2017-06-24 12:54:56 clouds 27o High | Kigali Rwanda

Dukurikire:
 
 

Perezida w’u Bushinwa yifuza ko Afurika irebera ku iterambere ry’u Rwanda

Yanditswe na IMVAHO NSHYA

Kuya 2017-03-18 09:54:54

 
Share on:
 
Yasuwe:1015
 
Yavuzweho:200
 
10
 
10

Perezida wa Repubulika y’u Rwanda, Paul Kagame n’umufasha we Jeannette Kagame baganiriye na Perezida w’u Bushinwa, Xi Jinping n’umufasha we, bagaruka ku mubano w’ibihugu byombi ndetse banemeranya gukomeza ubufatanye.

Ubwo Jinping yabakiraga ejo hashize, yavuze ko uruzinduko rwa Perezida Kagame ari intambwe igaragara mu mubano w’ibihugu byombi, ashimangira ko azatanga igihugu cye kizagira uruhare mu kubaka agace kagenewe inganda k’Umujyi wa Kigali.

Yashimye uburyo u Rwanda rukomeje gutera imbere, yongeraho ko u Bushinwa bwifuza kubona n’ibindi bihugu bya Afurika biteye ikirenge mu cyarwo.

Yakomeje avuga ko u Bushinwa buzakomeza kwizera no kubanira u Rwanda, ibi bihugu bigafatanya mu guteza imbere imibereho y’abanyagihugu.

Perezida Kagame yashimye uburyo u Bushinwa bufasha u Rwanda mu iterambere binyuze mu bikorwa bitandukanye birimo ibikorwa remezo; n’uburyo ubushinwa bushyira ingufu mu guteza imbere abaturage babwo ari nako bugendera ku ndangagaciro zo kubaha ibihugu bya Afurika.

Umukuru w’Igihugu yasabye u Bushinwa gukomeza gukorana n’u Rwanda cyane cyane mu guteza imbere inganda, atumira abanyenganda bo muri icyo gihugu kugana isoko ry’u Rwanda.

Ati “U Rwanda rukomeje korohereza abashoramari kuko ari ingenzi mu kuzamura inganda. Twifuza gufatanya birenzeho mu kuziteza imbere kandi ndasaba ibigo byo mu Bushinwa gushora imari mu rwego rw’inganda rw’u Rwanda.”

Perezida Kagame yanasabye mugenzi we Jinping kuzasura u Rwanda.

Ibi bihugu byemeranyije kuzamura gahunda y’ibikorerwa mu Rwanda , Made in Rwanda, kuzana ikoranabuhanga mu buhinzi, binyuze mu guhanahana impuguke n’amahugurwa, kubaka ibikorwa remezo, gutanga amahugurwa mu binyanye no gusakaza amashanyarazi, guteza imbere ubwikorezi n’ingufu.

U Rwanda n’u Bushinwa kandi bizafatanya mu bukerarugendo, ingabo, ibikorwa byo kubungabunga amahoro no kwizerana mu buryo bwa politiki.

U Bushinwa ni kimwe mu bihugu bishora imari cyane mu Rwanda, hagati ya 2010 na 2016, Ikigo cy’Igihugu cy’Iterambere, RDB, cyabaruye ibigo 45 by’Abashinwa.

Kimwe muri ibyo bigo ni Century Park and Residence Ltd gifite umutungo wa miliyari 54 gishora imari mu kubaka amahoteli n’amacumbi.

Byitezwe ko nyuma y’uruzinduko rwa Perezida Kagame, Abashinwa bazagaragara cyane mu bwubatsi bw’imihanda, inyubako n’inganda nyinshi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE