2017-10-16 07:05:01 clouds 27o High | Kigali Rwanda

Dukurikire:
 
 

Perezida Kagame yashimiye ‘Global Fund’ yazamuye ikizere cyo kubaho cy’Abanyarwanda

Yanditswe na IMVAHO NSHYA

Kuya 2017-05-03 11:35:39

 
Share on:
 
Yasuwe:270
 
Yavuzweho:200
 
10
 
10

Umukuru w’Igihugu cy’u Rwanda, Paul Kagame, yashimiye byimazeyo umuryango utera inkunga ibikorwa by’ubuzima, Global Fund, avuga ko inkunga yawo yatumye ikizere cyo kubaho cy’Abanyarwanda kizamukaho imyaka isaga 20.

Ni mu ijambo Perezida Kagame yagejeje ku bitabiriye inama nyobozi ya 37 ya Global Fund yateranyije abanyamuryango 260 mu mujyi wa Kigali kuri uyu wa 3 Gicurasi 2017.

Yasobanuye ko uwo muryango ari umufatanyabikorwa ukomeye wa Leta y’u Rwanda, kuko wayifashije kwita ku barwayi b’agakoko ka SIDA ubu benshi bakaba bafata imiti igabanya ubukana ku buntu, ndetse n’umubare w’abicwaga n’igituntu na Malaria ukaba waragabanutse cyane.

JPEG - 279.8 kb
Perezida Paul Kagame (wicaye imbere)yagaragaje akamaro ko gukorana na Global Fund, avuga ko byatanze umusaruro

Perezida Kagame yashimiye uburyo Global Fund itera inkunga u Rwanda ishyize imbere ubufatanye n’ubwubahane.

Ati “ Ukwaguka k’ umuryango Global Fund byaziye rimwe no kugera kuri byinshi mu rwego rw’ubuzima mu Rwanda . Uku gutera imbere ntabwo byari kugerwaho iyo hatabaho ubufatanye busesuye mu rwego rwo kuzamura ubuzima burambye. Uwavuga ko Global Fund ari umufatanyabikorwa wagaragaje inkunga ikomeye mu mateka yacu ntiyaba abeshye.”

Umukuru w’Igihugu yagarutse ku mikorere myiza y’umuryango Global Fund ituma amafaranga ashorwa aho agira akamaro.

Yagize ati “ Ubwacyo, ikigega Global Fund ni gishya, ariko ni n’uburyo bushya bw’imikorere. Ikigega Global Fund cyazanye uburyo nyabwo bwo gukora kandi butikanyiza. Ntibikwiye gufatwa nk’ibisanzwe. Birashoboka ndetse biranoroshye ko abantu bashyira amafaranga aho adakoreshwa neza n’aho nta bikorwa bifatika bigerwaho.”

Yasobanuye ko imikorere ya Global Fund igendeweho mu guhangana n’ibindi bibazo by’Isi byakemuka bidatinze kubera ishingiye ku bufatanye.

Perezida Kagame yemeje ko inkunga ya Global Fund izakomeza gufasha kuramira ubuzima hirya no hino ku Isi, ndetse asaba ko uyu muryango ukomeza gukorera mu mucyo.

Ati “Ndashima uburyo ikigega Global Fund gishyira imbaraga mu gukorera mu mucyo no kubaza abantu icyo amafaranga yakoreshejwe.”

Umuyobozi Mukuru w’ishami ry’ingamba, ishoramari n’impinduka z’ibikorwa bya “Global Fund”, Prof. Osamu Kunii, ejo hashize tariki ya 2 Gicurasi 2017, ubwo we n’itsinda yari ayoboye basuraga ikigo nderabuzima cya Gikondo kiri mu karere ka Kicukiro, bashimye uburyo u Rwanda rukoresha inkunga rwahawe.

Prof. Osamu yavuze ko u Rwanda ari urugero rwiza rwo kwereka abaterankunga bafite amafaranga ko ibyo bafashamo bitaba bipfuye ubusa, bityo inkunga zikaba zakwiyongera.

Ati “Byaterwa n’uko inkunga ziva mu baterankunga mpuzamahanga zaba zihagaze, ariko ikintu cy’ingenzi ni uko ugomba kwerekana ikintu cyiza wagezeho cyagize impinduka ku gihugu. U Rwanda ni urugero rwiza rwo kwereka abaterankunga, ukababwira ngo niba uri umuterankunga ufite amafaranga urabona impinduka bizagira kuri sosiyete nk’iyi ikoresha neza inkunga.”

Yashimye kandi uburyo abagenerwabikorwa b’inkunga zitangwa ku bafite ubwandu bwa virusi itera Sida babikora babikunze; avuga ko mu bindi bihugu yasuye, u Rwanda ari igihugu yabonyemo ibitangaza bitari mu kuzamuka k’ubukungu gusa, ahubwo no mu kugabanya impfu z’abana bari munsi y’imyaka itanu, ubwandu bushya bwa Sida n’ibindi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE