2017-05-22 14:46:21 clouds 27o High | Kigali Rwanda

Dukurikire:
 
 

U Rwanda na Guinea byasinye andi masezerano atanu

Yanditswe na IMVAHO NSHYA

Kuya 2016-05-19 15:03:19

 
Share on:
 
Yasuwe:1
 
Yavuzweho:200
 
10
 
10

Leta y’u Rwanda n’iya Guinea Conakry kuri uyu wa 19 Gicurasi 2016, byashyize umukono ku masezerano atanu yiyongera ku yandi arindwi yasinywe ku ya 09 Werurwe 2016 ubwo Perezida Paul Kagame yasuraga icyo gihugu.

Ayo masezerano yashyizweho umukono na Minisitiri w’Ububanyi n’Amahanga, Louise Mushikiwabo ku ruhande rw’u Rwanda ndetse na Minisitiri w’Ubuzima, Dr. Abdourahmane Diallo ku ruhande rwa Guinea.

Minisiteri y’Ububanyi n’Amahanga yatangaje ko amasezerano yashyizweho umukono ari ay’Ubufatanye mu Miyoborere no kwegereza Ubuyobozi Abaturage mu bihugu byombi, ay’Ubufatanye muri Siyansi, Ikoranabuhanga n’Amashuri makuru na za kaminuza, ay’Ubuhinzi, ay’Umurimo n’Abakozi ba Leta ndetse n’ay’Ikoranabuhanga mu Isakazamakuru n’Itumanaho (ICT).

JPEG - 51.3 kb
Minisitiri Mushikiwabo na Diallo basinya ayo masezerano

Minisitiri Mushikiwabo yavuze ko u Rwanda rwishimiye gukorana na Guinea mu gushyira mu bikorwa ayo masezerano.

Ati” Gusinya aya masezerano ni ugukomeza ubufatanye bwari busanzwe hagati y’ibihugu byombi. Twiyemeje kuyabyaza umusaruro ku bw’imibereho myiza y’abaturage bacu, no gushyira mu bikorwa ibyo abakuru b’ibihugu bemeranyije.”

Yongeyeho ko hari kwigwa ku buryo indege za RwandAir zatangira ingendo muri Guinea nyuma y’uko byemeranyijweho n’ubuyobozi bw’ibihugu byombi.

Minisitiri Diallo yavuze ko hari byinshi Guinea yungukiye ku Rwanda. Ati” Nk’uko perezida wacu yabivuze twishimira cyane iterambere u Rwanda rwagezeho. Gusinya aya masezerano, bizakurikirwa n’imishinga tuzafatanya. Mbasezeranyije ko tuzakorana tugatanga umusaruro ufatika.”

U Rwanda na Guinea byari bisanzwe byaremeranyije kuvaniraho viza abaturage bafite pasiporo za kidipolomasi n’iz’akazi, n’aho abafite pasiporo zisanzwe bagahabwa viza bagiye kwinjira mu gihugu.

Ibi bihugu byanasinye amasezerano arebana n’ubufatanye mu buvuzi, igenamigambi, ishoramari, ibidukikije n’ingendo z’indege.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE