mutoza avuga ko bakwiye kuganirizwa mu kubafasha mu iterambere ryabo.

10. Imikoranire y’abatoza b’amakipe n’ab’Amavubi

Icya nyuma cyafasha mu iterambere ry’Amavubi ni ukongera imikoranire y’abatoza b’amakipe y’icyiciro cya mbere n’umutoza w’ikipe y’igihugu. Kayiranga Baptista wahoze atoza Rayon Sports avuga ko umutoza w’ikipe y’igihugu akwiye kujya yegera aba batoza kuko ari bo babana nabo mu buzima bwa minsi yose, ku buryo bajya mu ikipe y’igihugu babikwiye kandi bameze neza.

 

Comments

 
 
Imisoro yatumye Amagaju FC  ihagarika kugura imodoka
Imisoro yatumye Amagaju FC ihagarika kugura imodoka

Ubuyobozi bw’ikipe y’Amagaju buravuga ko umwenda bubereyemo ikigo cy’igihugu cy’imisoro n’Amahoro “RRA” yatumye buba buhagaritse umushinga wo kugura imodoka yo mu bwoko bwa “Coaster” yari kujya itwara (...)

APR FC yagaragaje ihuzagurika mu kwitegura imikino yo muri iki cyumweru
APR FC yagaragaje ihuzagurika mu kwitegura imikino yo muri iki cyumweru

Ejo: Mukura-APR FC (Huye-15h30) Ikipe ya APR FC ya kabiri ku rutonde n’amanota 35 irakirwa na Mukura ya 10 n’amanota 19 inasoza urugendo rwayo rw’imikino ikinira mu Ntara y’Amajyepfo. Ni urugendo (...)

Abatoza b’Abanyarwanda 2 bazajya bakura impamyabushobozi mu Budage buri mwaka
Abatoza b’Abanyarwanda 2 bazajya bakura impamyabushobozi mu Budage buri mwaka

Ubuyobozi bw’ishyirahamwe ry’umupira w’amaguru mu Rwanda “FERWAFA” n’iry’u Budage “DFB” basinyanye amasezerano y’ubufatanye yo guteza imbere umupira w’amaguru w’u Rwanda. Ni amasezerano yasinywe na (...)

Mulisa ahangayikishijwe n’ibura ry’ibitego muri APR FC
Mulisa ahangayikishijwe n’ibura ry’ibitego muri APR FC

Umutoza mukuru wa APR FC, Mulisa Jimmy ahangayikishijwe bikomeye n’ikibazo cy’ubusatirizi bwe bumaze gutsinda gusa igitego kimwe mu mikino ine baheruka gukina. Ni nyuma y’uko APR FC iheruka (...)

Seninga mu ihurizo rikomeye mbere yo guhura na Rayon Sports
Seninga mu ihurizo rikomeye mbere yo guhura na Rayon Sports

Umutoza wa Police FC, Seninga Innocent ari mu mibare ihambaye yo kubona myugariro wo gufatanya na Umwungeli Patrick mu bwugarizi bwo hagati (Central defense) ku mukino uzahuza Police FC na Rayon (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.