2017-05-29 16:30:20 clouds 27o High | Kigali Rwanda

Dukurikire:
 
 

Ngoma: Perezida Kagame yemereye bisi abaturage

Yanditswe na IMVAHO NSHYA

Kuya 2016-04-28 12:38:16

 
Share on:
 
Yasuwe:0
 
Yavuzweho:200
 
10
 
10

Perezida wa Repubulika y’u Rwanda, Paul Kagame, kuri uyu wa 28 Mata 2016 yasuye akarere ka Ngoma, aganira n’abaturage, abasaba gukora iyo bwabaga bagahashya ubukene ari nako banicungira umutekano.

Ubwo Perezida Kagame yakiraga ibibazo n’ibitekerezo by’abaturage, umugore witwa Uwazigira Esta utuye mu kagari ka Rugese mu murenge wa Rurenge muri ako karere, yavuze ko bafite ikibazo cyo kubura imodoka mu gihe bajya ku isoko cyangwa berekeza mu mujyi wa Rwamagana.

Uwo mutegarugori watujwe muri ako gace nyuma yo kwirukanwa muri Tanzania mu 2006, yasobanuye ko mbere, uwo muhanda w’igitaka utunganyijwe mu buryo bugezweho wabagamo bisi itwara abaturage ku giciro gito. Ariko ubu ngo iyo bisi bari barahawe na Leta ntikihakorera.

JPEG - 67.5 kb
Perezida Kagame asuhuza abaturage b’akarere ka Ngoma

Perezida Kagame yibajije impamvu uwo muhanda ari mwiza ariko ukaba utabamo imodoka igoboka abaturage mu ngendo.

Ati” "Umuhanda twanyuzemo ni mwiza, ariko se uwo muhanda utagira imodoka wo ni nyabaki?"

Yabwiye inzego z’ibanze n’izindi zibifite mu nshingano ko zikora ku buryo abaturage bo muri ako gace babona indi bisi mu gihe cya vuba.

Yasabye abaturage kwirindira umutekano no guhashya ubukene

Mu ijambo yagejeje ku baturage ba Ngoma yabasabye guhinga bya kijyambere bagahashya ubukene, ariko nanone bagaha agaciro igitsina gore.

Ati” Iterambere ry’umugore ni iterambere ry’igihugu. Ntabwo igihugu cyatera imbere hari abasizwe inyuma. U Rwanda rwishimira ko umugore w’Umunyarwandakazi afatanya n’umugabo, iterambere rikabageraho bose.”

Umukuru w’igihugu yabibukije ko u Rwanda ari cyo gihugu cya mbere muri Afurika gifite umutekano usesuye aho abantu bagenda mu mujyi mu masaha y’ijoro nta na kimwe bikanga.

Ibi yabihereyeho abasaba kwirindira umutekano bikajya muri kamere yabo kuko nta terambere bazageraho igihe nta mutekano.

Yagize ati”Dukomeze kwirindira umutekano.Ntituzemerera abawuhungabanya. Buri wese akore ibiri mu bushobozi bwe, twese dutere imbere.”

Perezida Kagame arakomereza uruzinduko rwo kwegera abaturage mu karere ka Nyagatare.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE