2017-06-25 09:02:18 clouds 27o High | Kigali Rwanda

Dukurikire:
 
 

U Bubiligi: Perezida Kagame ati "nta gikwiye gutuma Afurika n’u Burayi birebana ay’ingwe"

Yanditswe na IMVAHO NSHYA

Kuya 2017-06-07 12:08:39

 
Share on:
 
Yasuwe:292
 
Yavuzweho:200
 
10
 
10

Perezida Kagame yitabiriye inama y’Iterambere ku Mugabane w’u Burayi (European Development Days, EDD) yabereye i Buruseli mu Bubiligi kuri uyu wa 7 Kamena 2017, agaruka ku kamaro ko guteza imbere abikorera, abagore n’urubyiruko, n’umuti ukwiye kuvugutirwa ikibazo cy’abimukira.

Mu ijambo yavuze mu muhango wo gufungura iyo nama, yavuze ko guteza imbere urwego rw’abikorera, uburinganire no gushakira amahirwe urubyiruko ari urufunguzo rw’ahazaza heza h’abatuye Isi bose.

Yagarutse ku kamaro k’urubyiruko mu guhanga udushya, cyane cyane udushingiye ku ikoranabuhanga ndetse yemeza ko urwego rw’abikorera rukora akazi guverinoma z’ibihugu zidashobora kwikorera.

Yakomeje ati “Inzira igana uburumbuke ntiyashoboka hirengagijwe uburenganzira bw’abagore n’ubushobozi bifitemo.”

JPEG - 125.1 kb
Perezida wa Komisiyo ya EU, Jean Claude Juncker yakira perezida Kagame amaze kuvuga ijambo

Perezida Kagame yashimye Umuryango w’Ubumwe bw’u Burayi ko ari umufatanyabikorwa ukomeye w’u Rwanda anemeza ko impande zombi zizakomeza kugirana ibiganiro bigamije inyungu.

Ikibazo cy’abimukira gishingiye kuri politiki mbi y’ibihugu bimwe

Umukuru w’igihugu yavuze no ku kibazo cy’abimukira, bakomeje kwisukiranya ku mugabane w’u Burayi ndetse abenshi bakarohama mu nyanja ya Mediterane.

Ati “Icya mbere ni uko agaciro n’umutekano w’abimukira mu gihugu bavuyemo n’icyo bagiyemo bikwiye kubahirizwa. Ikibazo cy’abimukira ni ingaruka mbi ya politiki zitigeze zitanga umusaruro.”

Yakomeje avuga ko mu gihe cyose hakiri ibihugu byumva ko gahunda zabyo ari zo zonyine zikwiye gukurikizwa, hazabaho ibibazo.

Yongeraho ati “Nitugirana ibiganiro bishingiye ku kuri kandi bifite intego nta mpamvu izatuma Afurika n’u Burayi byikangana. Dushobora gukora ibirushijeho, twese dufite inshingano n’amahirwe, nidukorera hamwe.”

Inama ya European Development Days yahuje abantu babarirwa mu 7000, ibiganiro byayo bizibanda ku bufatanye n’iterambere mpuzamahanga, imbogamizi zibangamiye iterambere muri iki gihe n’icyakorwa ngo ziveho.

Usibye Perezida Kagame, iyi nama yitabiriwe n’abandi banyacyubahiro barimo umwamikazi w’u Bubiligi, Mathilde, Umunyamabanga Mukuru Wungirije wa Loni Amina Mohammed, umuyobozi wa IMF, Christine Lagarde, n’umuyobozi w’Umuryango w’Ubumwe bw’u Burayi, Jean Claude Juncker.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE