2017-07-23 11:30:24 clouds 27o High | Kigali Rwanda

Dukurikire:
 
 

Kwibohora 23: Intego FPR yari ifite zagezweho – Rutaremara

Yanditswe na IMVAHO NSHYA

Kuya 2017-07-04 06:19:33

 
Share on:
 
Yasuwe:345
 
Yavuzweho:200
 
10
 
10

Senateri Tito Rutaremara avuga ko urugamba rwo kubohora igihugu rwatangijwe na FPR-Inkotanyi rwashingiye ku mpamvu nyakuri z’irondakoko n’ubukene byari byugarije Abanyarwanda, hakiyongeraho n’ubuhunzi bwatewe n’isenyuka ry’ubumwe bw’abanyagihugu.

Ibi Senateri Tito Rutaremara yabitangarije Imvaho Nshya mu kiganiro kihariye bagiranye, ubwo yamubazaga byinshi ku birebana no kwibohora ku nshuro ya 23, umunsi u Rwanda rwizihiza uyu munsi ku wa 4 Nyakanga 2017.

Urugamba rwo kubohora igihugu rwasojwe ku wa 4 Nyakanga 1994, ruyobowe na Perezida Paul Kagame, ari na bwo ingabo yari ayoboye zahoze ari iza FPR-Inkotanyi zahagaritse Jenoside yakorewe Abatutsi.

Tito Rutaremara, yagize ati “Urugamba rujya gutangira, abantu babanje kureba impamvu nyakuri zituma habaho uru rugamba rwo kubohora u Rwanda n’Abanyarwanda. Impamvu nyakuri zari uko ubumwe bw’Abanyarwanda bwari bwarasenyutse, ubukene bukabije, ubujiji, kutishyira no kwizana kw’Abanyarwanda, ruswa n’itonesha.”

JPEG - 223.3 kb
Senateri Tito Rutaremara ahamya ko intego yatumye FPR itangiza urugamba rwo kubohora igihugu yagezweho (Foto James R.)

Yavuze ko kutishyira ukizana kw’Abanyarwanda byatumaga nta we uva muri Komini ngo ajye mu yindi, nta wageraga i Kigali adafite urupapuro rw’inzira.

Senateri Rutaremara avuga kandi ko nta bwigenge Abanyarwanda bari bafite muri Demokarasi, kuko nta matora yabagaho, Abanyarwanda bategekeshwaga igitugu kandi ntibagiraga n’ubwisanzure mu gutanga ibitekerezo byabo. Avuga ko FPR-Inkotanyi yashinzwe mu 1987 igamije kubohora Abanyarwanda izo ngoyi zose zari zibaziritse, kandi ngo yabigezeho.

Yagize ati “N’ubwo urugamba rwo kwibohora rugikomeje, ariko hari aho u Rwanda rwavuye n’aho rugeze rubikesha gahunda nziza y’Umuryango RPF-Inkotanyi n’abantu bashoboye kwitanga mu buryo bw’abakorerabushake.”

Senateri Rutaremara yavuze ko kubohora u Rwanda byatangijwe n’urugamba rwa gisirikare kuko izindi nzira zari zarananiranye. Avuga ko urugamba rutarwanywe n’abasirikare gusa, ko kuko rwari urw’abantu bose, barimo urubyiruko, ababyeyi, abaturage n’abandi kuko bafashije mu buryo bunyuranye.

Yagize ati “Abakecuru n’abasaza babaga bari mu buhungiro ntibicaye, bakusanyaga utwo bafite bakaduhuza bakohorereza abari ku rugamba rw’amasasu, barimo abana babo, abagabo babo, inshuti n’abandi. Icyo gihe rero barwanaga na bo urugamba mu buryo bwabo, abasirikare na bo bakarurwana mu buryo bw’amasasu.”

JPEG - 197.9 kb
Ubuyobozi bushyikirana n’abaturage, Umukuru w’Igihugu Paul Kagame agahura na bo, bakaganira ku cyerekezo cy’igihugu n’uko cyagerwaho

Senateri Rutaremara kandi yemeza ko intego ya FPR-Inkotanyi yagezweho kuko icya mbere cyari ukubanza kwigizayo igitugu, ishyiraho ubuyobozi bubereye Abanyarwanda, igarura ubumwe bw’Abanyarwanda, ishyiraho Inkiko Gacaca n’ibindi.

Abanyarwanda basubijwe ubwigenge na FPR

Senateri Rutaremara avuga ko FPR igeze kure igera ku ntego zayo kuko irimo kurwanya ingoyi y’ubukene n’ubujiji mu banyarwanda, amashuri y’uburezi bw’ibanze bw’imyaka icyenda na cumi n’ibiri yagiyeho, ubu abana b’u Rwanda bose bariga nta vangura iryo ari ryo ryose.

Rutaremara agaragaza kandi uburyo mu Rwanda hari ukwishyira ukizana kw’Abanyarwanda, aho bavuga ibibabangamiye, ibitagenda mu gihugu kandi bakabibwira Perezida wa Repubulika ubwe.

Yagize ati “Kuri ubu Abanyarwanda basubijwe ubwigenge bwo kugaragaraza uko babona ibintu bari barambuwe na Leta z’igitugu. Bahura na Perezida wa Repubulika bakamuregera abayobozi b’uturere, ba Minisitiri n’abandi batabakorera uko bikwiye.”

Aha Rutaremara anenga abantu bakivuga ko mu Rwanda nta bwisanzure buhari, aho asanga abavuga ibyo ari ukwirengagiza ukuri babishaka, kuko iyo abaturage baregera Perezida w’igihugu abayobozi babakorera ibitari byo, abantu bose baba babibona.

Ati “Ubundi ibyo nta ho byabaye ku isi, ni umwihariko w’u Rwanda kuko rufite ubuyobozi bwiza buha abaturage ijambo, bukabakemurira ibibazo, bukarwanya akarengane na ruswa.”

JPEG - 259.6 kb
Ubwisanzure mu banyarwanda, bagaragariza Perezida Paul Kagame ibibazo byabo, aho barega n’abayobozi batuzuje inshingano. Aha abaturage bagezaga ibibazo byabo kuri Perezida Kagame, ni mu karere ka Karongi yabasuye

Haracyari ibindi byo kwibohora birimo ubukene

Senateri Tito Rutaremara avuga ko nubwo hari aho intego za FPR zagezweho, inzira yo kwibohora irakomeza. Avuga ko ingoyi zikomeje guhamburwa, nk’ingoyi y’ubukene ni urugamba rukomeje, kubohora Abanyarwanda ingoyi y’ubujiji na rwo ni urugamba rugikomeza.

Avuga ko mu rugamba rwo kurandura ingoyi y’ubukene hashyizweho gahunda yo guhanga imirimo myinshi kandi ihabwa benshi, bityo ngo abana basoje amashuri yabo bakabasha kubona icyo bakora.

Yagize ati “N’ubwo dukomeje guhambura ingoyi ziboshye Abanyarwanda, haracyari abakiboshye, ni urugamba rukomeza kandi twizeye kuzarutsinda.” Avuga ko urugamba rw’amasasu ari rwo rwabimburiye kwibohora k’u Rwanda, ariko ntibivuze ko kwibohora byarangiye.

FPR ntiyikubiye ubutegetsi kuko ishyize imbere Demukarasi

Senateri Tito Rutaremara agaragaza uburyo FPR imaze gutsinda urugamba itikubiye ubutegetsi, ahubwo yabusaranganyije n’andi mashyaka ya politiki mu rwego rwo gufatanya mu kuyobora igihugu.

Avuga ko politiki yashyizweho na FPR-Inkotanyi yo gusaranganya ubutegetsi nta mpungenge iteye kandi ngo nta n’imbogamizi zikomeye yagize.

Ati “Gusangira ubutegetsi n’abandi ni ugushimangira demokarasi, kuko ari byo FPR yashyize imbere. Uwatsindiye ubutegetsi agabana n’abandi, iyo ni yo ntego yacu nka FPR.”

Asobanura ko uburyo bwo kuyobora buri mu Rwanda ari uko abaturage bose bagira ububasha bwo kuyobora, uhereye mu nzego z’ibanze, amashyaka ya Politiki na yo yatsinze amatora ahabwa imyanya muri Politiki hagendewe ku ntsinzi yabonye.

Senateri Rutaremara kandi agaruka ku Ihuriro ry’imitwe ya Politiki, nk’urubuga amashyaka ya Politiki ahuriramo akaganiriramo, bakumvikana ku cyakorwa mu kuyobora Abanyarwanda. Avuga ko Demokarasi atari uguhangana no kurwana, ko ahubwo Demokarasi ari ukwishyira ukizana mu bwumvikane bwuzuye, amahoro n’umutekano.

Kuba FPR-Inkotanyi yaranenze Demokarasi yariho mbere y’urugamba rwo kwibohora, kuri ubu ngo igishimishije ni uko ibyari bibangamiye Abanyarwanda byakosowe kandi bikomeje gukosorwa.

Komisiyo y’Ubumwe n’Ubwiyunge ikomoka ku masezerano y’Arusha

Senateri Tito Rutaremara avuga hari ingingo zikubiye mu masezerano y’Arusha zifashishwa mu kuyobora igihugu. Yatanze urugero rwa Komisiyo y’Ubumwe n’Ubwiyunge ifite inkomoko mu masezerano y’Arusha n’ubwo bwose yavuguruwe mu biganiro byo mu Rugwiro.

Ati “Burya mubona, Komisiyo y’Igihugu y’Ubumwe n’Ubwiyunge ikomoka ku masezerano y’Arusha. Twatanze icyo cyifuzo nka FPR ubwo twari mu masezerano y’Arusha, kiremerwa, kandi n’ubu murabona ko ubumwe n’ubwiyunge buganje mu gihugu.”

Avuga ko kuri ubu ubumwe n’ubwiyunge mu banyarwanda bugeze kuri 92%, akaba ari intambwe ishimishije n’ubwo itaragera ku 100%, ariko hari aho bigeze. Senateri Rutaremara kandi avuga ko Politiki nziza ya FPR ishingiye ku bumwe bw’Abanyarwanda yanafashije gucyura impunzi zose zari hanze, nta vangura.

Ati “Politiki ya FPR yageze ku ntego yo gucyura Abanyarwanda benshi bari hanze y’igihugu kandi ibikora itavanguye. Icyo gihe hari impunzi zasagaga miliyoni eshatu hanze, iza kera n’iza vuba.”

JPEG - 427.2 kb
Urugamba rwo kubaka igihugu rurakomeje, harwanywa ubukene, hubakwa iterambere buri munyarwanda yibonamo

Avuga ko FPR ifatanyije na Leta y’Ubumwe bw’Abanyarwanda yabashije gucyura impunzi nyinshi, ibintu bidakunze kubaho, kuko ubundi bimenyerewe ko impunzi zicyurwa na UNHCR.

Ati “Ni twe gihugu twabashije gucyura impunzi LONI itadufashije, kandi twabigezeho, n’ubwo hari abacyinangiriye banga gutaha mu gihugu.”

Rutaremara asoza avuga ko intego FPR yari ifite itangiza urugamba rwo kwibohora zigenda zigerwaho. Avuga ko kurwanya ubukene ari inzira ikomeza, ariko ko aho bigeze hashimishije, kugarura ubumwe bw’Abanyarwanda na byo bigeze ahashimishije, kurandura ubujiji mu banyarwanda na byo biri mu nzira nziza, imibereho myiza y’abaturage na yo igeze ku ntera nziza, gucyura impunzi na byo biri mu murongo mwiza, ariko ngo ibyo byose birakomeza.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE