2017-06-24 05:01:57 clouds 27o High | Kigali Rwanda

Dukurikire:
 
 

Iyo uhisemo nabi amateka arabikubaza – Dr Vincent Biruta

Yanditswe na IMVAHO NSHYA

Kuya 2016-10-31 05:23:38

 
Share on:
 
Yasuwe:10
 
Yavuzweho:200
 
10
 
10

Perezida w’Ishyaka Riharanira Demokarasi n’Imibereho Myiza y’Abaturage, PSD, akaba ari na Minisitiri w’Umutungo Kamere, Dr Vincent Biruta, arasaba urubyiruko guhitamo neza no gushishoza kugira ngo batazahiramo nabi amateka akabibaryoza.

Afungura amahugurwa y’urubyiruko ruhagarariye abandi, ku Cyumweru tariki ya 30 Ukwakira 2016, Dr Biruta, yabwiye urubyiruko ko rugomba guharanira guteza imbere igihugu.

Yagize ati “Mwese muzi amateka y’iki gihugu nubwo muri urubyiruko ariko muzi ibyabaye mu 1994 aho hari bamwe mu Banyarwanda bakoze Jenoside yakorewe Abatutsi, ariko abijanditse mu bwicanyi abenshi bari urubyiruko kubera ko rwahisemo nabi rukurikira politiki y’ikinyoma.”

JPEG - 352 kb
Dr. Biruta Vincent, Perezida w’Ishyaka Riharanira Demokarasi n’ Imibereho Myiza y’Abaturage PSD

Dr Vincent Biruta, yasobanuriye urubyiruko ko kujya cyangwa gukora politiki, atari ugushaka imyanya ya politiki, ahubwo ari uguharanira guteza imbere abaturage no gusubiza ibibazo bafite.

Yagize ati “Iyo ukurikiye imyanya ukayibura, uhinduka umurakare kandi nta murakare uteza imbere igihugu uretse gusenya no guhitamo umurongo mubi, cyangwa wahabwa umwanya ntuwishimire ugahora utekereza uwo undi arimo bigatuma intebe wicayeho uyihusha ukagwa hasi kuko warangariye intebe y’undi ukabura byose.”

Mu kiganiro Dr. Iyamuremye Augustin yahaye urubyiruko ku mateka y’u Rwanda na gahunda ya “Ndi Umunyarwanda”, yavuze ko Jenoside yakorewe Abatutsi mu 1994 yagize ingaruka zirenga abayikorewe zikagera no kubayikoze.

Yavuze ko hari abakoze Jenoside bagize ingaruka zibababaza bakanicuza, ariko hari n’ababikoze babaye abasazi.

Yagize ati “Pascal Simbikangwa wari umusirikare ufite ipeti rya Kapiteni mu ngabo zarindaga Perezida Habyarimana wakatiwe n’urukiko mu Bufaransa gufungwa imyaka 25, ariko akaba ari kuburana mu bujurire, yavuze ko nta murambo yabonye mu gihe cya Jenoside kandi yari mu gihugu, avuga ko aho kuba nk’abamushinja yaguma mu buroko ubuzima bwe bwose. Murumva ko ari ubusazi.”

Dr. Iyamuremye yasabye urubyiruko kutaba imbata y’ibikomere cyangwa uburakari.

Muri aya mahugurwa urubyiruko rwasobanuriwe uko rugomba gukoresha imbuga nkoranyambaga kuko zigira uruhare mu byiza, ariko iyo zikoreshejwe nabi zigira ingaruka mbi mu gusenya kandi vuba.

Hon. Gatabazi JMV, atanga ikiganiro ku mikorere y’imbuga nkoranyambaga mu kubaka igihugu, yasabye urubyiruko kwitondera izi mbuga kuko icyagezeho kidasubira inyuma.

Yagize ati “Nimuzikoreshe mu byiza bibubaka kandi byubaka igihugu munagerageza gutanga amakuru y’ukuri, murwanya ibinyoma kuko abasenya ni zo bakoresha kandi ari bake ariko bakagera kuri benshi babaha uburozi.”

Urubyiruko rwa PSD rwifatanyije n’abaturage b’umurenge wa Muhazi mu gikorwa cy’umuganda, banaha ubwisungane mu kwivuza abaturage 50 batishoboye, rukaba rwaranatanze ibitekerezo mu mirongo migari izashingirwaho mu guhatana mu matora ataha.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE