2017-08-20 07:43:19 clouds 27o High | Kigali Rwanda

Dukurikire:
 
 

CHAN 2018: Uganda irakira Amavubi mu mukino ubanza wo gushaka itike

Yanditswe na IMVAHO NSHYA

Kuya 2017-08-12 10:04:17

 
Share on:
 
Yasuwe:60
 
Yavuzweho:200
 
10
 
10

Uganda-Rwanda (Kitende-15h00)

Ikipe y’igihugu ya Uganda, uyu munsi tariki 12 Kanama 2017, irakina n’ikipe y’igihugu y’u Rwanda umukino ubanza wo gushaka itike ya CHAN 2018 izabera muri Kenya kuva tariki 12 Mutarama kugeza 4 Gashyantare 2018.

Umukino urabera kuri Sitade ya St Mary Kitende saa kumi muri Uganda akaba ari saa cyenda ku isaha yo mu Rwanda.

Kuva ku wa Kane tariki 10 Kanama 2017 ikipe y’u Rwanda iri muri Uganda aho ku munsi w’ejo hashize bakoreye imyitozo ku kibuga cya St Mary Kitende baza gukiniraho umukino.

Mbere y’umukino buri ruhande rufite icyizere cyo kwitwara neza, umutoza w’agateganyo w’ikipe ya Uganda, Moses Basena yatangaje ko ikipe ye imaze iminsi yitwara neza ari na byo biza kubaha imbaraga zo kwitwara neza.

JPEG - 362.3 kb
Umutoza wa Uganda Cranes, Basena aganira n’abakinnyi mu myitozo mbere y’umukino baza gukina n’Amavubi

Umutoza w’Amavubi, Antoine Hey we avuga ko uyu mukino uza kuba ukomeye gusa intego bafite ari ugushaka uburyo babona umusaruro mwiza bityo mu mukino wo kwishyura bakazitwara neza.

Ni mukino urasifurwa n’abasifuzi bakomoka i Burundi bayobowe na Ndabihawenimana Pacifique yungirijwe na Baguma Gustave, Habimana Willy na Gatogato.

Komiseri w’uyu mukino akaba ari Mohamed Omar Abubaker Yusuf ukomoka muri Kenya.

Uganda ikunze guhangana n’u Rwanda mu mupira w’amaguru
Kuri ubu Uganda iri ku mwanya wa 73 ku isi naho u Rwanda ruri ku mwanya wa 119 ku rutonde rwa FIFA. Ibi ni ikigaragaza ko Uganda yitwara neza kurenza u Rwanda.

Ibi bihugu si ubwa mbere bigiye gukina, mu mikino yemewe na FIFA aya makipe yakinnye ni 30, Uganda yatsinze imikino 12, u Rwanda rutsinda 8 naho 12 aya amakipe aranganya.

Ikipe y’u Rwanda iheruka gutsinda Uganda muri 2003 mu gushaka itike y’imikino y’Afurika “CAN 2004”.

U Rwanda rwatsindiye Uganda iwayo igitego 1-0 naho mu Rwanda zinganya 0-0, uyu mukino uri mu byahesheje u Rwanda itike ya CAN 2004 bwa mbere mu mateka.

Umukino uheruka guhuza u Rwanda na Uganda wabaye mu mpera z’umwaka wa 2015 aho ku mukino wa nyuma muri CECAFA 2015, Uganda yatsinze Amavubi igitego 1-0.

Abakinnyi 11 bashobora kubanzamo

Uganda: Ismail Watenga, Nicholas Wadada, Isaac Muleme, Bernard Muwanga, Savio Kabugo, Deus Bukenya, Moses Waiswa, Muzamiru Mutyaba, Shafik Kagimu, Milton Kariisa na Derrick Nsibambi.

Rwanda: Nzarora Marcel, Nsabimana Aimable, Rucogoza Aimable, Manzi Thierry, Imanishimwe Emmanuel, Iradukunda Eric, Bizimana Djihad, Mukunzi Yannick, Nshimiyimana Amran, Nshuti Dominique Savio na Mubumbyi Barnabe.

Umukino wo kwishyura uzabera mu Rwanda kuri Sitade ya Kigali i Nyamirambo tariki 19 Kanama 2017. Ikipe izatsinda izahita ibona itike. Uganda imaze kwitabira CHAN inshuro 3 naho u Rwanda ni inshuro 2.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE