2017-06-28 08:00:46 clouds 27o High | Kigali Rwanda

Dukurikire:
 
 

U Rwanda rwashimiwe kuba mu bihugu bifite abantu bake mu magereza

Yanditswe na IMVAHO NSHYA

Kuya 2017-05-16 13:03:52

 
Share on:
 
Yasuwe:333
 
Yavuzweho:200
 
10
 
10

Umuyobozi w’Ihuriro Nyafurika ry’Urwego rw’Amagereza, ACSA, Col. Dr. Byabashaija Canon Johnson yashimiye uburyo u Rwanda ruri mu bihugu bifite abantu bake mu magereza kandi hashize igihe gito rwibasiwe na Jenoside yakorewe Abatutsi mu 1994.

Mu nama y’iri huriro yabereye i Kigali ku ya 15 Gicurasi 2017, Byabashaija yasabye bagenzi be bayoboye urwego rwo gucunga amagereza mu bihugu bya Afurika kwigira ku Rwanda ku buryo ubucucike bw’imfungwa n’abagororwa bwagabanuka.

Ati “Ntibyumvikana kuba u Rwanda rufite umubare muto w’abafungiye mu magereza nk’igihugu kivuye muri Jenoside, mu gihe amagereza mvuze haruguru uhasanga umubare munini.”

JPEG - 80.4 kb
Col. Byabashaija uyobora urwego rw’amagereza muri Uganda n’Ihuriro ACSA

Avuga ko umubare muto mu magereza wabonekaga mu gihugu cy’u Bwongereza, ariko akaba atangajwe no kuba mu Rwanda hari umubare muto w’abagororwa ku buryo 35 bacungwa n’umucungagereza umwe, mu gihe muri Uganda umucungagereza umwe acunga abagororwa basaga 70.

Umuyobozi mukuru wa ACSA yashimye uburyo ubucucike butagaragara mu magereza y’u Rwanda, aho usanga gereza ifungiyemo abantu ku kigereranyo cya 95%, 5% gasigaye kakaba ari umwanya usigaye udafungiwemo umuntu, mu gihe ahandi mu magereza usanga ubucucike bukabije.

Ati “Mu Rwanda mubigenza mute ngo mubashe kugira abantu bake muri gereza zanyu ku buryo mutarenza 95%, mugasigaza umwanya ungana na 5% wafungirwamo abandi ariko ntimurenze. Turibaza uburyo u Rwanda rugera kuri ibyo byose kandi mu buryo bwiza, abari hano mwese mukwiye kwigira ku Rwanda.”

CGP Rwigamba George, Komiseri mukuru w’Urwego rw’Imfungwa n’Abagororwa, RCS, avuga ko kimwe mu bibafasha kutagira ubucucike mu magereza y’u Rwanda ari ukwagurwa ibikorwaremezo , ariko na byo bikaba bitaragera ku mubare wifuzwa.

Minisitiri w’Intebe Anastase Murekezi yasabye abayobozi b’amagereza muri Afurika gufasha abagororwa kongera umusaruro w’ibihugu mu rwego rwo gufasha za Guverinoma z’ibihugu.

Yatanze urugero rw’u Rwanda rwashyizeho politiki y’imirimo nsimburagifungo ifitiye igihugu akamaro (TIG), mu rwego rwo kongera umusaruro k’uru rwego bikunganira ingengo y’imari Leta itanga mu micungire y’amagereza.

Yagize ati “Ibihugu by’Afurika, abikorera na Sosiyete sivili, bafite inshingano zo gufasha ACSA mu kongera amafaranga Leta igenera uru rwego.”

Murekezi kandi yahamagariye abari bitabiriye iyi nama kuzasura ibice nyaburanga bigize u Rwanda nyuma y’inama barimo, mbere yo gusubira iwabo, kuko hari ibyiza byinshi byo gusura kandi abizeza ko aho bazajya hose mu Rwanda bazakirwa neza.

Abafashe ijambo muri iyi nama bose bashima ibyo u Rwanda rwagezeho mu micungire y’amagereza, mu gutanga ubumenyi n’ubushobozi ku bakozi b’Urwego rw’Igihugu rw’imfungwa n’abagororwa (RCS).

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE