2017-08-17 13:46:28 clouds 27o High | Kigali Rwanda

Dukurikire:
 
 

Uwakoze ‘Opération Turquoise’ yasobanuye byimbitse uko u Bufaransa bwaje kurwanya RPF

Yanditswe na Admin

Kuya 2016-04-11 05:18:50

 
Share on:
 
Yasuwe:25
 
Yavuzweho:200
 
10
 
10

Umusirikare mukuru w’Umufaransa yasobanuye ku buryo burambuye ibyo yabayemo muri « Opération Turquoise » ndetse avuga ko yari igamije guhagarika abasirikare ba RPF bari bamaze guhagarika Jenoside yakorewe Abatutsi mu 1994.

Guillaume Ancel w’imyaka 48 y’amavuko wari umwe mu basirikare bakomeye b’Abafaransa ndetse akaba yari n’umuyobozi muri Opération Turquoise yabwiye Jeune Afrique dukesha iyi nkuru ko amakabyankuru avugwa na Guverinoma y’u Bufaransa kuri «Opération Turquoise » ntaho ahuriye n’ukuri kuko ‘ukuri nyako kwa « Opération Turquoise » kwari uguhagarika umuvuduko w’ingabo za FPR Inkotanyi’.

Ancel avuga ko Opération Turquoise y’Abafaransa yatangiye ku wa 22 Nyakanga 1994 yari ifite intego yo kurasa ku basirikare ba RPF bari bagizwe ahanini n’Abatutsi barwanaga n’ingabo za guverinoma (Ex-FAR) zari zigizwe ahanini n’Abahutu bakoze Jenoside.

Uyu musirikare wari mu mutwe wa 68 w’ingabo z’u Bufaransa zirwanira ku kutaka yavuze ko bari boherejwe ngo barase ingabo za FPR bahagarike umuvuduko wazo mu gihe Guverinoma y’u Bufaransa ivuga ko « Opération Turquoise » yari ifite intego yo kurengera Abatutsi bicwaga.

JPEG - 78.3 kb
Bamwe mu basirikare b’Abafaransa muri Operation Turquoise

Abajijwe amabwiriza yari yarahawe mbere yo kujya muri Opération Turquoise, Guillaume Ancel yagize ati « Amabwiza nahawe ku ikubitiro ku itariki ya 24 Kamena 1994 yari asobanutse, kwari ugutegura kugaba igitero mu murwa mukuru w’u Rwanda, Kigali igice kinini cyari kimaze kwigarurirwa na FPR. Umwihariko w’itsinda ryanjye kwari ukuyobora abasirikare barwanira mu kirere (Tactical Air Control Party – TACP).

Nk’uko twari twinjijwe mu itsinda rishinzwe gukoresha indege zihiga abasirikare, inshingano zacu kwari ukubatesha umutwe ntibabone umwanya wo gutekereza. Nta masomo ahambaye aturuka mu ishuri rya gisirikare rya Saint-Cyr kumva ko iyo inyeshyamba zisumbirije umurwa mukuru ziba zigiye no gushyiraho ubuyobozi. »

Nta bitero byagabwe mu murwa mukuru w’u Rwanda

Nk’uko Guillaume Ancel yakomeje abitangariz, icyemezo cyo gushyira mu bikorwa kugaba igitero mu mujyi wa Kigali wari usumbirijwe n’abasirikare ba FPR ntabwo cyashyizwe mu bikorwa bitewe ahanini n’ikibazo cy’ibikoresho. Guillaume Ancel avuga ko ibikoresho byabo byaje bitinze ndetse bigasohorera i Goma. Ku rundi ruhande ngo yiyumvagamo ko ubutegetsi bugiye guhinduka. Guillaume Ancel yakomeje avuga ko hagati ya 29 Kamena n’itariki ya 1 Nyakanga 1994 bahawe amabwiriza asimbura aya mbere.

Yagize ati « Twagombaga guhagarika umuvuduko wa FPR mu burasirazuba bw’ishyamba rya Nyungwe ahagana mu majyepfo ashyira uburengerazuba bw’u Rwanda. Ku munsi wakurikiyeho bateguye indege zo mu bwoko bwa Kajugujugu (Super-Puma) zagombaga kujya kurasa ku basirikare ba FPR. »

Imigambi umutwe Guillaume Ancel yarimo ntabwo yaje kugerwaho kuko bari bagiye gutangira kurasa ku basirikare ba FPR ariko nabwo amabwiriza agahinduka. Mu gihe indege zari zateguwe zigiye guhaguruka i Bukavu, bahawe andi mabwiriza avuguruza aya mbere avuga ko hari amasezerano bamaze kugirana na FPR.

Kuva icyo gihe ngo batangiye kurinda abaturage mu bice bimwe abasirikare ba FPR bari barafashe. Ancel yagize ati « Kuva icyo gihe ni bwo ubutumwa bwahindutse bwitwa ko turinda abaturage ariko ubundi kwari ukurwanya FPR. »

Abasirikare b’Abafaransa bari bafite mu biganza ubuzima bw’abantu benshi

JPEG - 110.2 kb
Guillaume Ancel uvuga ko Opération Turquoise yari igamije kurasa FPR (Foto internet)

Guillaume Ancel abajijwe uburyo bashyize mu bikorwa inshingano bari bahawe yo kurinda abantu yagize ati « Twoherejwe mu nkengero za Cyangugu no mu majyepfo y’ikiyaga cya Kivu. Uwari atuyoboye yahisemo ko dushyira inkambi yacu mu nkengero z’inkambi ya Nyarushishi yarimo impunzi nyinshi. Yari yaramaze kubwirwa n’Umuyobozi w’iyi nkambi Umusuwisi wakoraga muri Komite Mpuzamahanga itabara imbabare (Croix-Rouge) ko iyo nkambi ishobora kwibasirwa n’ibitero bikomeye by’Interahamwe. »

Abajijwe niba hari imikoranire ya hafi hagati y’ingabo z’u Bufaransa n’abasirikare ba (Ex -FAR), Guillaume Ancel yagize ati « Nahawe amabwiriza yo gupakira intwaro mu makontineri mu makamyo akerekeza mu cyahoze cyitwa Zaire kuzishyikiriza Abasirikare ba (Ex-FAR). »

Guillaume Ancel yakomeje avuga ko muri icyo bihe bahaye intwaro ibihumbi n’ibihumbi, impunzi z’Abahutu zahungaga zigana mu cyahoze kitwa Zaire (RDC) zirimo Pisitoli (pistolets), na grenades. Akomeza avuga ko mu kwezi kwa Nyakanga 1994 hagati yongeye gutegekwa gupakira imbunda mu makamyo asanzwe atari aya gisirikare akazijyana mu cyahoze kitwa Zaire (RDC) mu rwego rwo kugira ngo hatagira umunyamakuru urabukwa akazishyikiriza abasirikare ba (Ex-FAR).

Guillaume Ancel avuga ko yabwiwe inshuro nyinshi ko agomba gukoresha uburyo bwose bushoboka abasirikare ba Ex-FAR ntibabone ko babatereranye.U Bufaransa ngo bwanahaga agahimbazamushyi ingabo za (Ex-FAR).

Guillaume Ancel abajijwe niba yemeza ko u Bufaransa bwakomeje gufasha abasirikare ba Ex-FAR basize bakoze Jenoside mu Rwanda, Ancel yabaye nkaho abyemeza. Yagize ati « Mu kubaha ibihumbi n’ibihumbi by’intwaro, twahinduye inkambi z’impunzi, inkambi za gisirikare. »

Guillaume Ancel yavuze ko Guverinoma y’u Rwanda iyobowe na Perezida Paul Kagame itari kwihanganira ko abasize bakoze Jenoside mu Rwanda bakomeza kwidegembya mu karere. Ibi ngo byafashije abantu bari bamaze imyaka isaga ibiri mu mashyamba ya Congo barongera barataha.

Guillaume Ancel abajijwe icyo atekereza ku bivugwa na Leta y’u Bufaransa kuri Operation Turquoise aho ivuga ko yari igamije kurokora abicwaga, Guillaume Ancel yagize ati « Ubwanjye ndavuga ibyo nabayemo mu bihe byashize niba ibyo bavuga bitajyanye n’ibyo mvuga ni ikibazo. Bubatse amateka y’amakabyankuru kuri opération Turquoise ahabanye n’ukuri. Niba bashaka ko ibyabaye bitazasubira ukundi ni bakinire amakarita ku meza aho kuyakinira munsi ya tapi. »

Mu gitabo cye "Vents Sombres Sur Le Lac Kivu" umuntu agenekereje mu Kinyarwanda "Umuyaga w’Icuraburindi ku Kiyaga cya Kivu", Ancel agaragaza ko mu mpera z’ukwezi kwa Nyakanga 1994, u Bufaransa bwahaye intwaro nyinshi ingabo zari iz’u Rwanda zahungiraga muri Zaire zasize zigize uruhare muri Jenoside yakorewe Abatutsi.

Ubuhamya bwa Lt Col Guillaume Ancel wari ufite ipeti rya kapiteni ubwo yari mu Rwanda bwibazwaho byinshi ku ruhare rw’u Bufaransa muri Jenoside yakorewe Abatutsi dore ko abayobozi b’iki gihugu badahwema kwitaza icyo kibazo.

Guillaume Ancel yageze imbere y’ubutabera asobanura ibya "Opération Turquoise"

Muri Gicurasi 2014 Guillaume Ancel yagejejwe imbere y’urukiko rwisumbuye rw’i Paris ahatwa ibibazo n’Umucamanza Claude Choquet ukurikirana ibyaha bya Jenoside n’ibyibasiye inyoko muntu.

Igihugu cy’u Bufaransa ni kimwe mu bishyirwa mu majwi mu kugira uruhare muri Jenoside yakorewe Abatutsi mu Rwanda. Mu byaha abasirikare b’Abafaransa bashinjwa kuba barakoreye mu Rwanda ndetse n’u Rwanda rwakunze kujya rugaragariza ibimenyetso birimo n’abatangabuhamya harimo gufata ku ngufu abakobwa, gutererana ku bwende abari mu kaga mu Bisesero bakicwa n’Interahamwe n’ibindi.

.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE