2017-06-25 09:02:18 clouds 27o High | Kigali Rwanda

Dukurikire:
 
 

U Rwanda rurategura ibisabwa ngo rwandikishe inzibutso za Jenoside mu murage w’Isi

Yanditswe na IMVAHO NSHYA

Kuya 2017-05-30 09:03:50

 
Share on:
 
Yasuwe:265
 
Yavuzweho:200
 
10
 
10

Komisiyo y’Igihugu yo Kurwanya Jenoside, CNLG, ifatanyije n’Ihuriro Mpuzamahanga ry’Ahantu Ndangamateka, ICSC) byatangiye kwiga ku ngingo zizatuma inzibutso za Jenoside z’u Rwanda zuzuza ibisabwa na UNESCO zikandikwa mu murage w’Isi.

Mu nama nyunguranabitekerezo yatangiye muri iki cyumweru, impuguke ziraganira ku buryo abaturage cyane cyane abaturiye inzibutso za Jenoside yakorewe Abatutsi bagira uruhare mu kuzicunga no kuzibungabunga bigashimangira ukwandikishwa kwazo ku rutonde rw’Umurage w’isi.

Umunyamabanga Nshingwabikorwa wa Komisiyo y’Igihugu yo Kurwanya Jenoside (CNLG) Dr Bizimana Jean Damascene yavuze ko muri iyo nama u Rwanda ruzungukiramo ubunararibonye bw’ibindi bihugu bimaze kwandikisha inzu ndangamateka ku rutonde rw’umurage w’Isi.

JPEG - 209.4 kb
Dr Bizimana Jean Damascene, umunyamabanga nshingwabikorwa wa CNLG

Yavuze ko inama n’ibitekerezo bizatangirwa muri iyo nama bizafasha u Rwanda gutunganya neza ibisabwa ngo inzibutso enye za Jenoside yakorewe Abatutsi mu 1994 zishyirwe ku rutonde rw’umurage w’Isi.

Minisitiri w’Umuco na Siporo, Uwacu Julienne wafunguye iyo nama ku mugaragaro yavuze ko u Rwanda rwiyemeje gucunga neza ibimenyetso by’amateka, cyane cyane aya Jenoside yakorewe Abatutsi kugira ngo n’abazabaho mu gihe kizaza bazabashe gusobanukirwa neza n’ayo mateka bityo bahore birinda icyagarura amateka nk’ayo.

Inzibutso u Rwanda rushaka kwandikisha ku rutonde rw’umurage w’Isi rwa UNESCO ni urwibutso rwa Jenoside rwa Kigali ruri ku Gisozi, urwa Nyamata, Bisesero n’urwa Murambi.

UNESCO ivuga ko kugeza inzibutso ndangamateka zanditse mu murage w’Isi zikiri nkeya cyane, aho kugeza ubu izo ifite ari izirebana n’ubucakara bwakorewe abirabura, site ya Jenoside yakorewe Abayahudi, na gereza yo mu kirwa cya Robben aho umukambwe Nelson Mandela yafungiwe mu gihe yarwanyaga ivanguramoko (APARTHEID) muri Afurika y’epfo.

Kugeza ubu habarurwa ahantu h’ibimenyetso by’amateka hari ku rutonde rw’umurage w’Isi 1052 ku isi hose mu ngeri zinyuranye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE