2017-09-21 09:07:12 clouds 27o High | Kigali Rwanda

Dukurikire:
 
 

New York : Perezida Kagame yahembewe kubiba ubucuti n’Abayahudi

Yanditswe na IMVAHO NSHYA

Kuya 2017-05-22 05:46:08

 
Share on:
 
Yasuwe:705
 
Yavuzweho:200
 
10
 
10

Perezida wa Repubulika y’u Rwanda, Paul Kagame yahawe igihembo cyitiriwe Dr Miriam na Sheldon G. Anderson kubera ubucuti bukomeye u Rwanda rufitanye n’ubwoko bw’Abayahudi no kuba yarahagaritse Jenoside yakorewe Abatutsi mu 1994 agateza imbere igihugu cye.

Icyo gihembo yagishyikirijwe mu birori byabereye i Manhattan mu mujyi wa New York ku mugoroba wo ku Cyumweru ku ya 21 Gicurasi 2017.

Amaze gushyikirizwa icyo gihembo, Perezida Kagame yavuze ko nk’Umunyarwanda kugirana ubucuti n’Abayahudi ari ibisanzwe kuko impande zombi zisangiye amateka.

Ati “ Dusangiye ubunararibonye butuma twumva neza icyo ubutabera n’ubworoherane bisobanuye.”

Yagarutse ku mitekerereze y’umwanditsi Elie Wiesel, warokotse Jenoside yakorewe Abayahudi witabye Imana mu mwaka ushize.

Ati “ Ubutumwa bwa Elie Wiesel bureba buri wese n’ibisekuruza byose. Kandi nibwo buduteranyirije hano muri iri joro. Yashyize agaciro ka muntu imbere ya byose, asaba ko habaho ubufatanye hagati y’abiyemeje kurwanya abatesha abandi ako gaciro.”

Umukuru w’igihugu yakomeje avuga ko nta na rimwe urwango rwahabwa igisobanuro kabone nubwo urufite yarutewe n’agahinda.

Ati “Tugomba guhaguruka tugakora ibitandukanye n’ababaswe n’ingengabitekerezo z’urwango. Igiciro cy’agakiza ni ukwicuza bipfundikiwe no kubabarira. Amahoro yubakwa n’ubwubahane n’ubumuntu.”

Perezida Kagame yongeyeho ko Abanyarwanda bakomeje gutanga umuganda ngo bubake ubumwe, asaba ko abantu biyunga mu rugamba rwo kurwanya ingengabitekerezo ya Jenoside kugira ngo hatazagira aho yongera gushinga imizi.

Ati “ Tuzahora twirinda aho dushoboye hose kandi dutange umusanzu mu kurinda abandi bari mu bibazo. Nsubiremo ibyavuzwe n’umwigisha Nachman wa Breslov ‘icyangombwa ni ukutagira ubwoba’. Iyo uri gukora igikwiye ubwoba busimburwa n’umurava no kudatezuka.”

Umuryango World Values Network (WVN), watanze icyo gihembo, washinzwe na Rabbi Shmuley Boteach ugamije guteza imbere indangagaciro za demokarasi binyuze mu biganiro, amasomo, inama ndetse n’itangazamakuru mpuzamahanga.

Uwo muryango kandi ushyira ingufu mu kwigisha amateka ya Jenoside no kuyirwanya. Kuva mu 2013 watangiye guha ibihembo abaharanira guhindura sosiyete, ari nacyo Perezida Kagame yaraye ahawe.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE