2017-07-21 15:15:02 clouds 27o High | Kigali Rwanda

Dukurikire:
 
 

Umunsi wa mbere wo kwiyamamaza kwa Paul Kagame

Yanditswe na IMVAHO NSHYA

Kuya 2017-07-14 13:00:00

 
Share on:
 
Yasuwe:1511
 
Yavuzweho:200
 
10
 
10

Umukandida w’Umuryango, FPR Inkotanyi, Paul Kagame yatangiye kwiyamamariza kuyobora u Rwanda mu turere twa Ruhango na Nyanza kuri uyu wa 14 Nyakanga 2017.

Akarere ka Ruhango Perezida Kagame yatangiriyeho kagizwe n’imirenge icyenda, gafite ubuso bwa kilometero kare 626.8, kagaturwa n’abaturage 319 885.

Abaturage baturutse mu mirenge yose y’akarere baje kumwakira ari benshi cyane ko akarere ka Ruhango ari nako yavukiyemo.

JPEG - 222.6 kb
Imbaga y’abaturage babarirwa mu bihumbi baje gushyigikira umukandida Paul Kagame

Hari kandi n’abayoboke b’umuryango RPF baturutse hirya no hino mu gihugu baje gushyigikira umukandida wabo.

JPEG - 82.2 kb
Abasaza n’abanyamahanga nabo ntibatanzwe

Saa 11:00: Imbaga y’abaturage, abayoboke ba FPR n’abayobozi bakuru bayo biteguye kwakira Perezida Kagame, aragera aho bateraniye mu kanya gato.

Mu karere ka Ruhango, mu 2010 imiryango 2.7 % niyo gusa yari ifite amanyashanyarazi ariko mu myaka irindwi gusa, 27% imaze kuyagezwaho.

JPEG - 75.5 kb
Abayoboke b’ishyaka rya PSD, PL na PSP nabo baje kwamamaza umukandida wabo Paul Kagame

JPEG - 55.9 kb
Iyi mbaga y’Abanyarwanda iracinya akadiho itegereje ko Perezida Kagame agera aha mu karere ka Ruhango


Saa 11:30: Perezida Kagame aherekejwe n’umuryango we bageze mu Ruhango

JPEG - 49.5 kb
Mu byishimo byinshi, Perezida Kagame arasuhuza abaturage nabo bamwakira bazunguza amabendera ya RPF n’ibyishimo byinshi


Gahunda yo kwiyamamaza k’umukandida wa RPF mu karere ka Ruhango iyobowe na Theogene Rusanganwa, imwe mu ntore zo muri ako karere.

Saa 11 55: Nyuma y’indirimbo ’Tora Kagame’ ivuga ku byagezweho mu myaka 7 ishize, hakurikiyeho ijambo rya Minisitiri w’Umuco na Siporo, Uwacu Julienne.

Yavuze ko Abanyarwanda bageze kuri byinshi muri manda ishize, by’umwihariko mu karere ka Ruhango, ubu bafite inzu zigezweho, amashanyarazi, imihanda, ifite uburebure bugera kuri kilometero 121.

Yatanze urugero ku muhanda wa Ruhango- Kinazi-Ntongwe wakijije abaturage ingendo zivunanye, ugatuma n’umusaruro ugera ku isoko.

Minisitiri Uwacu yongeyeho ko abaturage ba Ruhango kuri ubu babona aho bagurisha umusaruro wabo kuko begerejwe inganda zirimo urwa Kinazi rutunganya imyumbati.

12: 00:Perezida Kagame atangiye ijambo rye ashimira FPR n’abayoboke bayo kubera byinshi byakozwe.

Ati "FPR yazanye ubumwe, Abanyarwanda baba umwe bahurira ku kuba Abanyarwanda no kubaka u Rwanda, ndashimira RPF ikizere yigirira kandi yakomeje kungirira. Niyo mpamvu mpagaze hano kugira ngo nongere ku bitari ibanga ko ndi umukandida wa FPR."

Yakomeye avuga ko nubwo Abanyamakuru bitwaza uburenganzira bwabo bakabangamira abo batangazaho inkuru birengagije ko nabo bafite uburenganzira bwabo.

Ati “Niba mukurikira amakuru neza hirya ngo hino, abanyamakuru bagira uburenganzira, baranabukwiye, ariko nagira ngo mbabwire ko atari bo bonyine bakwiriye uburenganzira n’abandi babufite.

N’abo bandika, n’abo bavuga, uko babavuga kose nabo bafite uburenganzira. Barandika bakavuga ngo aya matora y’u Rwanda nta matora arimo kuko tuzi ikizavamo, ariko njye rwose biranshimisha kuba tuzi ikizavamo ahubwo.”

JPEG - 52.8 kb
Abaturage b’i Nyanza nabo biteguye kwakirana ubwuzu Perezida Kagame kuri iki gicamunsi

Nyuma yo kwiyamamaza i Ruhango, Perezida Kagame yerekeje mu karere ka Nyanza.

Saa 15: 00: Mu ijambo yabwiye abaturage ba Nyanza, Umukuru w’Igihugu yanenze abavuga ko ubudasa bw’u Rwanda atari demokarasi.

Yavuze ko u Rwanda ruri mu nzira yo kubahiriza uburenganzira bwa buri wese.

Yakomeje agira ati “Abajya guteega bakanyuranya n’ibyo baba babona amafaranga yabo aragiye. Abavuga ko ubu budasa bw’u Rwanda atari demokarasi, igihe cyabo bataye biga kuri demokarasi bagipfushije ubusa, kuko aho ari hose ku Isi muri demokarasi ikintu cya mbere kibanza ni icyifuzo cy’abantu.

“Icyifuzo gishingira kuri byinshi, ku cyo bibonamo, aho bunguka uko babyiyumvamo, uko babyiyumvamo, uko babishaka, niho bihera. Icyemezo gifatwa kikaba icya benshi ariko kikubahiriza uburenganzira bwa buri muntu.

“Twe rero n’abatari kumwe natwe muri iyi nzira, uburenganzira bwabo turabwubahiriza. Tumaze gutsinda ingamba nyinshi, ariko iyo dutsinze ingamba ntabwo twigamba.”

Yasabye abaturage gukomeza bagafatanya guhangana n’ibibazo igihugu gihura nabyo.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE