2017-09-24 09:25:05 clouds 27o High | Kigali Rwanda

Dukurikire:
 
 

Kwibohora 23: Ubu tugeze mu gihe cyo kwibohora ingaruka zatewe n’ubuyobozi bubi – Perezida Kagame

Yanditswe na IMVAHO NSHYA

Kuya 2017-07-04 11:34:04

 
Share on:
 
Yasuwe:361
 
Yavuzweho:200
 
10
 
10

Perezida Kagame yasobanuye ko urugamba rwo kubohora u Rwanda rugikomereje mu guca burundu imibereho mibi Abanyarwanda basizwemo n’ubutegetsi bubi bwateguye bukanashyira mu bikorwa Jenoside yakorewe Abatutsi mu 1994.

Yabivuze mu ijambo yagejeje ku baturage bitabiriye ibirori byo Kwibohora ku nshuro ya 23 byabereye mu murenge wa Shyira mu karere ka Nyabihu kuri uyu wa 4 Nyakanga 2017.

Umukuru w’igihugu yasobanuye ko Abanyarwanda babanje kwibohora ubutegetsi bubi bwatumye babaho mu burwayi, inzara no gusabiriza.

Yagize ati “Kwibohora harimo inzego ebyiri, urw’abantu n’urw’ibikorwa. Mbere habaye kwibohora ubutegetsi n’abategetsi babi. Ariko mu bantu haba ibikorwa, mu bategetsi babi havamo ibibi : ubukene, inzara, uburwayi,… Ntugire amikoro ugahora uyateze ku bandi kandi nabo hari ubwo bataboneka. Ibyo uteze kubandi iyo bitabonetse bigenda bite?.... urapfa.”

Yavuze ko kuri ubu u Rwanda rugeze mu gihe cyo kwikiza ibibi, abaturage bakabaho mu buzima buzira umwiryane, ubukene, inzara no guhangayika.

Ati “ Kwibohora rero bivuze kwikiza abayobozi n’ubuyobozi bubi, bivuze no kwikiza ibyo bateye, inzara, uburwayi, umwiryane, n’impfu zidakwiye zihitana abana bakiri bato n’abakuru. Kwikiza ubuyobozi bubi byo byarakozwe, mu myaka yabanje mbere n’imyaka 23 tubara kugeza ubu. Ibyasigaye muri iyi myaka 23 twizihiza nabyo byagiye bikemuka.”

Perezida Kagame yasobonuye ko ubuhamya butandukanye bw’abaturage bateye imbere kandi barahoze mu buzima bubi ari ikimenyetso gikomeye cy’uko leta y’u Rwanda igeze kure ibohora Abanyarwanda bakarushaho kumererwa neza.

Yakomeje agira ati “Amateka yacu yo Kwibohora agaragara aho ari hose mu Rwanda, abana bariga, urwaye abona aho yivuza, abaturage mu Rwanda hose bashobora guhinga, bakorora, bakigaburira, bakagira ibyo bajyana ku masoko n’ibyo basagura bagashyira mu mufuka amafaranga bashobora kuzakoresha ikindi bifuza.

“Ibyo biragenda byiyongera buri gihe, ntibiragera aho dushaka ariko niho tugana, niyo nzira turimo, dufite ikizere ko tuzahagera. Kuhagera rero bikwiye kuba vuba, bikwiye kwihuta; kubera ko tumaze kubona ibishoboka n’ukuntu bishoboka.”

Perezida Kagame yibukije abaturage ko inkunga baterwa na Leta atari iyo gupfusha ubusa ahubwo ari iyo kubazamura ngo batere imbere, anabasaba kwima amatwi uwashaka kubameneramo ngo ahungabanye umutekano w’igihugu.

Umukuru w’igihugu kuri uyu munsi kandi yatashye ibitaro bya Shyira n’imidugudu y’icyitegererezo ya Kazirankara na Nyundo mu turere twa Gakenke na Nyabihu, byose byubatse n’ingabo z’u Rwanda.

Ibitaro bya Shyira byuzuye bitwaye miliyari zisaga 4 z’amafaranga y’u Rwanda, bizajya byakira abaturage basaga 200 000 bo mu turere twa Nyabihu, Gakenke, Musanze, Ngororero na Muhanga.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE