2017-06-28 15:02:12 clouds 27o High | Kigali Rwanda

Dukurikire:
 
 

Mwubahe umuturage kuko ni we mukorera - Minisitiri Kaboneka

Yanditswe na IMVAHO NSHYA

Kuya 2017-04-04 07:08:56

 
Share on:
 
Yasuwe:333
 
Yavuzweho:200
 
10
 
10

Minisitiri w’Ubutegetsi bw’Igihugu Francis Kaboneka, yasabye Abanyamabanga Nshingwabikorwa b’Imirenge guha serivise nziza abaturage bayobora, baharanira icyabateza imbere birinda kurya ibyabagenewe.

Minisitiri Kaboneka yabitangarije i Nkumba mu karere ka Burera, ubwo yasozaga Itorero ry’Abanyamabanga Nshingwabikorwa b’Imirenge n’abashinzwe imiyoborere myiza mu ntara n’uturere ryahaberaga.

Ati “Ndabasaba ko ubumenyi muvanye hano bubabera umusemburo w’imiyoborere myiza, mwubahe umuturage, mumukunde, mumuhe agaciro mumufate nk’ikiremwamuntu.

Mwubahirize ishyirwa mu bikorwa rya gahunda za Leta, harimo rwose kutarya ibyagenewe umuturage, aho usanga hari bamwe mu bayobozi bahemukira umuturage, yaba agenewe Girinka cyangwa se indi nkunga umuyobozi akaba uwa mbere mu kuyimira, ndabasabye nimuhe agaciro umuturage kuko ni we mukorera nta kindi”.

JPEG - 112.5 kb
Minisitiri w’Ubutegetsi bw’Igihugu Francis Kaboneka aganira n’abitabiriye Itorero ry’Abanyamabanga Nshingwabikorwa (Foto Ngaboyabahizi P)

Minisitiri Kaboneka kandi yasabye Abanyamabanga Nshingwabikorwa gukorera hamwe n’abo bakorana, bagakora nk’ikipe, kuko ngo iyo abantu bakoreye mu cyizere bafite intego imwe, icyo bagamije bakigeraho.

Yabasabye kurangiza ibibazo by’irangamimerere ku mirenge yabo ndetse no gutegura amatora ateganyijwe muri Kanama 2017, abizeza ubufatanye mu mirimo yabo ya buri munsi.

Abitabiriye iri torero ryatangiye ku wa 23 Werurwe, rigasoza ku wa 04 Mata 2017, akaba ari icyiciro cya 4. Ryari ryitabiriwe n’Abanyamabanga Nshingwabikorwa b’Imirenge yo mu gihugu hose, n’abayobozi bashinzwe imiyoborere myiza mu ntara n’uturere bagera kuri 432.

Bakaba barahawe amasomo anyuranye harimo politike yo kwegereza abaturage imiyoborere myiza, akamaro k’umurenge mu gushyira gahunda za Leta mu bikorwa, batozwa indangagaciro na kirazira z’umunyarwanda, imyitozo ngororangingo n’ibindi.

Mbonyinshuti Isaïe, umwe mu banyamabanga Nshingwabikorwa bitabiriye iri torero wo mu murenge wa Mataba, mu karere ka Gakenke, yagaragaje ko iri torero baryungukiyemo byinshi bizabafasha kuyobora neza abaturage.

Yagize ati “Burya umuyobozi iyo adahawe umwanya nk’uyu ngo yongererwe ubumenyi, bituma ahora yizengurukaho ntagendane n’igihe, ariko iyi gahunda y’itorero Guverinoma y’u Rwanda yashyizeho, ni imwe mu ntwaro zituma umuyobozi yumva uruhare rwe n’umuturage mu guteza imbere igihugu.

Itorero nanone ni umwanya wo kureba ibigenda n’ibitagenda, umuntu akaba yakwikosora aho afite intege nkeya kuko burya mu biganiro bigenda bitangwa, ugenda ubona aho wowe ubwawe ushoboye n’aho bitagenda, amasomo dukuye hano ni impamba ikomeye mu gukarishya ubwenge mu miyoborere”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE