2017-08-21 15:16:56 clouds 27o High | Kigali Rwanda

Dukurikire:
 
 

Perezida Kagame yishimiye ko u Rwanda ruzakira ikigo cy’intego z’iterambere rirambye

Yanditswe na IMVAHO NSHYA

Kuya 2016-09-20 08:53:06

 
Share on:
 
Yasuwe:33
 
Yavuzweho:200
 
10
 
10

Perezida Paul Kagame yatangaje ko u Rwanda rwishimiye kwakira icyicaro cy’ikigo kizakurikirana ishyirwa mu bikorwa ry’intego zigamije iterambere rirambye muri Afurika, SDG Center for Africa.

Ku wa 19 Nzeli , Perezida Kagame yayoboye inama ya Gatatu y’ubuyobozi bw’icyo kigo yabereye i New York, ahari kubera inteko rusange y’Umuryango w’Abibumbye ku nshuro ya 71.

Iyo nama yanitabiriwe na Perezida wa Benin, Patrice Talon, Alpha Conde wa Guinea Conakry Filipe Jacinto Nyusi wa Mozambique, Jeffrey David Sachs uyobora Ikigo cy’Ubushakashatsi cya Earth Institute n’Umuherwe Aliko Dangote wo muri Nigeria.

Perezida Kagame yavuze ko afite ubushake bwo gukorana na bagenzi be maze imishinga yose y’Intego z’Iterambere rirambye igashyirwa mu bikorwa neza.

Ati ”Twiteguye gukorana namwe mwese ngo Afurika ishyire ingufu zose zishoboka muri aya masezerano. Izi ntego zunga muri gahunda z’ibihugu byacu zo guharanira iterambere ridaheza.”

Perezida Kagame kandi yibukije uruhare rukomeye rw’abaturage ba buri gihugu n’abikorera mu gushyigikira intego z’iterambere rirambye.

Ati” Uruhare rw’abaturage, uburinganire n’ubufatanye n’urwego rw’abikorera, ikoranabuhanga cyane cyane umuyoboro mugari wa murandasi ni ingenzi mu iterambere. Ariko turacyafite byinshi byo gusangira hagati yacu no kwigira ku dushya n’ibyagezweho mu bindi bice by’Isi.”

Umukuru w’Igihugu kandi yitabiriye inama yo ku rwego rwo hejuru yiga ku mugore n’uburumbuke mu bihugu bya Afurika y’Amajyaruguru y’Uburengerazuba.

Yagarutse ku buryo u Rwanda rwateje imbere abagore bagahabwa umwanya mu mashuri , mu bikorwa bibabyarira inyungu no mu nzego zifata ibyemezo.

Perezida Kagame yavuze ko kuba mu Rwanda abagore bafite imyanya ingana na 64% mu nteko ishinga amategeko, 42% muri guverinoma na 50% mu nzego z’ibanze ari amateka adasanzwe ku Isi.

Ati ariko”Sintekereza ko ibyo twakoze ari igitangaza, n’abandi babishobora. Ibyo twagezeho ni urugero rw’uko bishoboka n’abandi baturage babigeraho.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE