2017-07-26 14:51:34 clouds 27o High | Kigali Rwanda

Dukurikire:
 
 

Makuza yasabye Abanyarwanda kuvanaho inzitizi z’ubumwe n’ubwiyunge

Yanditswe na IMVAHO NSHYA

Kuya 2016-10-03 06:16:03

 
Share on:
 
Yasuwe:1
 
Yavuzweho:200
 
10
 
10

Perezida wa Sena y’u Rwanda Bernard Makuza, yasabye ko icyumweru cyahariwe ubumwe n’ubwiyunge cyaba umwanya wo kwisuzuma, abantu bakareba ahakigaragara inzitizi z’ubumwe n’ubwiyunge, zigakurwaho.

Ubu butumwa uyu muyobozi yabutangiye mu gikorwa cyo gutangiza icyumweru cyahariwe ubumwe n’ubwiyunge mu karere ka Huye, cyabereye mu murenge wa Karama.

Gutangiza icyumweru cyahariwe ubumwe n’ubwiyunge muri uyu murenge cyahujwe n’umuganda wo kubakira uwarokotse Jenoside yakorewe Abatutsi.

JPEG - 322.8 kb
Perezida wa Sena Bernard Makuza (Foto Umutoni B)

Ibikorwa nk’ibi byo gufatanya, abagize ishyirahamwe ‘Ubutwari bwo Kubaho’ rihuje abapfakazi ba Jenoside n’abagore bari bafite cyangwa bafite abagabo bafungiye icyaha cya Jenoside, bavuga ko kuri ubu ari byo biranga ubuzima bwabo bwa buri munsi, nk’uko bigaragazwa na Mukagatare Françoise uyobora iri shyirahamwe.

Yagize ati “Twe twiyemeje kubabarira abatwiciye abacu, tubanye nabo neza mu bikorwa byacu bya buri munsi turashyingirana, turahingirana n’ibindi byinshi biranga abantu bafitanye ubumwe.

Ibi kandi byaduhesheje n’amashimwe menshi nk’abantu bashyize hamwe biyemeje kugira ubumwe n’ubwiyunye.”
N’ubwo bimeze gutya ariko, hari abakinangira kwishyura imitungo yangijwe muri Jenoside, iki kikaba kigaragazwa nk’inzitizi ikibangamiye ubumwe n’ubwiyunge.

Perezida wa Sena y’u Rwanda Bernard Makuza, asanga icyumweru nk’iki ari umwanya wo gutanga ubuhamya nk’ubu bugaragaza intambwe abanyarwanda bamaze gutera, ariko kandi ukaba n’umwanya wo kungurana ibitekerezo ku nzitizi zikibangamiye ubumwe n’ubwiyunge bw’abanyarwanda n’uburyo zakurwaho.

Yagize ati “Ni ikintu cyiza cyo gushima, aba babyeyi kuba barashyize hamwe bakaba ubu babanye neza. Muri iki cyumweru rero turasaba ko mu midugudu bazaganira ku byiza byagezweho kuko ni byinshi, ariko kandi bagomba no kuzareba niba hari n’izindi nzitizi zikirimo mu kugera ku bumwe n’ubwiyunge ijana ku ijana zibe zakemurwa burundu.

Niba hari utarishyuye akaba akiri inzitizi y’ubwiyunge ni we ukwiye gufata iya mbere akajya kureba uwo agomba kwishyura akaba yamusaba kumuha imbabazi.”

Ishyirahamwe ubutwari bwo Kubaho ryabaye umusemburo w’ubumwe n’ubwiyunge mu murenge wa Karama, ndetse no mu gihugu muri rusange, rigizwe n’abanyamuryango basaga 1000.

Kuri ubu bahurira mu bikorwa binyuranye byo kwiteza imbere ahanini bishingiye ku buhinzi n’ubworozi. Kubera ubutwari abarigize bagaragaje bakabasha kurenga ibyabatandukanyaga, ryagiye rinahabwa ibihembo binyuranye ku rwego rw’igihugu.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE