2017-08-21 15:16:56 clouds 27o High | Kigali Rwanda

Dukurikire:
 
 

Nkosazana, ushoje manda y’ubuyobozi bwa AU, yasabye Afurika kwishakamo ibisubizo

Yanditswe na IMVAHO NSHYA

Kuya 2016-07-11 05:41:35

 
Share on:
 
Yasuwe:1
 
Yavuzweho:200
 
10
 
10

Umuyobozi wa komisiyo y’Umuryango w’Ubumwe bw’Afurika (AU) ucyuye igihe, Nkosazana Dlamini Zuma yibukije abayobozi batandukanye bo muri Afurika n’u Rwanda rurimo, gushyira hamwe no gufatanya kuko ari bwo gahunda z’intego z’umwaka 2063 zizagerwaho.

Madamu Nkosazana yabivugiye i Kigali, ku munsi wa mbere w’Inama ya 27 ya AU igiye kumara icyumweru kirenga ibera mu Rwanda.

Umuyobozi wa AU yasobanuye bimwe mu bizatuma Afurika igera aheza harimo gushyira imbere kwishyira hamwe kw’ibihugu, koroshya urujya n’uruza, guteza imbere uburenganzira bw’abagore, gushyiraho pasiporo imwe nyafurika, byose nk’imwe mu nkingi z’iterambere rirambye.

JPEG - 77.8 kb
Nkozasana Dramini uyobora umuryango wa AU

Inama yabimburiwe ni iya 32 y’Abambasaderi bahagarariye ibihugu byabo muri AU, imiryango iyishamikiyeho n’abayobozi ba Komisiyo n’akanama gahoraho k’uyu muryango (PRC).

Icyerekezo 2063 ni igitekerezo cy’Abanyafurika cyo kwiteza imbere ubwabo batarambirije ku nkunga y’amahanga, nk’uko byemejwe mu nama ya 24 ya AU y’abakuru b’ibihugu na za Guverinoma yabereye i Addis Ababa muri Ethiopia.

Nkosazana yagize ati “Ibihugu byose bigomba gukorera hamwe kugira ngo iki cyemezo kizagere ku ntego zacyo zo gukorera hamwe kw’ibihugu by’Afurika, bikareka kuba nyamwigendaho. Tugomba gukomeza kureba izi ngamba nziza turebeye mu cyerekezo cyo gufatanya nk’Abanyafurika, tukubaka Afurika yunze ubumwe y’abaturage.”

Yibukije inyungu Abanyafurika bavana mu kwishyira hamwe no koroshya ubucuruzi, atanga urugero ku mahirwe mu burezi n’umurimo abana b’Afurika bafite.

Ati “Iyaba ibihugu byinshi byemera gusinya amasezerano y’Arusha ku bijyanye no koroherezanya kwiga muri za Kaminuza nk’uko Afurika y’Uburasirazuba yabigenje, byatanga amahirwe menshi ku rubyiruko rw’Afurika rwose rukabasha kwiga kaminuza aho rwifuza kandi rugakorera akazi aho rwifuza kuri uyu mugabane.”

Biteganyijwe ko iyi nama ya AU izatangiza ku mugaragaro Pasiporo Nyafurika izamurikirwa abakuru b’ibihugu, bikaba biri muri gahunda yo koroshya urujya n’uruza rw’abantu, ibicuruzwa na serivisi muri Afurika no guhuza imbaraga muri gahunda zihindura imibereho y’Abanyafurika mu myaka iri imbere.

Ambasaderi uhagarariye Tchad muri AU Cherif Mahamat Zene, yashimye ubuyobozi bwa Guverinoma y’u Rwanda ashingiye ku mateka ya Jenoside yakorewe Abatutsi yanyuzemo, igihugu kikaba ari intangarugero mu kwiyubaka muri Afurika.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE