2017-07-21 15:15:02 clouds 27o High | Kigali Rwanda

Dukurikire:
 
 

WEF Africa: Iterambere rya Afurika rishingiye ku rubyiruko - Jeannette Kagame

Yanditswe na IMVAHO NSHYA

Kuya 2016-05-11 08:50:29

 
Share on:
 
Yasuwe:7
 
Yavuzweho:200
 
10
 
10

Umufasha wa Perezida w’u Rwanda, Jeannette Kagame asanga iterambere n’ikizere cy’ahazaza bya Afurika bishingiye ku bushobozi bw’urubyiruko mu guhanga udushya.

Jeannette Kagame yabivugiye mu ihuriro ry’urubyiruko ryabaye mu ntangiriro z’inama mpuzamahanga ku bukungu (World Economic Forum on Africa/WEF Africa), aho abasaga 300 biganjemo urubyiruko , ba rwiyemezamirimo, abagira neza, impuguke n’abandi bayobozi bigaga ku mahirwe y’ishoramari muri Afurika.

Jeannette Kagame yagize ati” Afurika izi neza ko isoko y’ubukungu n’iterambere byayo ari abagore n’abagabo bayituye. Ibyo bishingiye kandi ku bwenge bw’urubyiruko bufite ubushobozi bwo guhanga udushya.”

JPEG - 92.9 kb
Abayobozi batandukanye bunguranye ibitekerezo ku ishoramari muri Afurika

Umufasha w’umukuru w’igihugu yasobanuye ko kimwe mu byazana impinduka ku mugabane wa Afurika ari uburezi bufite ireme. Yasabye abitabiriye iyo nama kuhavana ubushobozi bwo guhindura byinshi iwabo.

Abandi bitabiriye inama batanze ibiganiro barimo n’umuyobozi w’ikigo Atlas Mara, Ashish Thakkar bagarutse ku kibazo cy’ubushomeri, basaba ko inzego zose zifatanya mu kukibonera umuri urambye.

Ati” Nk’abikorera dukwiye gufata iya mbere mu guhangana n’ubushomeri mu rubyiruko, tugaha amahirwe abagerageza kwihangira imirimo.”

Umuyobozi w’Ishami ry’Umuryango w’Abibumbye ryita ku Bagore muri Afurika, Diane Ofonwa yagaragaje ko nta kizagerwaho mu gihe cyose Abanyafurika bamwe batera imbere, abandi barimo abagore bagasigara inyuma.

Ati” Afurika iri gutera imbere ariko si buri munyafurika ushobora kwigobotora ubukene. Nta cyo twaba dukora igihe cyose hari abo dusiga inyuma.”

Ofonwa yasabye ko abafite ibikorwa bito n’ibiciriritse bakwitabwaho cyane ndetse n’iterambere rikagezwa mu cyaro ahari benshi basigaye inyuma.

Inama ya WEF Africa yahurije abasaga 1200 muri Afurika iriga ku iterambere ry’umugabane, imibereho myiza y’abawutuye ndetse no ku mbogamizi ziriho muri iki gihe zirimo n’ubushomeri.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE