2017-07-23 11:30:24 clouds 27o High | Kigali Rwanda

Dukurikire:
 
 

Perezida Kagame yasabye abafite ibikorwa bitemewe mu bishanga kubyimura vuba

Yanditswe na IMVAHO NSHYA

Kuya 2017-06-24 09:36:00

 
Share on:
 
Yasuwe:639
 
Yavuzweho:200
 
10
 
10

Perezida wa Repubulika, Paul Kagame, yashimangiye ko ibishanga bifite akamaro kanini mu kubungabunga urusobe rw’ibinyabuzima, asaba ababikoreramo ibikorwa bitemewe kubyimura kugira ngo bitunganywe neza.

Mu butumwa, umukuru w’igihugu yagejeje ku bitabiriye umuganda mu gishanga cya Nyandungu giherereye mu mirenge ya Ndera karere ka Gasabo na Nyarugunga mu karere ka Kicukiro kuri uyu wa 24 Kamena 2017, yasabye kongera imbaraga mu kubungabunga ibishanga.

Yagize ati “Gutunganya ibishanga tugomba kubyitaho kuko bijyana no kuzuzanya k’urusobe rw’ibinyabuzima. Abafite ibikorwa bitandukanye mu bishanga kandi atari ho byagenewe, bagomba kubyimura vuba ibishanga tukabibungabunga.”

Yasobanuye ko umuganda ari igikorwa cy’ingenzi cyerekana ubumwe bw’Abanyarwanda mu guteza imbere igihugu cyabo.

Ati “Umuganda ni ikimenyetso cyo gukorera hamwe cyerekana ibyo twageraho byinshi byiza dukoreye hamwe. Werekana gufatanya mu gukora cyane ngo tugere kubyo twifuza kandi bitubereye.”

Perezida Kagame yashimiye Abanyarwanda ko bitabira umuganda abasaba kugira imitekerereze ishingiye ku kubaka igihugu no kwiteza imbere, kandi bagakomeza gusigasira ibyagezweho banagira uruhare mu mutekano w’igihugu.

Yagize ati “Ndabashimira ko mwitabira Umuganda mwese: abasore, inkumi, urubyiruko n’abakuru. Dukomeze dushyire imbaraga zacu hamwe, tugire imitekerereze myiza tugamije kwiyubaka no kubaka igihugu cyacu. Igihugu cyacu tugihe iterambere n’umutekano gikwiye. Umunyarwanda abeho atekanye kandi ateye imbere.”

Biteganyijwe ko umushinga wo gutunganya igishanga cya Nyandungu uzatwara miliyari 2.4 z’amafaranga y’u Rwanda. Watewe inkunga n’Ikigega cy’Igihugu cyo guteza imbere ibidukikije, FONERWA.

Ugamije kongera urusobe rw’ibinyabuzima, kugabanya imyuzure, ubukangurambaga bwo kubungabunga ibishanga no guhanga imirimo ishingiye ku bidukikije n’ubukerarugendo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE