2017-08-21 15:16:56 clouds 27o High | Kigali Rwanda

Dukurikire:
 
 

Numvise ubusabe bw’Abanyarwanda, nima amatwi abo hanze - Perezida Kagame

Yanditswe na IMVAHO NSHYA

Kuya 2016-05-11 16:49:10

 
Share on:
 
Yasuwe:8
 
Yavuzweho:200
 
10
 
10

Perezida Kagame yabwiye abitabiriye inama ya WEF Africa mu guhitamo kwiyamamariza manda ya gatatu yagendeye ku busabe bw’Abanyarwanda, akirengagiza ibyo ibihugu bimwe by’amahanga byamubwiraga.

Mu kiganiro ku bufatanye mu iterambere ry’umugabane wa Afurika Perezida Kagame yatanze ari kumwe n’umuherwe Howard Buffet na Tony Blair wahoze ari Minisitiri w’Intebe w’u Bwongereza, hagarutswe ku Rwanda nk’icyitegererezo cy’iterambere ku bindi bihugu bya Afurika.

Perezida Kagame yavuze ko u Rwanda rwavuye kure rubikesheje ubufatanye hagati y’abayobozi n’abaturage, bose bahuje umugambi wo kubaka ahazaza heza h’igihugu.

Ati” Twahereye ku busa, twese turafatanya, abaturage n’abayobozi, dushyira imbaraga hamwe, twahereye ku byo dushaka kugeraho, tunashingira ku kuba dushakira igihugu cyacu ahazaza heza, twari tuzi neza ko twabuze ahashize hacu, ariko dufite intego yo gukoresha neza ahazaza.”

JPEG - 57.1 kb
Perezida Kagame, Howard Buffet na Tony Blair mu kiganiro ku bufatanye mu iterambere rya Afurika

Umukuru w’igihugu yagize icyo avuga ku mfashanyo z’amahanga, avuga ko ubufatanye ubwo ari bwo bwose bugomba gushingira ku bwubahane. Yagaragaje ko u Rwanda rukeneye kuba umufatanyabikorwa mu nkunga rugenerwa aho kwitwa umugenerwabikorwa.

Ati” Ubufatanye bugomba kugendera ku kubahana aho kugira ngo inkunga isimbure amahitamo y’abaturage. Inkunga itugirira akamaro kanini ariko dushaka kuba abafatanyabikorwa mu kuyikoresha no kugirango itugeze ku musaruro twifuza.”

Perezida Kagame yasobanuye ko yisanze agomba gufata umwanzuro wo kwiyamamariza manda ya gatatu, aho Abanyarwanda bamusabaga kwiyamamaza ariko bimwe mu bihugu bikomeye byo bikabimubuza.

Ati” Nisanze ngomba gufata umwanzuro nshingiye ku byo abaturage b’iki gihugu bashaka cyangwa ibyo abo hanze bashaka […]Ese igihe nyacyo ni ikihe? Igihe nyacyo ntabwo cyagenwa n’abo hanze. Kigomba kugenwa n’Abanyarwanda.”

Ibi byashimangiwe na Howard Buffet avuga ko abafite ikibazo ko u Rwanda rwahinduye itegeko nshinga bababazwa n’ubusa kuko no mu bindi bihugu habaho impinduka.

Buffet yasabye amahanga kutivanga mu bikorerwa Abanyarwanda kuko ari bo bazi ikibafitiye inyungu.

Ati” Ibihugu bigendera kuri demokarasi bigira impinduka nyinshi, n’icyanjye cyahinduye itegekonshinga inshuro 27. Ntabwo ari ahazaza hanjye cyangwa ahawe. Ni ahazaza h’u Rwandan’Abanyarwanda. Ni ngombwa ko bifatira icyemezo kibabereye.”

Umuherwe Buffet yongeyeho ko ashyigikiye ko Perezida Kagame yiyamamariza indi manda, cyane ko iyo aba atabishyigikiye atari kwirirwa agira imishinga akorera mu Rwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE