2017-10-17 06:58:11 clouds 27o High | Kigali Rwanda

Dukurikire:
 
 

Abanyezamu natoje ni bo ngenderwaho mu makipe yabo - Kabalisa Calliope

Yanditswe na IMVAHO NSHYA

Kuya 2017-05-08 13:25:05

 
Share on:
 
Yasuwe:146
 
Yavuzweho:200
 
10
 
10

Umutoza w’abanyezamu mu kipe y’ Isonga FC akaba yaranatoje ikipe y’igihugu y’abatarengeje imyaka 17 na 20, Kabalisa Calliope arishimira ko abanyezamu yatoje ubu benshi bari mu makipe akomeye kandi akaba ari abakinnyi ngenderwaho.

Ibi ni bimwe mu byo uyu mutoza yatangarije Imvaho Nshya mu kiganiro kibanze ku buzima bwe by’umwihariko mu mwuga w’ubutoza bw’abanyezamu.

Kabalisa ni muntu ki?

JPEG - 240.1 kb
Kabalisa Calliope muri CAN U-17 ubwo yatozaga abanyezamu b’Amavubi (Foto Bugingo F)

Kabalisa Calliope yavukiye mu Karere ka Ruhango mu 1970. Yize amashuri abanza mu Ruhango nyuma akomeza amashuri yisumbuye muri GS ESPAGNA i Nyanza . Aha ni ho yatangiriye gukina umupira w’amaguru mu rwego rw’amashuri akaba yarakinaga nk’umunyezamu. Ubu atuye ku Mumena mu Karere Nyarugenge.

Kabalisa yakinnye mu ngimbi z’ikipe ya Panthere Noir mu 1987-1988 akomereza muri Éclair FC nyuma ajya muri STIR FC ari na ho Jenoside yakorewe Abatutsi yabaye akina. Nyuma ntiyongeye gukina yakoze akazi gatandukanye , muri 2005 atangira umwuga wo gutoza.

Kabalisa yatoje mu makipe atandukanye

Kabalisa atangaza ko yatoje mu makipe atandukanye arimo ATRACO FC, Police FC, Sunrise FC ndetse n’Isonga FC atoza kugeza ubu. Uretse aya makipe kandi muri 2009 yari umutoza w’abanyezamu mu ishuri ry’umupira w’amaguru rya FERWAFA igihe hategurwaga ikipe y’abatarengeje imyaka 17 yaje gukora amateka ikajya mu gikombe cy’isi muri 2011. Akaba kandi yaranabaye mu ikipe y’igihugu y’abatarengeje imyaka 20.

Abo yatoje ubu ni bo ngenderwaho mu makipe yabo

Mu myaka 12, Kabalisa amaze ari umutoza w’abanyezamu amaze kuzamura abanyezamu benshi bamwe ubu bakaba ari bo ngenderwaho mu makipe yabo ndetse abandi bakaba ari abatoza.

Yagize ati “Kuva ntangiye ubutoza sinavuga ngo ni byiza cyane ariko na none si bibi. Icyo nishimira ni uko hagati ya 60 na 70% by’abanyezamu beza mu Rwanda baciye mu biganza byanjye bakiri abana. Ikindi kinshimisha ni uko hari abo natoje ubu uyu munsi na bo akaba ari abatoza”.

Abanyezamu bamuciye mu biganza bakaba bakina mu makipe akomeye harimo Mvuyekure Emery wa APR FC yatoje mu ngimbi za Police FC no mu batarengeje imyaka 17. Hari Ntaribi Steven na Kimenyi Yves bose bari muri APR FC aba yabatoje mu Isonga FC. Hari Kwizera Olivier umunyezamu wa mbere wa Bugesera FC yatoje mu Isonga FC, Mazimpaka Andre ukinira Mukura ubu akaba yaramutoje mu 2007-2008 muri Police FC.

Uretse aba banyezamu, Kabalisa avuga ko mu bo bagiranye ibihe byiza adashobora kwibagirwa ndetse akaba anamufana nk’umuhungu we ari Nzarora Marcel yatoje mu ishuri rya FERWAFA no mu ikipe y’igihugu y’abatarengeje imyaka 17, ubu uyu munyezamu akinira Police FC.

Kabalisa ati “ Yewe ni benshi sinzi ko nabarondora ngo mbarangize gusa ntabwo nakwibagirwa Nzeyurwanda Jimmy Djihad ubu ukinira Kiyovu, Itangishaka Jean Paul ukina muri Sunrise FC, Mbarushimana Emile ukinira Kirehe FC, hari kandi nka Mutuyimana Evariste (Rayon Sports) twabanye muri Police FC n’abandi bari mu cyiciro cya kabiri benshi”.

Hari abo Kabalisa yatoje ubu na bo batoza

Kabalisa avuga ko uretse abo yatoje bakiri bato ubu bari mu makipe ari abakinnyi ngenderwaho hari abo yatoje ubu babaye abatoza na bo. Aha yavuze Muhimpundu Rachid, umutoza w’abanyezamu muri Kiyovu akaba yaramutoje muri ATRACO FC muri 2006-2007.

Hari Ishimwe Alli utoza muri Kirehe FC, Hakizimana Charles “Macari” uri gutoza muri Bugesera FC akaba nawe yaramutoje muri ATRACO FC (2006-2007). Akomeza avuga ko yatoje Maniraguha Nicholas muri Sunrise FC ubu akaba atoza abana muri Rwamagana City. Ati “Kuba hari bane cyangwa batanu bari gutoza ubu natoje nishimira ko n’iyo nasaza naba naratanze umusanzu wanjye”.

Amaze imyaka 3 atagera mu ikipe y’igihugu

Kabalisa aheruka mu ikipe y’igihugu muri 2014 ubwo Amavubi U-20 yashakaga itike ya CAN U-20 2015. Gusa avuga ko yizeye kongera kugaruka mu ikipe y’igihugu kuko abona akazi ke agakora neza.

Amavubi U-17 yaramushimishije ariko aranamubabaza

Muri Mutarama 2011, Amavubi U-17 yakoze amateka abona itike yo kwitabira igikombe cy’isi. Kabalisa avuga ko nk’umwe mu batoza b’iyi kipe ari kimwe mu bintu byamushimishije mu buzima.

Ati “Hari taliki 11 Mutarama 2011 tubona itike y’igikombe cy’isi, dutsinze Misiri gusa nyuma y’iminsi 11 ni bwo nababaye cyane mu buzima tubuze igikombe nyuma yo gutsindwa na Burkina Faso kandi twari twarayitsinze mu mikino y’amajonjora”.

Nzarora ni we munyezamu wamushimishije

Kabalisa avuga ko Nzarora Marcel bagiranye ibihe byiza cyane. Ati “ Ndibuka turi mu gikombe cy’isi muri 2011 mu itsinda twarimo C hamwe n’u Bwongereza, Uruguay na Canada mu mujyi wa Pachuka n’ubwo tutarenze amajojora yabaye umunyezamu mwiza”.

Akomeza avuga ko mu bantu batakoze ibyo yifuza ari Nzarora. Ati “ Hari irushanwa twakinnye twitegura CAN U-17, ribera hano mu Rwanda harimo Kenya, Tanzania n’u Rwanda icyo gihe Nzarora yatsindishije ibitego abaturage bose bazinduka bavuga mu bitangazamakuru ngo mwamukuye he, nyuma yakinnye umukino ubanza wa CAN U-17 neza barongera baravuga bati cya gihe kuki mutakinishije uyu ntibamenye ko ari we”.

Kabalisa aremeza ko nta kibazo cy’abanyezamu kiri mu Rwanda

Uyu mutoza avuga ko nta kibazo cy’abanyezamu kiri mu Rwanda. Ati “Hari abatoza beza b’abanyezamu kandi bagerageza gutanga umusaruro ku buryo bugaragarira buri wese, kuko nta kipe wabona idafite umunyezamu cyangwa babiri beza . Ni ikintu nakwishimira nkagishimira na bagenzi banjye dufatanya aka kazi”.

Kabalisa akaba yaragize n’ubutumwa atanga ku iterambere ry’umupira w’amaguru mu Rwanda aho avuga ko igikenewe cyane ari ugushyira imbaraga mu bana. Ati “Iyo agiye azamuka mu kigero cye ni bwo azamuka neza, gufata umwana ukamushyira mu ikipe y’abakuru biramugora. Amakipe y’abana natangira gukina bizafasha kuko mu Rwanda hari abana bafite impano n’ibikorwa, umusaruro uzaboneka”.

Kabalisa Calliope ku myaka ye 47 atangaza ko ataratekereza ibyo guhagarika gutoza kuko yumva agifite imbaraga akaba abikora abikunze kandi akishimira ko hari byinshi yungukiyemo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE