2017-08-23 07:41:18 clouds 27o High | Kigali Rwanda

Dukurikire:
 
 

Amagare: Uwizeyimana arifuza kwisubiza shampiyona y’igihugu

Yanditswe na IMVAHO NSHYA

Kuya 2017-05-24 06:45:27

 
Share on:
 
Yasuwe:60
 
Yavuzweho:200
 
10
 
10

Uwizeyimana Bonaventure ukinira Benediction Club y’i Rubavu nyuma yo kwegukana isiganwa rya 3 rya “Rwanda Cycling Cup 2017” ryavaga Ruhango risoreza i Karongi aratangaza ko ubu agiye gukomeza kwitegura shampiyona y’igihugu iteganyijwe tariki 24-25 Kamena 2017.

Uwizeyimana aravuga ko yifuza kwisubiza iyi shampiyona yegukanye umwaka ushize wa 2016 aho mu ntera yavaga Muhanga isorezwa i Huye yaje ku mwanya wa mbere naho Ndayisenga Valens akaba uwa mbere mu batarengeje imyaka 23.

Uyu mukinnyi urimo kwitwara neza muri iyi minsi nyuma yo kwegukana intera ya Ruhango kugera Karongi.

Yagize ati “Ubu ntabwo nzongera gutinya ahantu hazamuka, maze iminsi nkorana n’umutoza, bigenze neza uko mbyifuza ndumva nakongera nkegukana shampiyona y’igihugu”.

JPEG - 394.1 kb
Uwizeyimana Bonaventure ufite intego yo kwisubiza shampiyona y’igihugu mu gusiganwa ku magare (Foto Bugingo F)

Shampiyona y’igihugu izaba tariki 24-25 Kamena 2017. Ku munsi wa mbere hazaba gusiganwa n’igihe umukinnyi ku giti cye “Individual Time trial”, isiganwa rizabera i Nyamata naho tariki 25 Kamena 2017 habe isiganwa mu muhanda “Road Race” aho abasiganwa bazava i Muhanga bagere mu mujyi wa Kigali bazenguruke.

Iyi shampiyona y’igihugu yitabirwa n’abakinnyi bakina mu makipe ya hano mu Rwanda ndetse n’abakinnyi b’Abanyarwanda bakina mu makipe yo hanze.

Umwaka ushize Uwizeyimana Bonaventure akaba yarayegukanye akinira ikipe ya Team Dimension Data for Qhubeka aho yakinaga mu ikipe YA kabiri hamwe na Ndayisenga Valens ndetse na Niyonshuti Andrien ukinira ikipe nkuru.

Uretse aba bakinnyi bashobora no kugaragara muri shampiyona y’uyu mwaka wa 2017, hari Mugisha Samuel na Areruya Joseph nabo bakinira ikipe ya kabiri ya Dimension Data for Qhubeka.

Uwizeyimana Bonaventure aramutse yegukanye shampiyona y’igihugu uyu mwaka wa 2017 yaba abaye umukinnyi wa mbere uyegukanye yikurikiranya mu myaka 4 ishize kuko muri 2013 yegukanwe na Gasore Hategaka ukinira Benediction Club.

Muri 2014 yegukanwa na Ndayisenga Valens ubu ukinira ikipe ya Tirol Cycling Team yo muri Autriche, muri 2015 yegukanwa na Biziyaremye Joseph naho umwaka ushize yegukanwa na Uwizeyimana Bonaventure. Gusa Niyonshuti Andrien yegukanye iyi shampiyona inshuro 3 zikurikiranya (2010, 2011 na 2012).

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE