2017-08-20 07:43:19 clouds 27o High | Kigali Rwanda

Dukurikire:
 
 

Perezida Kagame yikomye abahimbira amazina Jenoside yakorewe Abatutsi mu 1994

Yanditswe na IMVAHO NSHYA

Kuya 2017-04-07 11:37:38

 
Share on:
 
Yasuwe:686
 
Yavuzweho:200
 
10
 
10

Mu ijambo Perezida Kagame yagejeje ku Banyarwanda kuri uyu munsi wo Kwibuka ku nshuro ya 23 Jenoside yakorewe Abatutsi mu 1994, yanenze abashaka kuyihindurira inyito kubera inyungu zabo bwite.

Yatangiye ahumuriza abarokotse Jenoside, ababwira ko nubwo batakaje imiryango, batari bonyine kuko bagifite umuryango mugari w’igihugu cyabo. Yanenze abatereranye u Rwanda ubwo Abatutsi bicwaga, yaba ibihugu cyangwa abantu ku giti cyabo ariko anashimira abitanze bakagira icyo bakora.

Yagize ati “Usubije amaso inyuma mu mateka, n’ibi byose bijya kuba, hari abatereranye abantu ari abantu ku giti cyabo ari n’amahanga. Ariko hari n’abagize icyo bagerageza gukora harimo Abanyafurika bamwe. Bitari na kera, n’ejobundi umuryango w’Ubumwe bwa Afurika uhagarariwe n’umushyitsi mukuru dufite hano, barahagurutse baranga, bavuga ko Abanyarwanda badakwiriye gutotezwa.”

Perezida Kagame yanenze Loni ariko nanone avuga ko ari umuryango ufite ibihugu biwihishe inyuma ku buryo iyo hagize ikibi kiba ibyitirirwa, ariko hagira ikiza kiba ibyo bihugu akaba ari byo bishimwa.

Yashimye Umunyasenegali wari mu ngabo za Loni mu Rwanda, MINUAR, watabaye Abatutsi bicwaga nubwo yari atabyemerewe, abasirikare ba Ghana n’abandi barimo abo ku mugabane wa Amerika n’u Burayi.

Umukuru w’Igihugu yagarutse ku bantu bapfobya Jenoside bakayihimbira amazina anyuranye bashaka kugoreka ukuri, batitaye ku gaciro k’ubuzima bw’ababarirwa muri miliyoni bwatakaye muri Jenoside yakorewe Abatutsi.”

Ati “ Nk’ubu iyo wumva ibiganiro biri hanze aha biri mu magambo, bakagenda bakavuga ngo ‘ariko ngo iyo Jenoside si iy’Abatutsi, ni iyo muri 1994 ... Bikajya aho, bashakisha uko bita icyabaye, ntibikiri ubuzima bw’abantu bwahatakaye. Turi abantu beza ariko turi n’abantu babi, iyo haje akantu gato twerekana inenge zacu, haboneka abatanze ubufasha ngo ntishobora kuyita Jenoside yakorewe Abatutsi, turayita Jenoside yo mu 1994, Jenoside yakorewe Abatutsi n’Abahutu bamwe n’ibindi.”

Yasobanuye ko ababa biga ku mazina yo kwita Jenoside ari nabo bagize uruhare mu kuyikora. Ati “Ngo bazanye impuguke, zo gukora iki? Zo kugarura abacu bapfuye? Abanyarwanda ntidukwiye gushukwa n’ibyo, dufite ubuzima tubayeho.”

Perezida wa Repubulika yagarutse ku kuba Kiliziya Gatolika yaremeye gusaba imbabazi avuga ko yanyuzwe n’uburyo ikibazo cyari hagati yayo n’u Rwanda cyakemutse ndetse anashimira Papa.

Yanenze cyane ibindi bihugu bitemera ko byagize uruhare muri Jenoside yakorewe Abatutsi ahubwo bikavuga ko abayirokotse ari bo bayikoze. Yashimangiye ariko ko ntacyo bateze gukora ku Rwanda kabone nubwo bumva ko bafite ingufu.

Ati “ Ariko hari abandi bakigorwa no kugerageza kumva uruhare rwabo, bamaze imyaka 23 ariko ntibizatubuza kugera ku iterambere, uko bavuga ko bafite ingufu kose, dufite abarokotse hano, bakaza bavuga ko ari bo bakoze makosa. Nta nubwo tubasaba amafaranga, ntayo wabona ahwanye n’ubuzima bw’abasaga miliyoni bwatikiye. Dushaka ukuri. Kuri ubu tuzabana nabo ariko hari aho tutazarenza kwihanganira.”

Umuyobozi wa Komisiyo y’Umuryango w’Ubumwe bwa Afurika, Moussa Faki Mahamat yavuze ko yababajwe na Jenoside yakorewe Abatutsi igahitana imbaga, ndetse n’ubuzima bw’impfubyi n’abapfakazi yasize iheruheru.

Yakomeje agira ati “Icyo navuga ni uko mbubashye, ariko ikitumara agahinda ni imbaraga, n’agaciro k’iki gihugu gitanga urugero rwo kongera kwiyubaka, u Rwanda rwariyubatse rusubira ku murongo rwubaka izina muri afurika n’ahandi ku Isi.”

Mahamat yashimiye Perezida Kagame avuga ko amwubahira imiyoborere myiza yashoboye kuvana u Rwanda ahabi none rukaba rumaze kubera urugero ibihugu bya Afurika.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE