2017-07-23 11:30:24 clouds 27o High | Kigali Rwanda

Dukurikire:
 
 

Ababanye na Rusheshangoga ntibazibagirwa ishyaka ryamuranze

Yanditswe na IMVAHO NSHYA

Kuya 2017-07-08 14:31:32

 
Share on:
 
Yasuwe:107
 
Yavuzweho:200
 
10
 
10

Abakinnyi, abayobozi n’abakunzi ba APR FC baravuga ko Rusheshangoga yari umukinnyi waranzwe n’ishyaka kuruta ibindi mu myaka itanu yari amaze muri iyi kipe.

Ku wa kabiri taliki 04 Nyakanga 2017, Rusheshangoga yakinnye umukino wa nyuma asoza atwara igikombe cy’Amahoro ku mukino APR FC yatsinzemo Espoir FC igitego 1-0. Uyu musore akaba yaguzwe na Singida FC yo muri Tanzania.

Muri uyu mukino abakunzi ba APR FC bakoze igikorwa cy’ubutwari bazana ibyapa byinshi byanditseho amagambo ashimira ibyo yabakoreye. Si abafana gusa kuko n’abakinnyi bose bamaze gutwara igikombe bambaye imyenda yanditseho numero 22 ya Rusheshangoga nk’ikimenyetso cyo kumushimira, anakora amateka y’umukinnyi rukumbi wa APR FC weretswe uru rukundo nyuma ya Mugiraneza Jean Baptitse wahawe ifoto mbere yo kwerekeza muri Azam FC.

Aba babanye nawe babwiye Imvaho Nshya ko Rusheshangoga ari umuntu ukwiriye icyubahiro cyane ko yari umuntu ugira ishyaka.

JPEG - 263.6 kb
Rusheshangoga Michel nyuma y’imyaka 5 akinira APR FC agiye kwerekeza muri Singida FC yo muri Tanzania

Rugwiro Herve ni myugariro bakinanaga muri APR FC ati “Ni umuntu tuzibukira ku ishyaka yagiraga mu kibuga”. Bizimana Djihad ukina hagati muri APR FC yagize ati ’’Ikintu gikomeye nzamwibukiraho ni uko yari umuntu mukuru mu mutwe, akanatera akanyabugabo abakinnyi bagenzi be mu kibuga bitandukanye n’abandi bakinnyi”.

Umunyamabanga mukuru wa APR FC, Kalisa Adolphe “Camarade” yagize ati “Ni umukinnyi w’umwana mwiza, w’umunyamwuga ushimishije cyane kandi wakitabaza ahantu hose ushaka. Ririya shyaka afite azarigumane”.

Ikindi gikomeye cyanagaragaye mu mikino ya nyuma ni ubushobozi bwo gukina ku mwanya wose wamukinishaho aho yavuye ku rundi rw’iburyo akaba akina nka myugariro wo hagati.

Bayisenge Emery ukina muri Maroc, bahoze bakinana mu makipe yose bacanyemo, yagize ati “Ni umukinnyi wuzuye, ugira ishyaka kandi ukina imyanya yose, akabasha gukina imyanya myinshi kandi uwo mwanya wose akinnyeho yerekana itandukaniro. Ni abakinnyi bake washyira ku mwanya ku mwanya atamenyereho akawitwaraho neza’’.

Mashami Vincent batangiranye mu ishuri ry’umupira w’amaguru muri FERWAFA akanamubera umutoza muri APR FC yagize ati “Wabonaga ari umukinnyi ufite gahunda umukinnyi wihuta. Ni umwana twabanye afite imyaka 14, ni umukinnyi ukina imyanya yose. Ni umwana ukunda barumuna be n’abo babyirukanye. Nanjye yaramfashije ibyo ngezeho uyu munsi hari uruhare yabigizemo’’.

Ibyo Rusheshangoga atazibagirwa kuri APR FC

Aganira n’Imvaho Nshya, Rusheshangoga yavuze ko ashimiye abikuye ku mutima urukundo umuryango wa APR FC wamugaragarije. Ati “APR yamfashije kubaka ubuzima bwanjye. Imfasha kuba uwo ndiwe uyu munsi. Ni agahinda kuhava’’.

Yakomeje agira ati “Sinzibagirwa imikino twagiye dutakaza muri uyu mwaka. Twageze hagati nanjye ncika intege kandi ari njye wari mu bakuru bagize ikipe. Ikindi sinzibagirwa uko twabuze igikombe cya CECAFA dutsinzwe na Vitalo mu 2013 hamwe no gukurwamo na Zanaco muri uyu mwaka’’.

Rusheshangoga Michael yabonye izuba kuya 25 Kanama 1994 muri RDC, akaba umuhungu wa gatanu muri barindwi ba Andre Sebaganwa na Nyirazaninka Abia.

Yatangiriye umupira i Muhanga aho yakuriye, ajya muri Academie ya FERWAFA mu 2008. Yari mu bakinnyi bakinnye CAN U-17 ndetse n’igikombe cy’isi cy’abatarengeje 17 mu 2011.

Yatangiriye mu Isonga mu 2011, agera muri APR FC muri 2012, kugeza ubu aho yerekeje muri Singida FC. Ku wa mbere taliki 10 Nyakanga 2017 ni bwo azerekeza muri Tanzania akaba azasanga yo Usengimana Danny wari rutahizamu wa Police FC.
BIZIMANA ERIC

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE