2017-08-23 07:41:18 clouds 27o High | Kigali Rwanda

Dukurikire:
 
 

Perezida Kagame yayoboye inama ku mpinduka z’umuryango w’Ubumwe bwa Afurika (Amafoto)

Yanditswe na IMVAHO NSHYA

Kuya 2017-05-07 15:29:20

 
Share on:
 
Yasuwe:352
 
Yavuzweho:200
 
10
 
10

Perezida Kagame yayoboye inama yiga ku mpinduka mu muryango w’Ubumwe bwa Afurika, AU, yahuje abaminisitiri b’ububanyi n’amahanga b’ibihugu byo kuri uyu mugabane kuri uyu wa 7 Gicurasi 2017.

Yasobanuye ko abakuru b’ibihugu bya Afurika bafashe imyanzuro itandukanye yo kugira ngo umuryango wa AU ugere ku ntego hatitabajwe inkunga y’ibihugu byo ku wundi mugabane.

Yavuze ko we n’impuguke bize ku mpinduka zikwiye kugira ngo AU itange umusaruro kurushaho, bagasanga inzira ikiri ndende ariko bikazagerwaho igihe habayeho ubufatanye no kwigira ku masomo y’ahandi.

Ati “Raporo nagejeje ku nteko ya AU ntabwo ari ibitekerezo byizanye. Dufashijwe n’akanama ngishwanama, twatekereje ku buryo byose bushoboka mu guhindura imikorere ya AU.Inzira iracyari ndende, kandi ishobora kuba ari inzitane. Ni byiza ko tutacikwa n’amahirwe dufite yo kwigira ku masomo ahari n’ayo mu bihe byashize.”

Umukuru w’igihugu yasobanuye ko impinduka u Rwanda rwakoze nyuma ya Jenoside yakorewe Abatutsi mu 1994 zikwiye kubera urugero Afurika muri rusange hakabaho guhindura imyumvire no gufatanya.

Yagize ati “Kugirango u #Rwanda rutere imbere, Abanyarwanda bahisemo gushyira hamwe biyemeza kutazasubira mu icuraburindi. Abanyarwanda babanje guhindura imyumvire, bumvako batagomba kwicara ngo bategereze ak’i Muhana. Guhindura imyumvire bisaba kubanza kumva ubukungu dufite haba mu butaka bwacu ariko cyane cyane mu mitwe yacu […] Aho kwirirwa dushaka impamvu yatuma ntacyo dukora, reka turebere hamwe ibituma dukora cyane. Igikomeye muri byose ni uguhindura imyumvire, tukemera ko ntawundi uzabidukorera. Twabishobora.”

Perezida Kagame yasobanuriye abitabiriye inama ko gutanga inkunga ya 0.2% y’ibyo buri gihugu cyinjije mu misoro bigamije guhesha Afurika ubwigenge nyabwo bityo ntizagire ahandi itega amaboko.

Ati “ Uburyo bwo gutanga 0.2% kubyo twinjiza mu gufasha AU, ni ukugirango twigenge nk’Abanyafurika.”

Yasabye abaminisitiri b’ububanyi n’amahanga kugeza impinduka za AU ku baturage b’ibihugu baturutsemo, ndetse bakanabibutsa ko Abanyafurika bakwiriye kunga ubumwe, kuko kutumva ibintu kimwe ari byo bituma uyu mugabane uhora usigara inyuma.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE