2017-05-26 15:17:06 clouds 27o High | Kigali Rwanda

Dukurikire:
 
 

U Rwanda ntirwirukanye Abarundi rwabatumye ibyangombwa

Yanditswe na IMVAHO NSHYA

Kuya 2016-05-17 15:36:51

 
Share on:
 
Yasuwe:3
 
Yavuzweho:200
 
10
 
10

Guverineri w’Intara y’Amajyepfo, Munyentwari Alphonse aranyomoza amakuru avuga ko hari abaturage b’Abarundi babarirwa mu 1500 birukanwe mu gihugu igitaraganya.

Munyentwari avuga ko abasabwe gusubira iwabo, ari abakoreraga mu Rwanda nta byangombwa byuzuye bafite, basabwe kujya kubizana ubundi bakagaruka mu bikorwa byabo nk’ibisanzwe .

Mu kiganiro n’abanyamakuru cyabereye kuri uyu wa kabiri mu karere ka Gisagara, Guverineri Munyentwari yagaragaje impamvu zagendeweho mu gusaba bamwe mu Barundi batuye muri iyi ntara gusubira mu gihugu cyabo, aho yagaragaje ko ari icyemezo cyateguwe kandi kikanakurikiza amategeko ntawe uhutajwe.

Ati: “Nta murundi wirukanwe ahubwo basabwe kujya gushaka ibyangombwa kugira ngo uwinjira mu gihugu abe afite ibyangombwa byuzuye, uzabona ibyangombwa rero bisabwa afite uburenganzira bwo kugaruka.”

JPEG - 46 kb
Guverineri w’Intara y’Amajyepfo, Munyentwari Alphonse ahamya ko nta Murundi wigeze ahutazwa azira ko adafite ibyangombwa

Yongeyeho ko Abarundi bari mu Rwanda, bakwiye kumva ko bagomba gutunga impapuro zibemerera kuhaba byemewe n’amategeko.

Yagize ati: “ Hari rero amategeko aba asabwa kubahirizwa mu gihe uvuye ahantu ujya ahandi ndetse ntunasabwa kubyibutswa, nibyo rero dusaba ko buri wese yakubahiriza amategeko bagakora ibisabwa bakagira ibyangombwa bibaranga.”

Hari Abarundi badafite ibyangombwa bemerewe kuba bagumye mu Rwanda

Ku rundi ruhande hari bamwe mu Barundi bafite ibikorwa mu Rwanda, bavuga ko nubwo badafite ibyangombwa byuzuye, ubuyobozi bwabahaye uburenganzira bwo kubanza kwisuganya mbere yo kugenda, kugira ngo bashake impamba, ndetse n’imyaka bahinze bakayisarura. Benshi muri bo bafite abana biga ndetse n’amasambu.

Nahimaba Francois yagize ati: “ Ubu tumaze imyaka isaga icumi mu Rwanda dufite amasanbu, dufite abana biga, dufite imyaka mu mirima, twasabye rero ko twabanza kwitegura tugasarura imyaka yacu kandi ubuyobozi bwarabitwemereye nta kibazo.”

Nyiracumi Gaudiose , nawe ni Umurundikazi atuye mu mudugudu wa Zihare mu murenge wa Kibirizi, agaragaza ko n’ubwo amakuru y’ibigendanye n’ibyangombwa yayumvise ntawigeze amuhutaza.

Mu karere ka Gisagara honyine, ngo habarurwa abarundi basaga 1700 bahaba badafite ibyangombwa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE