2017-07-22 13:49:51 clouds 27o High | Kigali Rwanda

Dukurikire:
 
 

Perezida Kagame yakiriye Abambasaderi 5

Yanditswe na IMVAHO NSHYA

Kuya 2016-07-11 13:00:00

 
Share on:
 
Yasuwe:3
 
Yavuzweho:200
 
10
 
10

Perezida Paul Kagame yakiriye izindi nyandiko z’abambasaderi batanu bashya, bagiye guhagararira ibihugu byabo mu Rwanda, bakaba biyemeje ubufatanye mu mishinga y’iterambere.

Barimo uw’u Buyapani bwemeye gutanga inguzanyo yo kubaka igice cy’umuhanda uhuza u Rwanda naTanzania.

Abandi ni abahagarariye Repubulika ya Congo, Nouvelle-Zélande, Norvège, Sénégal n’u Buyapani.

Bamaze kugirana ibiganiro Perezida Kagame, Ambasaderi Takayuki Miyashita w’u Buyapani yavuze ko ibihugu byombi bisanzwe bifitanye umubano mwiza umubano ahanini mu birebana n’ubuhahirane n’imishinga inyuranye, aho abashoramari b’Abayapani bazana imari yabo mu Rwanda.

JPEG - 183.1 kb
Bruce Shepherd ugiye guhagararira New Zealand mu Rwanda ashyikiriza inyandiko Perezida Kagame

Mu kiganiro n’itangazamakuru yagize ati “Vuba aha, nzashyira umukono ku masezerano y’inguzanyo yo kubaka umuhanda Rusumo-Kayonza. Ni umushinga duhuriyeho n’u Rwanda, u Buyapani na Banki Nyafurika itsura Amajyambere (AfDB). Ni umuhanda ugomba guhuza u Rwanda na Tanzania n’iyindi migabane.”

Ambasaderi wa Repubulika ya Congo, Guy Nestor Itou, we yavuze ko umubano uri hagati y’igihugu cye n’u Rwanda ufata indi ntera kubera ingendo za RwandAir zihuza ibihugu byombi inshuro eshatu mu cyumweru.

Ibyo bihugu birateganya gushyiraho itsinda rizacukumbura inzego zose bishobora gufatanyamo n’uburyo ubwo bufatanye buzashoboka. Ni gahunda Ambasaderi Nestor Itou ahuriyeho na mugenzi we Abdoul Wahab Haidara uzahagararira Sénégal mu Rwanda, agakorera i Nairobi muri Kenya.

Ambasaderi Haidara ati “ Urebye urujya n’uruza rw’abantu byerekana ko hari ubucuti hagati y’bi bihugu. Ku bijyanye n’abakuru b’ibihugu naho haba ibiganiro byinshi, bivuze ko umubano w’ibihugu byombi ari nta makemwa.”

Ambasaderi Susan Eckey wa Norvège uzakorera i Kampala muri Uganda, yabwiye abanyamakuru ko yihanganishije Perezida Kagame, nyuma y’iraswa ry’abasirikare b’u Rwanda bari mu butumwa bw’amahoro muri Sudani y’Epfo, kuri iki Cyumweru.

Yagize ati “Birababaje Twaganiriye uko ibintu bimeze muri Sudani y’Epfo, duhuriza ku kuvuga ko Umuryango mpuzamahanga ukomeza gukora ibyo ushoboye. icyakora ni ishingano z’abayobozi ba Sudani y’Epfo gukora ibishoboka bakagarura ibintu mu buryo.”

Ubusanzwe, U Rwanda na Norvège bafatanya mu nzego zirimo ubutabera, aho mu 2010 icyo gihugu cyohereje Charles Bandora wakekwagaho ibyaha bya Jenoside ngo aze kuburanira mu Rwanda, inakatira igifungo cy’imyaka 21 Sadi Bugingo wahamijwe ibyaha bya Jenoside mu 2013.

Perezida Kagame kandi yakiriye impapuro zemerera Bruce Rata Shepherd guhagararira Nouvelle-Zélande mu Rwanda, akazaba afite icyicaro i Addis Ababa muri Ethiopia.

Rata Akaba yabwiye itangazamakuru ko mu gihe azaba ari Ambasaderi umubano w’ibihugu byombi uzibanda ku mahoro, umutekano n’iterambere.

Nouvelle-Zélande yashyigikiye u Rwanda ruba umunyamuryango wa 54 w’ibihugu bikoresha Icyongereza (Commonwealth), inashyigikira kandidatire yarwo nk’umunyamuryango udahoraho mu kanama ka Loni gashinzwe umutekano ku isi.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE