2017-05-24 10:43:15 clouds 27o High | Kigali Rwanda

Dukurikire:
 
 

Perezida Kagame yakiriye abambasaderi batanu

Yanditswe na IMVAHO NSHYA

Kuya 2016-05-10 05:10:09

 
Share on:
 
Yasuwe:0
 
Yavuzweho:200
 
10
 
10

Ba ambasaderi batanu bahagarariye inyungu z’ibihugu byabo mu Rwanda bashyikirije Perezida Paul Kagame inyandiko zibemerera guhagararira ibihugu byabo kuri uyu wa 9 Gicurasi 2016.

Abo ni Taoufik Hnana wa Tunisia akaba afite icyicaro i Kinshasa muri Repubulika Iharanira Demokarasi ya Kongo, Hawa Olga Ndilowe wa Malawi ufite icyicaro i Dar Es Salaam muri Tanzania, Ralf Heckner w’u Busuwisi ufite ikicaro i Nairobi muri Kenya, Artieda Felix Costales wa Espagne na we uftite icyicaro i Dar Es Salaam muri Tanzania na Michel Xavier Biang wa Gabon ufite icyicaro i Kinshasa muri Congo.

Ubwo bari bavuye mu biro by’Umukuru w’Igihugu, ba Ambasaderi babwiye itangazamakuru ibyo umubano hagati y’ibihugu byabo n’u Rwanda uzibandaho, aharimo guteza imbere ubuhahirane.

JPEG - 189.4 kb
Perezida Kagame yakira Ambasaderi w’u Busuwisi Ralph Heckner

Hawa Olga wa Malawi yavuze ko nk’uko ibihugu byombi bisangiye kuba abanyamuryango ba COMESA (umuryango uhuza ibihugu by’Afurika y’Iburasirazuba n’iy’Amajyepfo mu bucuruzi) bazareba uko basangira ibikorwa byiza biri kuri buri gihugu bishobora gutuma abahinzi bagira inyungu, kandi ubuhinzi bukagira uruhare rufatika mu iterambere ry’ibihugu byombi.

Yagarutse kuri gahunda ya Bye Bye Nyakatsi yamushimishije, bityo bakaba bagiye kuyigiraho kuzamura imibereho y’abaturage babo.

Ati “Turashaka natwe kuyikoresha kugira ngo tuzamure imibereho myiza y’abaturage bacu.”

Mugenzi we uhagarariye igihugu cya Espagne, Felix Costles Artieda, yavuze ko umubano hagati y’ibihugu byombi wari mwiza ariko hagiye kugira ibyongerwamo imbaraga. Yagarutse ku gisubizo cyafashwe ku giherutse guteza agatotsi mu mibanire hagati y’ibihugu byombi.

Yagize ati “Twagize zimwe mu mbogamizi mu mubano mwiza wacu n’u Rwanda, cyane izerekeranye n’amategeko n’urukiko rwa Leta ya Espagne. Icyo kintu ubu kimeze neza kuko Guverinoma yacu yakoze ivugurura ku mategeko bariya bacamanza bitwazaga.”

Nk’uhagarariye Umuryango w’Ubumwe bw’uburayi, EU, umuryango usanzwe utera inkunga ingana na 40% ingengo y’imari y’Umuryango w’Afurika y’Uburasirazuba, EAC, Felix Artieda yavuze ko yaganiriye na Perezida Kagame ibyerekeye uburyo EU ishaka kongera gutera inkunga ingengo y’imari ya EAC u Rwanda rurimo.

Mu bandi bibanze ku mishinga yo kuzamura ibihugu byombi, harimo uhagarariye Ubusuwisi Ralf Heckner watangaje ko nk’igihugu gisanzwe kibana neza n’u Rwanda mu myaka 60 ishize, ubu bagiye kongera gutangiza umushinga wa kabiri wo kuzamura urwego rwo guhanga imirimo binyuze mu mashuri ateza imbere impano ziri mu rubyiruko.

Uwo mushinga ugamije guteza imbere ubumenyingiro bw’urubyiruko mu mashuri, aho umwana yigira mu kazi, n’abashoramari bamushoraho imari bakunguka na nyiri umushinga yunguka.

Ni umushinga w’imyaka cumi n’ibiri uri hagati y’ikigega cy’ubutwererane cy’u Busuwisi na Ministeri y’Uburezi mu Rwanda, ukazakorera mu Ntara y’Iburasirazuba bw’u Rwanda.

JPEG - 200.1 kb
Ambasaderi Hawa Olga aramukanya na perezida Kagame
JPEG - 175.3 kb
Amb. Taoufik Hnana na Perezida Kagame
JPEG - 99.8 kb
Michel Xavier Biang ashyikiriza perezida Kagame impapuro zimwemerera guhagarira Gabon mu Rwanda
JPEG - 123.2 kb
Félix Artieda wa Espagne

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE