2017-08-20 07:43:19 clouds 27o High | Kigali Rwanda

Dukurikire:
 
 

Kagame yatugiriye inama atuma twongera gukorana n’ibihugu bya Afurika –Netanyahu

Yanditswe na IMVAHO NSHYA

Kuya 2017-07-10 13:08:32

 
Share on:
 
Yasuwe:522
 
Yavuzweho:200
 
10
 
10

Minisitiri w’Intebe wa Isiraheli, Benjamin Netanyahu, yashimye Perezida Kagame ko yamugiriye inama agatuma igihugu cye cyongera imbaraga mu mubano wacyo n’ibihugu bya Afurika.

Netanyahu na Perezida wa Isiraheli Reuven Rivlin bakiriye Perezida Kagame i Yeruzalemu kuri uyu wa 10 Nyakanga 2017.

Yavuze ko mu biganiro yigeze kugirana na Perezid Kagame yamugaragarije ko Isiraheli ishaka kûubura umubano n’ibihugu bya Afurika, maze Kagame akamugira inama nyinshi zatumye icyo bashakaga bakigeraho ku buryo bworoshye.

Ati “Icyo gihe wambwiye ko hari icyo wadufasha. Kandi mu by’ukuri warabikoze. Navuga ko wabaye ikiraro twanyuzeho kugira ngo tugaruke muri Afurika, intambwe ku ntambwe ugenda uduha inama zuje ubunararibonye.”

Minisitiri w’Intebe Netanyahu, yavuze ko kubera inama za Perezida Kagame, agiye gukora ingendo eshatu muri Afurika mu gihe cy’imyaka itatu, kandi hari hashize imyaka ibarirwa muri 30 nta muyobozi mukuru wa Isiraheli ugera kuri uyu mugabane.

Yagarutse ku kuba u Rwanda na Isiraheli bihuje amateka mabi ya Jenoside, kuko muri icyo gihugu Abayahudi benshi batikiriye muri Jenoside yakozwe n’Abanazi mu ntambara ya Kabiri y’Isi, mu gihe n’Abatutsi benshi bishwe muri Jenoside yabakorewe mu 1994.

Yakomeje agira ati “ Ku bw’umurava wawe wahagaritse ubwo bwicanyi utangira kubaka icyo gihugu cyari cyarashegeshwe. Kuri ubu dushobora kubona ibikorwa bitangaje ukora. Mu by’ukuri kimwe mu bidushimisha ni ugufatanya mu kubaka igihugu cyawe ukazamura ubukungu, amazi akagera kuri benshi ndetse no mu zindi nzego zirimo umutekano.”

Netanyahu kandi yashimiye Perezida Kagame uburyo ashyigikira Isiraheli mu nama mpuzamahanga zitandukanye cyane cyane mu guharanira ko ukuri ku mateka y’icyo gihugu kutagorekwa.

Perezida wa Isiraheli, Rivlin yavuze ko yashimye amagambo ya Perezida Kagame ubwo yari mu kiganiro mu nteko rusange y’umuryango uharanira inyungu rusange za Isiraheli, AIPAC, icyo gihe yavuze ko “u Rwanda ari inshuti idashidikanywaho ya Isiraheli”

Yasabye ko u Rwanda ruri mu Kanama ka Loni k’Uburenganzira bwa Muntu, gakunze kwibasira Isiraheli, ruzagira icyo rukora kugira ngo abarwanya icyo gihugu bahindure imyumvire.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE