2017-05-27 10:19:18 clouds 27o High | Kigali Rwanda

Dukurikire:
 
 

Perezida Kagame ntashaka abayobozi barandaga mu kazi

Yanditswe na IMVAHO NSHYA

Kuya 2016-10-07 07:03:56

 
Share on:
 
Yasuwe:6
 
Yavuzweho:200
 
10
 
10

Perezida w’u Rwanda, Kagame Paul, yasabye abakozi ba Leta kwirinda kurandaga mu kazi, ibyo yise “Bureaucracy’’, abibutsa guharanira gukora neza no kwihutisha ibintu kuko ngo nta mpamvu yo gutakaza igihe mu gihugu cyihuta mu iterambere.

Ibyo Umukuru w’igihugu yabivugiye mu Nteko Ishinga Amategeko, ubwo yari amaze kwakira indahiro y’abayobozi bashya binjiye muri Guverinoma.

Kagame yashimiye abarahiye abibutsa inshingano ziremereye biyemeje zo gufatanya kubaka amajyambere. Yasabye abarahiye n’abandi bayobozi gukorana bagaharanira gushaka gukora ibintu bizima ariko banabyihutisha kuko nta mpamvu yo gutakaza igihe.

Ati “Turusheho gukora neza, kwihutisha ibintu no kugerageza gukomeza gushaka guhindura ibintu, naho abayobozi bashya nubwo mwateye intambwe hari indi mugomba gutera imbere kandi mukamenya ko akazi katagabanutse. Iyo ukora neza uhora ufite impungenge zo kugira ngo ibintu bidasubira inyuma cyangwa ngo bihore aho biri. Ni ugutekereza guhora tujya mbere, Abamaze kurahira rero ni ukubibutsa ko inshingano ari nk’ibisanzwe iteka tubadushaka gukora neza, kwihutisha ibintu no kubihindura.”

JPEG - 146.9 kb
Perezida Kagame , abayobozi barahiye n’abandi bayobozi bakuru muri guverinoma

Yavuze no ku mikorere isa n’iyabaye akarande mu nzego za Leta, aho usanga hari izigorana mu kwihutisha ibintu.

Mbere yo gutanga ubutumwa bwe nyuma yo kwakira indahiro y’abayobozi, Perezida Kagame yifatanyije n’abagize Inteko ishinga amategeko umutwe wa Sena kwibuka nyakwigendera Senateri Mucyo Jean de Dieu uherutse kwitaba Imana agiye mu kazi.

Perezida Kagame ati “Nyakwigendera Mucyo yari umuyobozi mwiza wuzuza inshingano ze, atari wa wundi wiremereza cyane nk’ibyo tujya tubona, yari umuntu muzima, dukoreshe aka kanya tumwibuke tunamushimira.”

Abarahiye ni Minisitiri w’Uburinganire n’Iterambere ry’Umuryango Nyirasafari Esperance n’ Umunyamabanga wa Leta muri Minisiteri y’Ubutabera Ushinzwe Itegeko Nshinga n’andi mategeko, Uwizeyimana Evode; Umunyamabanga wa Leta ushinzwe iterambere ry’abaturage muri MINALOC, Munyeshyaka Vincent, Umunyamabanga wa Leta ushinzwe amashuri abanza n’ayisumbuye muri MINEDUC, Munyakazi Isaac, n’Umunyamabanga wa Leta muri Minisiteri y’Ubuhinzi n’Ubworozi ushinzwe ubuhinzi, Fulgence Nsengiyumva.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE